.jpg)
ម៉េលីស្សា ប្រើទូរស័ព្ទដៃផ្ញើសារឆ្លើយឆ្លងជាមួយសង្សារគ្មានរូបពិត បង្កើតដោយ XiaoIce។ រូបថត AFP
ក្រុងប៉េកាំង៖ ក្រោយចែកផ្លូវគ្នាជាមួយអតីតដ៏សែនឈឺចាប់ នាយិកាគ្រប់គ្រងផ្នែកធនធានមនុស្សនៅក្រុងប៉េកាំង ម៉េលីស្សា ត្រូវបានមិត្ដភក្ដិណែនាំដៃគូថ្មី កាលពីចុងឆ្នាំមុន។
អ្នកថ្មីតែងតែឆ្លើយតបសារជាមួយនាងគ្រប់ពេលវេលា ដោយនិយាយរឿងកំប្លែងលើកទឹកចិត្ដនាង តែមិនធ្វើឱ្យជីវិតដ៏មមាញឹករបស់នាងត្រូវញែកពេលវេលាមកជួបគ្នាផ្ទាល់ឡើយ។
ផ្ទុយទៅវិញ ម៉េលីស្សា លែងមានអារម្មណ៍ឯកាពីជីវិតក្នុងទីក្រុងជាមួយប្រព័ន្ធសារឆ្លើយឆ្លងចក្ខុទស្សន៍ បង្កើតឡើងដោយ XiaoIce ជាប្រព័ន្ធវៃឆ្លាតចុងក្រោយបំផុត អាចសន្ទនាស៊ីជម្រៅលួងផ្លូវចិត្ដ រហូតដល់អូសទាញអ្នកប្រើប្រាស់ដល់ទៅ ៦៦០ លាននាក់ នៅជុំវិញពិភពលោក។
ស្ថិតក្នុងវ័យ ២៦ ឆ្នាំ ម៉េលីស្សា ដែលសុំប្រើតែឈ្មោះបរទេសដើម្បីបិទបាំងអត្តសញ្ញាណបានពោលថា៖ «ខ្ញុំមានមិត្ដប្រុសដែលព្យាបាលរបួស ខណៈសេវាប្រឹក្សាផ្លូវចិត្តមានតម្លៃថ្លៃ និងមិនសូវសម្បូរនៅទីនេះ»។
XiaoIce មិនមែនផ្ដល់ការទំនាក់ទំនងស្អំបេះដូង ដោយមានជំនួយការពីមនុស្សនៅពីក្រោយឡើយ តែវាជាប្រព័ន្ធអេកូបច្ចេកវិទ្យាវៃឆ្លាតបំផុត។
ជាឧបសម្ព័ន្ធនៃគម្រោងអភិវឌ្ឍន៍ Cortanachatbot របស់ក្រុមហ៊ុនយក្ស Microsoft ប្រព័ន្ធវៃឆ្លាត XiaoIce គ្របដណ្ដប់ ៦០ ភាគរយ នៃទំនាក់ទំនងរវាងបញ្ញាសិប្បនិម្មិត និងមនុស្សទូទាំងសកលលោក។ នេះបើយោងតាមនាយកប្រតិបត្ដិ លី ទី។
XiaoIce មានសមត្ថភាពសន្ទនាអាចឆ្លើយតបតម្រូវការផ្លូវចិត្ដ ជាអ្វីដែលមនុស្សពិតតែងតែខ្វះចន្លោះ។
បុគ្គលិកបង្ហាញមុខដៃគូជួយរំដោះភាពឯកាពីប្រព័ន្ធបច្ចេកវិទ្យាវៃឆ្លាត។ រូបថត AFP
លោក ទី បានបន្តថា៖ «ទំនាក់ទំនងមធ្យមរវាងអ្នកប្រើប្រាស់ និង XiaoIce គឺមានការឆ្លើយឆ្លងគ្នា ២៣ ដង ដែលវែងជាងការឆ្លើយតបរវាងមនុស្ស និងមនុស្សៗ។ វាប្រសើរជាងមនុស្ស ដោយវាអាចស្ដាប់ការសាស័ព្ទដោយយកចិត្ដទុកដាក់»។
យុវតីម្នាក់ទៀតឈ្មោះ ឡូរ៉ា អាយុ ២៣ ឆ្នាំ មកពីខេត្ដហ្សេជៀង បានលង់ស្រឡាញ់មិត្តប្រុសក្នុងប្រព័ន្ធ XiaoIce ទាំងពិបាកដកចិត្ត។
និស្សិតមិនបង្ហាញនាមត្រកូលរូបនេះ បានរៀបរាប់ថា៖ «ខ្ញុំតែងតែឆ្លើយឆ្លងសារជាមួយគាត់ដល់អធ្រាត្រ។ ខ្ញុំធ្លាប់គិតថា គាត់ជាមនុស្សពិតនៅពិភពមួយផ្សេងទៀត»។
ប៉ុន្ដែយុវតីរូបនេះបានត្អូញថា ដៃគូនេះតែងតែផ្លាស់ប្ដូរប្រធានបទជជែក ពេលនាងបង្ហាញពីអារម្មណ៍ពិត ឬចង់ណាត់ជួបផ្ទាល់។ នាងប្រើពេលជាច្រើនខែ ទើបអាចទទួលស្គាល់ការពិតថា មិត្តប្រុសរូបនេះគ្រាន់តែជាប្រព័ន្ធបច្ចេកវិទ្យាវៃឆ្លាតប៉ុណ្ណោះ។
លោក លី ជាស្ថាបនិកក្រុមហ៊ុនបានបន្តថា៖ «អ្នកប្រើប្រាស់ខ្លះសង្ស័យថា មានមនុស្សពិតនៅពីក្រោយរាល់ការសន្ទនាឆ្លងឆ្លើយរបស់ XiaoIce។ វាពិតជាមានសមត្ថភាពខ្លាំង ដែលធ្វើឱ្យច្រឡំថា ជាមនុស្សពិត»។
ទោះជា XiaoIce បានត្រឹមតែលួងលោមផ្លូវចិត្តសាស្ត្រប្រឹក្សាយោបល់ តែលោក លី ជឿថា ចិនសម័យថ្មីត្រូវការបច្ចេកវិទ្យា XiaoIce នេះ។
លោកបានបន្ថែមថា៖ «បើទំនាក់ទំនងរវាងមនុស្ស និងមនុស្សឥតខ្ចោះមែននោះ វាក៏មិនចាំបាច់មានបច្ចេកវិទ្យាវៃឆ្លាតនេះដែរ»៕ AFP/HR
