.jpg)
តារារ៉េប កាន់យ៉េ វ៉េស មានទ្រពសម្បត្តិ ១,៨ពាន់លានដុល្លារ និងល្បីក្នុងវិស័យច្នៃម៉ុដ ព្រមទាំងបានប្រឡូកនយោបាយ។
ក្រុងឡូសអេនជឺលេស៖ បណ្ដាញផ្សព្វផ្សាយអាមេរិក បានរាយការណ៍កាលពីថ្ងៃពុធ ដោយដកស្រង់ពីឯកសារដាក់ជូនតុលាការក្រុងឡូសអេនជឺលេសថា និមិត្ដរូបតន្ដ្រី លោក កាន់យ៉េ វ៉េស បានផ្លស់ប្ដូរឈ្មោះផ្លូវច្បាប់ឱ្យស្របតាមរហស្សនាមធ្លាប់ប្រើកន្លងមក គឺ «យ៉េ»។
តារារ៉េប វ័យ ៤៤ ឆ្នាំរូបនេះ ចង់ផ្លាស់ប្ដូរឈ្មោះពេញ កាន់យ៉េ អូម៉ារី វ៉េស មកត្រឹមពីរអក្សរ «យ៉េ» តែមួយម៉ាត់គត់ ដោយគ្មានឈ្មោះកណ្ដាល និងត្រកូល។ នេះបើយោងតាម NBC News និងបណ្ដាញផ្សព្វផ្សាយអាមេរិកដទៃទៀត។
NBC បានផ្សាយថា ការផ្លាស់ប្ដូរឈ្មោះនេះតម្រូវឱ្យមាន «ហេតុផលផ្ទាល់ខ្លួន» និងត្រូវទទួលស្គាល់ដោយចៅក្រម។ លោក វ៉េស ត្រូវបានហៅថា យ៉េ ម្ដងកាលដែរ ដោយបានសរសេរកាលពីឆ្នាំ២០១៨ ថា លោកត្រូវបានស្គាល់ជា «កាន់យ៉េ វ៉េស។ ខ្ញុំជា យ៉េ»។
តារារ៉េប កាន់យ៉េ វ៉េស អតីតស្វាមី គីម កាដាសៀន សម្រេចប្ដូរឈ្មោះជាផ្លូវការទៅជា យ៉េ។
លោកបានចេញអាល់ប៊ុមចម្រៀងមួយដោយប្រើឈ្មោះដូចគ្នានេះ កាលពីឆ្នាំ ២០១៨ នោះដែរ។
តារាចម្រៀងរ៉េប និងជាផលិតករតន្ដ្រីមកពីឈីកាហ្គោ បានឈ្នះពាន Grammy ចំនួន ២១។ លោកឈានជើងចូលវិស័យចម្រៀងរ៉េបបន្ដិចម្ដងៗរហូតដល់បង្កើតអាល់ប៊ុមចម្រៀងជាហូរហែ ដោយលក់ថាសចម្រៀងជាង ២០ លានបន្ទះ។
លោក វ៉េស កាន់តែមានឈ្មោះបោះសំឡេងពីរឿងរ៉ាវជីវិតច្រើនជាងវិថីសិល្បៈ ក្រោយពីដៃគូជិត ១ ទសវត្សរ៍របស់លោកគឺ គីម កាដាសៀន បានដាក់ពាក្យបណ្ដឹងលែងលះកាលពីដើមឆ្នាំ។
មុនពេលធ្លាយដំណឹង សម្ព័ន្ធស្នេហារបស់ពួកគេបានប្រេះឆាអស់រយៈពេលជាច្រើនខែដោយកត្ដាមិនសូវចុះសម្រុងនឹងគ្នា។ លោក វ៉េស មានបញ្ហាសុខភាពផ្លូវចិត្ដ ហើយកាលពីឆ្នាំមុន លោកប៉ុនប៉ងប្រឡូកក្នុងឆាកនយោបាយអាមេរិក៕ AFP/HR
តារារ៉េប កាន់យ៉េ វ៉េស អតីតស្វាមី គីម កាដាសៀន បណ្ដើរគ្នាចូលរួមកម្មវិធី មុនពេលលែងលះ។
