.jpg)
ស្លាកសញ្ញាបានក្រើនរំឭកដល់ភ្ញៀវទេសចរថា ការបត់ជើងតូចបែរទៅភាគីរុស្ស៊ីគឺជាទង្វើខុសច្បាប់។
ក្រុងអូស្លូ៖ ស្លាកសញ្ញាថ្មីមួយដែលដាក់នៅព្រំដែនទន្លេប្រទេសន័រវែស ជាមួយប្រទេសរុស្ស៊ី បានក្រើនរំឭកដល់ភ្ញៀវទេសចរថា ការបត់ជើងតូចបែរទៅភាគីរុស្ស៊ី គឺជាទង្វើខុសច្បាប់ ដោយត្រូវរងនូវការពិន័យជាប្រាក់ថែមទៀត។
សរសេរជាភាសាអង់គ្លេស រំលេចអក្សរដិតៗ ស្លាកសញ្ញានៅត្រើយម្ខាងនៃទន្លេ ចាកូបសេលវ៉ា ដែលខ័ណ្ឌចែកន័រវែសពីរុស្ស៊ី បានសរសេរថា «ហាមនោមបែរទៅកាន់រុស្ស៊ី»។
មេបញ្ជាការព្រំដែនន័រវែស ជេនស៍-អាន ហ៊ុយឡាន់ បានប្រាប់ AFP ថា៖ ស្លាកសញ្ញានេះទំនងជាតម្លើងដោយអ្នកមានបំណងល្អដើម្បីព្រមានដល់អ្នកមានអត្ដចរិតមិនថ្លៃថ្លូរ»។
អ្នកល្មើសប្រឈមនឹងការផាកពិន័យ ៣ ០០០ ក្រូន័រ (ជិត ២ លានរៀល)។ តំបន់នោះមានការពេញនិយមសម្រាប់ភ្ញៀវទេសចរនៅត្រើយខាងន័រវែស ជាទីដែលគយគន់ប្រទេសរុស្ស៊ីយ៉ាងងាយ និងមានចម្ងាយតែប៉ុន្មានម៉ែត្រពីគ្នាប៉ុណ្ណោះ។
លោក ហ៊ុយឡាន់ បាននិយាយថា៖ «ការបត់ជើងតូចតាមធម្មជាតិមិនមែនជាបញ្ហាចោទឡើយ តែវាអាស្រ័យលើអត្ដចរិតរបស់បុគ្គលម្នាក់ៗ។ ក្នុងករណីបំពាន ជនល្មើសនឹងប្រឈមច្បាប់គ្រប់គ្រងអត្ដចរិតនៅតាមព្រំដែន»។
រូបតំណាង៖ ប៉ូលិសន័រវែសប្រចាំនៅព្រំដែនត្រួតពិនិត្យអ្នកដំណើរឆ្លងកាត់។ AFP
ច្បាប់ន័រវែសបានហាមឃាត់ទង្វើបំពាននៅតាមព្រំដែន ដែលម៉ាក់ងាយដល់រដ្ឋក្បែរខាង ឬអាជ្ញាធរបស់គេ។ យោងតាមលោក ហ៊ុយឡាន់ ដែលមានភារកិច្ចរក្សាភាពថ្លៃថ្នូរនៅតាមព្រំដែនប្រទេសទាំងពីរ បានឱ្យដឹងថា អាជ្ញាធររុស្ស៊ីមិនដែលតវ៉ាអំពីហេតុការណ៍នោមនេះទេ។
វេបសាយ Barents Observer ដែលបានបង្ហោះរូបថត និងសំណេរស្ដីពីស្លាកសញ្ញា បានរំឭកថា មនុស្ស ៤ នាក់ ត្រូវបានចាប់ខ្លួនដោយឆ្មាំព្រំដែនន័រវែសកាលពីច្រើនឆ្នាំមុន ក្រោយពីពួកគេគប់ថ្មនៅខាងភាគីរុស្ស៊ី ហើយកាលពីរដូវរងាឆ្នាំមុន ស្ដ្រីម្នាក់ត្រូវបានថតសកម្មភាពដោយកាមេរ៉ាសុវត្ថិភាព ត្រូវបានពិន័យប្រាក់ ៨០០០ក្រូន័រ ដោយបានដាក់ដៃខាងឆ្វេងចូលដែនដីរុស្ស៊ី។
លោក ហ៊ុយឡាន់ បានបន្ដថា៖ «អស់លោកអាចគិតថា វិធានការនេះធ្ងន់ធ្ងរពេក តែយើងគ្រាន់តែបង្កើតច្បាប់នៅតាមព្រំដែនឱ្យមានការគោរពគ្នា»។
ព្រំដែនគោករបស់ន័រវែសជាមួយរុស្ស៊ីលាតសន្ធឹង ១៩៧,៧គីឡូម៉ែត្រ គឺជាព្រំដែនខាងជើងនៅអាក់ទិករបស់អង្គការណាតូ។
ទីក្រុងអូស្លូ និងមូស្គូ មានទំនាក់ទំនងល្អនឹងគ្នាតាមប្រពៃណី ថ្វីដ្បិតតែភាពតានតឹងបានកើនឡើងតាំងពីរុស្ស៊ីរំលោភបំពានឧបទ្វីបគ្រីមៀក្នុងឆ្នាំ២០១៤៕ AFP/HR
អ្នកល្មើសប្រឈមនឹងការផាកពិន័យ ៣០០០ក្រូន័រ (ជិត ២លានរៀល)។
