ក្រុងម៉ុមបៃ៖ គ្រប់មុខម្ហូបទាំងអស់កាន់តែឆ្ងាញ់ពិសាជាមួយការបន្ថែមទឹកស៊ីអ៊ីវ សូម្បីតែបង្អែម។ នោះជាអ្វីដែលក្រុមហ៊ុនយក្សជប៉ុន Kikkoman រំពឹង ដោយសង្ឃឹមថានឹងទទួលបានការគាំទ្រពីពលរដ្ឋឥណ្ឌាចំពោះការប្រើប្រាស់ទឹកស៊ីអ៊ីវលើមុខម្ហូបការី បង្អែម និងគ្រប់ចានទាំងអស់។
ការបញ្ចុះបញ្ចូលពលរដ្ឋចំនួន ១,៣ពាន់លាននាក់ឱ្យបន្ថែមទឹកជ្រលក់ពណ៌ក្រម៉ៅទៅក្នុងមុខម្ហូបនៅអាស៊ីខាងកើតនេះមិនងាយស្រួលដូចបកចេកនោះទេ តែវាក៏មិនលំបាកដូចកាលពីទសវត្សរ៍ឆ្នាំ១៩៦០ ដែលយីហោនេះឈានជើងចូលទីផ្សារសហរដ្ឋអាមេរិកនោះទេ។
ហារី ហាគុយ កូសាតុ អ្នកតំណាងក្រុមហ៊ុន Kikkoman នៅឥណ្ឌា បានប្រាប់ AFP ថា៖ «ពេលយើងឈានជើងចូលទីផ្សារអាមេរិក ពលរដ្ឋគិតថា យើងលក់ទឹកផ្លែឈើដោយសារមានពណ៌ក្រហមឈាមជ្រូក»។
បច្ចុប្បន្ន ទឹកស៊ីអ៊ីវជប៉ុនមានវត្ដមាននៅក្នុងផ្ទះបាយអាមេរិកគ្រប់ៗផ្ទះ ដោយស្មើពាក់កណ្ដាលនៃចំណូលរបស់ក្រុមហ៊ុន គឺ ៤,៤ពាន់លានដុល្លារ ហើយ Kikkoman ពេលនេះ រំពឹងថានឹងទទួលបានជោគជ័យនៅឥណ្ឌាផងដែរ។
ការលក់ត្រូវបានជំរុញបន្ថែមដោយចំណូលចិត្ដរបស់ពលរដ្ឋបស្ចិមប្រទេសទៅលើអាហារជប៉ុនតាំងពីទសវត្សរ៍ឆ្នាំ១៩៨០ តែក្រុមហ៊ុនបង្កើតយុទ្ធសាស្ដ្រថ្មីសម្រាប់ទីផ្សារឥណ្ឌា ជាប្រទេសដែលពលរដ្ឋភាគច្រើនជាអ្នកទទួលទានបួស។
លោក កូសាតុ បានបន្ដថា៖ «វាមិនមែនមានន័យថាចង់ឱ្យមនុស្សគ្រប់រូបទទួលទានស៊ូស៊ីទាំងអស់នោះទេ។ យើងចង់ឱ្យទឹកស៊ីអ៊ីវរបស់យើងក្លាយជាគ្រឿងផ្សំមួយក្នុងផ្ទះបាយឥណ្ឌា»។
ម្ចាស់ភោជនីយដ្ឋាន ប្រាសាន់ អ៊ីសារ ដាក់វាយក្នុងម្ហូបប៊ីរីយ៉ានី កាលពី ៦ឆ្នាំមុន ខណៈដំណើរការភោជនីយដ្ឋានក្រុងម៉ុមបៃ Mirchi& Mimeដែលបង្ហាញវត្ដមានអាហារឥណ្ឌាសម័យថ្មី។
លោក អ៊ីសារ បានប្រាប់ AFP ថា៖ «ពេលខ្ញុំសាកល្បងប្រើទឹកស៊ីអ៊ីវជាមួយ គីម៉ា ផាវ វាពិតជាបង្កើតភាពភ្ញាក់ផ្អើលមែន។ វាជួយបង្កើនរសជាតិកាន់តែវិសេស។ វាបន្ថែមរសជាតិឆ្ងាញ់គ្មានដែនកំណត់ ដែលមិនអាចរកនៅកន្លែងណាផ្សេងបានឡើយ ដោយវាជារូបមន្ដសម្ងាត់ចំពោះមុខម្ហូបទូទៅ»៕ AFP/HR