.jpg)
កោះហ្សានហ្ស៊ីបា នឹងកសាងអគារខ្ពស់បំផុតនៅតំបន់សាហារ៉ានៃទ្វីបអាហ្វ្រិកដោយចំណាយប្រាក់ ១,៣ពាន់លានដុល្លារ។
ក្រុងដូដូម៉ា៖ កោះហ្សានហ្ស៊ីបា បានប្រកាសផែនការកាលពីថ្ងៃអង្គារថា នឹងកសាងអគារខ្ពស់បំផុតនៅតំបន់សាហារ៉ានៃទ្វីបអាហ្វ្រិក ដោយចំណាយប្រាក់ ១,៣ ពាន់លានដុល្លារ ដែលលើសថវិកាប្រចាំឆ្នាំរបស់ដែនកោះនេះជាង ៦០ ភាគរយឯនោះ។
អគារពាណិជ្ជកម្មហ្សានហ្ស៊ីបា ដូមីណូ កម្ពស់ ៧០ ជាន់ នឹងត្រូវបានអភិវឌ្ឍលើឆ្នេរភាគខាងលិច ចម្ងាយប្រមាណ ១៥ គីឡូម៉ែត្រពីតំបន់ទីក្រុងថ្ម (Stone Town) ដែលចុះក្នុងបញ្ជីបេតិកភណ្ឌពិភពលោក និងពាក់ព័ន្ធជាមួយការបង្កើតកោះសិប្បនិម្មិត រួមនឹងកំពង់ផែនាវាកម្សាន្ដ និងកបាល់ខ្នាតយក្ស។
ក្នុងទឹកប្រាក់ជាង ៣ ពាន់ពាន់លានស៊ីលីងតង់ហ្សានី ការចំណាយសរុបទំនងជាលើសថវិការដែនកោះតូចនេះរវាងឆ្នាំ ២០២១ និងឆ្នាំ ២០២២ ជាង ៦០ ភាគរយ។
មូដរីក រ៉ាម៉ាដាន សូរ៉ាហ្គា ជារដ្ឋមន្ដ្រីការងារ សេដ្ឋកិច្ច និងវិនិយោគប្រចាំដែនកោះហ្សានហ្ស៊ីបា បានប្រាប់អ្នកសារព័ត៌មានថា គម្រោងនេះនឹងជួយជំរុញកិច្ចខិតខំប្រឹងប្រែងរបស់រដ្ឋាភិបាលក្នុងការកៀរគរអ្នកវិនិយោគទាំងក្នុង និងក្រៅប្រទេសមកកាន់ដែនកោះនេះ។
ភាពល្បីល្បាញនៃផ្ទៃទឹកសមុទ្រខៀវស្រងាត់ និងរុក្ខជាតិគ្រឿងទេស កោះហ្សានហ្ស៊ីបា ពឹងអាស្រ័យចម្បងលើវិស័យទេសចរណ៍។
គម្រោងចុងក្រោយនឹងមានអាផាតមិនចំនួន ៥៦០ សណ្ឋាគារប្រណីត រីសត ទីលានវាយកូនហ្គោល និងកន្លែងរៀបចំមង្គលការ។ នេះបើយោងតាមសេចក្ដីថ្លែងការណ៍ដោយក្រុមហ៊ុនឌីហ្សាញមូលដ្ឋាននៅញូវយ៉ក និងឌូបៃ xCassia សម្ព័ន្ធក្រុមហ៊ុន AICL Group របស់តង់ហ្សានី និង Crowland Management Ltd របស់ស្កុត។
ជេន-ផូល សាសៀ ស្ថាបនិកក្រុមហ៊ុន បានឱ្យដឹងក្នុងសេចក្ដីថ្លែងការណ៍ថា៖ «នឹកឃើញដំបូងនៅទីក្រុងប៉ារីសក្នុងឆ្នាំ២០០៩ ក្រោយពីកាលឪពុកខ្ញុំនៅរស់ កូនប្រុសខ្ញុំពីរនាក់ និងរូបខ្ញុំលេងដូមីណូ ខ្ញុំស្រមៃចង់កសាងគម្រោងនេះនៅរយៈពេលជាងមួយទសវត្សរ៍»។
ពេលបញ្ចប់ការសាងសង់ អគារខ្ពស់កប់ពពកនឹងក្លាយជាអគារខ្ពស់បំផុតលំដាប់ទី២ នៅអាហ្វ្រិក បន្ទាប់ពីអគារ Iconic Tower កម្ពស់ ៨០ ជាន់នៅអេហ្ស៊ីប ដែលគ្រោងរួចរាល់ឆ្នាំក្រោយ។
ជាមួយភាពល្បីល្បាញនៃផ្ទៃទឹកសមុទ្រខៀវស្រងាត់ និងរុក្ខជាតិគ្រឿងទេស កោះហ្សានហ្ស៊ីបា ពឹងអាស្រ័យចម្បងលើវិស័យទេសចរណ៍ និងរងគ្រោះបាត់បង់ចំណូលយ៉ាងធ្ងន់ធ្ងរអំឡុងពេលវិបត្ដិកូវីដសកល៕ AFP/HR
