ក្រុងប្រាក៖ ភាពយន្ដរឿង «As Far As I Can Walk» ដឹកនាំដោយផលិតករសែប៊ី ស្ដេហ្វាន អាសេនចេវីក បានឈ្នះពានរង្វាន់ Crystal Globe នៅមហោស្រពភាពយន្ដ Karlovy Vary Film Festival ក្នុងសាធារណរដ្ឋឆែក កាលពីថ្ងៃសៅរ៍ចុងសប្ដាហ៍កន្លងទៅនេះ។ នេះបើយោងតាមក្រុមអ្នករៀបចំ។
ភាពយន្ដសហផលិតដោយសែប៊ី និងបារាំង លុចសំប៊ួរ ប៊ុលហ្គារី និងលីទុយអានី បានរៀបរាប់អំពីដំណើររឿងរបស់ជនចំណាកស្រុកអាហ្វ្រិក ២ នាក់ នៅប្រទេសសែប៊ី។
អ្នកដឹកនាំរឿងអង់គ្លេសលោក មីហ្គែល កែរ បានទទួលពានរង្វាន់ Crystal Globe ចំពោះការលក់ដាច់ច្រើននៅទូទាំងពិភពលោកតាំងពីចាប់ផ្ដើមនៃមហោស្រពភាពយន្ដ ជាព្រឹត្ដិការណ៍ដ៏មានប្រជាប្រិយបំផុតនៅភាគកណ្ដាល និងភាគខាងកើតតំបន់អឺរ៉ុប។
តារាភាពយន្ដអាមេរិកលោក អេថាន ហាវកេ និងផលិតករឆែក ចាន់ ស្វារ៉ាក ដែលល្បីល្បាញចំពោះភាពយន្ដឈ្នះរង្វាន់អូស្កា «Kolya» ឆ្នាំ១៩៩៦ ក៏បានទទួលពានប្រភេទជាខ្សែភាពយន្តដែលទទួលបានការចែកចាយទៅកាន់រោងភាពយន្ដច្រើនក្នុងពិភពលោកផងដែរ។
មហោស្រពក៏ទទួលបានការចូលរួមពីតារាភាពយន្ដអាមេរិកលោក ចននី ឌេប គឺជាភ្ញៀវពិសេស ១ រូបទៀតនៅមហោស្រពរៀបចំឡើងចាប់ពីថ្ងៃទី ២០ ដល់ ២៨ ខែសីហា កន្លងទៅ។
ដោយពន្យារពេលពីខែកក្កដា រហូតដល់ខែសីហា ដោយសារតែវិបត្ដិកូវីដ ១៩ មហោស្រពនេះបានលក់សំបុត្រអស់ ១១១ ២០៣ សន្លឹក ដែលវាជាចំនួនច្រើនគួរសម តែក៏ជាតួលេខថយចុះ បើធៀបនឹងចំនួនការជាវកាលពីឆ្នាំ ២០១៩ ដោយលក់បានរហូតដល់ ១៤ ម៉ឺនសន្លឹក។
មហោស្រពភាពយន្តសាធារណរដ្ឋឆែក Karlovy Vary Film Festival ត្រូវបានលុបចោលកាលពីឆ្នាំមុន ដោយសារតែការផ្ទុះឡើងនូវវីរុសកូរ៉ូណាដ៏ធ្ងន់ធ្ងរ៕ AFP/HR