.jpg)
លោកយាយ អូលីវើរ ជាអ្នកមានអាជ្ញាប័ណ្ណនេសាទបង្កងដ៏ចំណាស់ជាងគេ។ AFP
ក្រុងរ៉ុកលែន៖ នៅក្នុងទូកឯនាយសមុទ្រភាគឦសានអាមេរិក ស្ត្រីវ័យ ១០១ ឆ្នាំ វីជីនា អូលីវើរ កាន់បង្កងធំៗយកខ្សែចងតង្កៀបយ៉ាងស្ទាត់ជំនាញដូចអ្វីដែលលោកយាយសក់សរូបនេះ បានធ្វើតាំងពីអាយុ ៧ ឆ្នាំ។
លោកយាយ អូលីវើរ ជាអ្នកមានអាជ្ញាប័ណ្ណនេសាទបង្កងដ៏ចំណាស់ជាងគេបំផុតនៅរដ្ឋ Maine និងមានចំណេះដឹងច្រើនពីប្រវត្តិសាស្ត្រទាក់ទងនឹងការនេសាទបង្កង។
អ្នកនេសាទវ័យជាង ១ សតវត្សរ៍រូបនេះ ចេញទូក ៣ ថ្ងៃ ក្នុង ១ សប្តាហ៍ ជាមួយកូនប្រុសអាយុ ៧៨ ឆ្នាំ ឈ្មោះ មេកស៍ ដែលជួយបើកទូក។
ដៃចាប់កាន់បង្កងសម្បកខ្មៅរលោង លោកយាយបាននិយាយថា៖ «ខ្ញុំនឹងធ្វើរឿងនេះ រហូតដល់ខ្ញុំស្លាប់»។
កើតនៅឆ្នាំ ១៩២០ លោកយាយ អូលីវើរ បានរស់នៅលើដងវិថីដដែលនៃក្រុងរ៉ុកលែន ពេញ ១ ជីវិត។
លោក ដេវីដ ឃូសេនស ជាអតីតប្រធានសមាគមបង្កងរដ្ឋ Maine បាននិយាយថា៖ «គាត់ពិតជាមនុស្សអស្ចារ្យ។ ខ្ញុំឃើញគាត់នេសាទបង្កងតាំងពីខ្ញុំដឹងក្ដីរហូតដល់សព្វថ្ងៃ»។
លោកយាយ អូលីវើរ ជាអ្នកមានអាជ្ញាប័ណ្ណនេសាទបង្កងដ៏ចំណាស់ជាងគេ។ AFP
នៅថ្ងៃត្រូវចេញទៅនេសាទ លោកយាយ អូលីវើរ ក្រោកពីដំណេកនៅម៉ោង ៣ កន្លះទៀបភ្លឺ ហើយចេញទូកនៅម៉ោង ៥ ព្រឹកព្រហាមមុនថ្ងៃរះ។
២ នាក់ម្ដាយកូនបើករថយន្តម៉ាកឆេវី ស៊េរីឆ្នាំ ១៩៥៦ ទៅកំពង់ផែ រួចបន្តចេញទូកទៅលើកទ្រុងបង្កង។
យាយ អូលីវើរ និងកូនប្រុស មេសក៍ មានទ្រុងរាយក្នុងទឹក ២០០-៣០០ ទ្រុង ត្រូវទាញឡើងមកយកបង្កង ដើម្បីវាស់វែងទំហំ និងចងតង្កៀបទុកដាក់យ៉ាងរៀបរយ។ ពាក់ស្រោមដៃកៅស៊ូ លោកយាយ អូលីវើរ ពិនិត្យមើលបង្កងថា តើវាធំល្មម សមនឹងទម្ងន់ស្របច្បាប់នេសាទ ឬនៅ មុននឹងទាញកៅស៊ូចងតង្កៀបវាយ៉ាងរៀបរយ។
ជួនកាល លោកយាយក៏ជួយបញ្ជាចង្កូតទូកលើផ្ទៃសមុទ្រ តែប្រសិនបើអាកាសធាតុចុះអ័ព្ទ អូលីវើរ មិនហ៊ានប្រថុយបើកបរផ្លូវទឹកទេ ដោយសារមិនទុកចិត្តក្រសែភ្នែកវ័យជរា។
ឃើញម្ដាយនៅសកម្ម និងរហ័សរហួនការងារនេសាទ លោក មេសក៍ បាននិយាយថា៖ «គាត់ចុះទូកគ្រប់ពេល។ គាត់មិនដែលឈប់ទេ ទោះហត់ប៉ុនណាក៏ដោយ»។
ទិន្នផលបង្កងរបស់ម្ដាយ និងកូនវ័យចំណាស់នេះ ត្រូវបាននាំយកទៅលក់នៅ Spruce Head Lobster Pound Co-Op ដែលជាកន្លែងហ៊ានផ្ដល់តម្លៃល្អសម្រាប់ការលក់បោះដុំដល់អ្នកទាំង ២។
មកដល់វេលាដ៏វែងឆ្ងាយនៃជីវិតអ្នកនេសាទបង្កង លោកយាយ អូលីវើរ មិនដែលឈប់ទាល់តែសោះ។
អ្នកនេសាទវ័យ ១០១ ឆ្នាំរូបនេះបានពោលថា៖ «ខ្ញុំធ្វើអ៊ីចឹង ព្រោះខ្ញុំមិនចង់នៅលើកៅអីរុញទេ»៕ AFP/HR
