.jpg)
តារាសម្ដែង និងផលិតករ ចាវ វៃ ចូលរួមក្នុងកម្មវិធីមហោស្រពភាពយន្តនៅបរទេស។ AFP
ក្រុងប៉េកាំង៖ ឈ្មោះរបស់តារាភាពយន្តស្រីដ៏ល្បីល្បាងនាង ចាវ វៃ ដែលគេស្គាល់ថាតួនាង ត្រចៀកកាំ ត្រូវបានលុបចេញពីគេហទំព័រវីដេអូ និងបញ្ជីរាយនាមស្នាដៃសិល្បៈនានា ខណៈរដ្ឋាភិបាលក្រុងប៉េកាំងបង្កើនយុទ្ធនាការប្រឆាំងនឹងវប្បធម៌តារាល្បីបំពុលសង្គម។
លទ្ធផលស្វែងរកឈ្មោះ ចាវ វៃ ឬ វីគី ចាវ ដែលជាតារាសម្តែងស្រីដ៏មានប្រជាប្រិយម្នាក់ ត្រូវបានជាប់បម្រាមដោយបណ្ដាគេហទំព័រផ្សាយវីដេអូធំៗរបស់ចិន នៅល្ងាចថ្ងៃព្រហស្បតិ៍។
ឈ្មោះរបស់តារាសម្ដែងស្រីវ័យ ៤៥ឆ្នាំរូបនេះ ក៏ត្រូវបានដកចេញភ្លាមៗពីបញ្ជីរាយនាមសិល្បករសិល្បការិនីក្នុងកម្មវិធីទូរទស្សន៍ធំៗ ខណៈវេទិកាចែករំលែកព័ត៌មានពិសេសពីអ្នកនាង ចាវ វៃ នៅលើបណ្តាញសង្គមចិន Weibo ក៏ត្រូវបានបិទយ៉ាងអាថ៌កំបាំងផងដែរ។
តារាសម្ដែង ចាវ វៃ ដែលត្រូវបានគេស្គាល់តាមរយៈតួអង្គ ត្រចៀកកាំ ក្នុងរឿងភាគបុរាណចិន។ AFP
តំណភ្ជាប់ព័ត៌មាន hashtag «កំពូលប្រធានបទពី ចាវ វៃ ត្រូវបានបិទ» ទទួលបានចំនួនមើលរហូតដល់ ៨៥០លានដង។
មកទល់ពេលនេះមិនមានហេតុផលផ្លូវការណ៍ណាមួយបញ្ជាក់ពីការលប់ឈ្មោះ និងបន្សាត់វត្តមាន ចាវ វៃពីសង្គមសិល្បៈនោះទេ។
ប៉ុន្តែកាលពីដើមឆ្នាំ តារាស្រី ចាវ វៃ និងស្វាមីរបស់នាងត្រូវបានហាមឃាត់មិនឱ្យធ្វើពាណិជ្ជកម្មនៅផ្សារហ៊ុនស៊ាងហៃ កាលពីដើមឆ្នាំនេះដោយសារតែការដេញថ្លៃដណ្តើមយកបានបរាជ័យនៅឆ្នាំ ២០១៦ ហើយអាជ្ញាធរធ្វើការសម្រេចថា «សកម្មភាពនេះបានរំខានដល់សណ្តាប់ធ្នាប់ទីផ្សារពាណិជ្ជកម្ម»។
ឈ្មោះរបស់ ចាវ វៃ ត្រូវបានដកចេញភ្លាមៗពីបញ្ជីរាយនាមសិល្បករសិល្បការិនីក្នុងកម្មវិធីទូរទស្សន៍ធំៗ។
ប្រព័ន្ធផ្សព្វផ្សាយរដ្ឋបានឈានដល់ការជំរុញឱ្យមានការផ្លាស់ប្តូរវប្បធម៌កម្សាន្តរបស់ចិន ហើយអ្នកអត្ថាធិប្បាយព័ត៌មានទូរទស្សន៍ CCTV បាននិយាយកាលពីថ្ងៃអង្គារថា៖ «មួយរយៈនេះការបរាជ័យខាងសីលធម៌របស់សិល្បករ និងការរំលោភច្បាប់ការដាំដុះរូបពន្លកសិល្បៈក្មេងស្រករក្រោយខុសវ័យសមស្រប និងភាពវឹកវរ បានទាក់ទាញការចាប់អារម្មណ៍យ៉ាងខ្លាំងនៅក្នុងសង្គម។ យើងត្រូវតែស្តារបរិយាកាសអក្សរសិល្ប៍និងសិល្បៈដែលស្អាតនិងសុចរិតឡើងវិញដល់សាធារណជន»។
ចិនបានចេញបទបញ្ជាថ្មីកាលពីថ្ងៃសុក្រ ហាមឃាត់បញ្ជីចំណាត់ថ្នាក់តារាល្បី ៗ និងរឹតបន្តឹងការគ្រប់គ្រងលើក្លិបអ្នកគាំទ្រតារា និងទីភ្នាក់ងារគ្រប់គ្រងតារាដែលបង្កនូវភាពច្របូកច្របល់។
គេហទំព័រផ្សាយវីដេអូ iQiyi បាននិយាយថា ខ្លួនបានបញ្ឈប់កម្មវិធីប្រឡងទេពកោសល្យស្វែងរកពន្លកអ្នកសិល្បៈទាំងអស់កាលពីថ្ងៃព្រហស្បតិ៍ ខណៈក្រុមតន្ត្រីយុវវ័យចិនមួយក្រុមដែលមានសមាជិកជាកុមារថ្នាក់បឋមសិក្សាត្រូវបានរំសាយចោលកាលពីដើមសប្តាហ៍នេះ ក្រោមហេតុផលអាយុរបស់ពួកគេនៅក្មេងពេកនាំឱ្យមានការរិះគន់ជាសាធារណៈ៕ AFP/HR
តារាស្រីវ័យ ៤៥ឆ្នាំ ចាវ វៃ មានចម្ការទំពាំងបាយជូរនៅបារាំង និងទ្រព្យសម្បត្តិរាប់លានដុល្លារ។ AFP
