ក្រុងកូប៉ិនហាក៖ ក្រុមអ្នកវិទ្យាសាស្ដ្របានរកឃើញនូវអ្វីដែលជឿថាជាដែនដីនៅភាគខាងជើងបំផុតនៃពិភពលោក ជាកោះភាគខាងជើងគ្រីនលែន ដែលមិនទាន់មានឈ្មោះ ដែលនឹងត្រូវទឹកសមុទ្រលេបត្របាក់បាត់មិនខាន។
ក្រុមអ្នកវិទ្យាសាស្ដ្របានរកឃើញដែនកោះលើដំណើរស្រាវជ្រាវកាលពីខែកក្កដា និងបានគិតថា ពួកគេបានទៅដល់កោះ Oodaaq ដែលបច្ចុប្បន្ន ត្រូវបានចា់តទុកជាដែនកោះភាគខាងជើងបំផុតនៅលើភពផែនដី។
ប្រធានបេសកកម្ម ម៉រធេន រ៉ាសច៍ ពីនាយកដ្ឋាន ភូមិសាស្ដ្រវិទ្យា និងការគ្រប់គ្រងធនធានធម្មជាតិ នៃសកលវិទ្យាល័យកូប៉ិនហាក បាននិយាយថា៖ «យើងត្រូវបានគេប្រាប់ថា មានបញ្ហាបច្ចេកទេស GPS ដែលនាំឱ្យយើងជឿថា យើងកំពុងស្ថិតនៅលើដែនកោះ Oodaaq»។
ដោយនោះមិនមែនដែនកោះ Oodaaq លោកបានបន្ដថា៖ «តាមពិត យើងបានរកឃើញកោះថ្មីនៅភាគខាងជើងផុត ជាការរកឃើញដែលបង្ហាញពីវិសាលភាពនៃដែនដីដាណឺំម៉ាក»។
កោះ Oodaaq ស្ថិតនៅចម្ងាយប្រមាណ ៧០០ គីឡូម៉ែត្រភាគខាងត្បូងនៃប៉ូលខាងជើង ខណៈដែនកោះថ្មីមានចម្ងាយប្រមាណ ៧៨០ គីឡូម៉ែត្រភាគខាងជើងកោះ Oodaaq។
សាកលវិទ្យាល័យកូប៉ិនហាក បានឱ្យដឹងក្នុងសេចក្ដីថ្លែងការណ៍កាលពីថ្ងៃសុក្រថា កោះអត់មានឈ្មោះនោះ ស្ថិតនៅគ្រីនលែនភាគខាងជើងបំផុត និងជាកោះមួយនៅចុងបំផុតនៃផែនដី។ ប៉ុន្ដែវាមានកម្ពស់ត្រឹមចន្លោះពី ៣០ ទៅ ៦០ ម៉ែត្រប៉ុណ្ណោះពីនីវ៉ូទឹកសមុទ្រ ហើយ រ៉ាសច៍ បាននិយាយថា វាអាចមានអាយុកាលមិនយូរនោះទេ។
អ្នកស្រី បានលើកឡើងថា៖ «គ្មាននរណាដឹងថា តើវាអាចនៅរយៈពេលយូរប៉ុន្មានទៀតនោះទេ។ វាអាចលិចបាត់ទៅតាមអំណាចនៃវាយប្រហាររបស់ព្យុះគ្រប់ពេលវេលា»។
ដែនដីស្វ័យគ្រីនលែនរបស់ប្រទេសដាណឺំម៉ាក បានបង្កការភ្ញាក់ផ្អើលដល់ពិភពលោកនាប៉ុន្មានឆ្នាំចុងក្រោយនេះ ដោយកាលពីឆ្នាំ ២០១៩ ពេលលោកអតីតប្រធានាធិបតីអាមេរិក ដូណាល់ ត្រាំ បាននិយាយថា លោកចង់ទិញដែនដីកោះអាក់ទិក។
សំណើដែលចាត់ទុកជា «ទង្វើល្ងីល្ងើ» ដោយរដ្ឋាភិបាលដាណឺម៉ាក បានបង្កភាពតានតឹងផ្នែកនយោបាយ តែក៏បានបង្ហាញពីការចាប់អារម្មណ៍របស់អាមេរិកមកលើតំបន់នេះផងដែរ។
ដែនកោះក៏បានរងនូវឥទ្ធិពលបម្រែបម្រួលអាកាសធាតុជាមួយការកើនឡើងសីតុណ្ហភាពរហូតដល់រំលាយផ្ទាំងទឹកកក ដែលបង្កជាសញ្ញាអាសន្នចំពោះការហក់ឡើងនៃទឹកសមុទ្រ៕ AFP/HR