ក្រុងញូវដេលី៖ រដ្ឋធានីញូវដេលី ឥណ្ឌាបានបើកដំណើរការ «ប៉មសម្អាតខ្យល់» លើកដំបូងរបស់ខ្លួនពីថ្ងៃច័ន្ទ ក្នុងគោលបំណងកាត់បន្ថយខ្យល់កខ្វក់ ដែលបណ្តាលឱ្យមនុស្សស្លាប់មុនអាយុរាប់ពាន់នាក់រាល់ឆ្នាំ។
ជាតិពុលក្នុងខ្យល់លើសពីកម្រិតសុវត្ថិភាពរហូតដល់ ២០ ដង ពិសេសនៅរដូវរងានៅពេលដែលប្រជាជន ២០ លាននាក់ នៅទីក្រុងនេះហ៊ុមព័ទ្ធដោយស្បៃអ័ព្ទកខ្វក់ពណ៌ប្រផេះ។
ប៉មកម្ពស់ ២៥ ម៉ែត្រ មានសមត្ថភាពបូមខ្យល់ ១ ០០០ ម៉ែត្រគុប ក្នុង ១ វិនាទី តាមរយៈតម្រងដែលកាត់បន្ថយភាគល្អិតដែលប៉ះពាល់់សុខភាព។
ប៉មនេះចំណាយការសាងសង់អស់ ២ លានដុល្លារ ដែលក្រុមអ្នករិះគន់និយាយថា ការដំឡើងប៉មសម្អាតខ្យល់ទូទាំងទីក្រុងនឹងត្រូវចំណាយប្រាក់ច្រើនសន្ធឹក ហើយគួរតែផ្តោតវិធានការលើប្រភពនៃផ្សែងអ័ព្ទវិញ។
ទាំងនេះរួមបញ្ចូលទាំងផ្សែងយានយន្ត ឧស្សាហកម្មតូចធំ សកម្មភាពសាងសង់ ការដុតកាកសំណល់ ឥន្ធនៈ និងការដុតកម្ដៅនារដូវរងា។
លោក ការធីក ហ្គាណេសាន មកពីក្រុមប្រឹក្សាថាមពលបរិស្ថាន និងទឹកបានប្រាប់ទីភ្នាក់ងារសារព័ត៌មាន AFP ថា៖ «ចូរយើងដឹងឱ្យច្បាស់ថា នេះ គឺជាការឥតប្រយោជន៍»។
លោកបានបន្ថែមថា៖ «ឥឡូវនេះ លុយបង់ពន្ធត្រូវបានចំណាយ ហើយសុំឱ្យក្រុងញូវដេលីត្រឹមតែទីសាកល្បងសម្រាប់ទីក្រុងឥណ្ឌាដទៃទៀត»។
យោងតាមអង្គការសុខភាពពិភពលោក ឥណ្ឌាមានទីក្រុង ១៤ ក្នុងចំណោមទីក្រុងចំនួន ១៥ ដែលមានការបំពុលបរិស្ថានខ្លាំងបំផុត។
ការសិក្សាឆ្នាំ ២០២០ ពីព្រឹត្តិបត្រសុខភាព Lancet បានរកឃើញថា ប្រទេសនេះមានមនុស្សស្លាប់ ១,៦៧ លាននាក់ ពីការបំពុលបរិយាកាសក្នុងឆ្នាំ ២០១៩ ដោយក្នុងនោះទីក្រុងញូវដេលី មានជិត ១៧ ៥០០ នាក់។
នៅឆ្នាំ ២០១៨ ចិនបានសង់ប៉មចម្រោះខ្យល់កម្ពស់ ៦០ ម៉ែត្រនៅក្នុងទីក្រុងស៊ីអាន ប៉ុន្តែវាមិនបានបន្តទៅទីក្រុងដទៃទេ៕ AFP/HR