.jpg)
អ្នកយាមព្រះវិហារ Lausanne ស្រែកប្រាប់ម៉ោងវេលាដល់ពលរដ្ឋ។ AFP
ក្រុងហ្សឺណែវ៖ ធ្លាប់ជាភារកកិច្ចរបស់បុរសអស់រយៈពេលជាង ៦០០ ឆ្នាំ ជាលើកដំបូង ស្ដ្រីម្នាក់ត្រូវបានផ្ដល់មុខនាទីជាអ្នកស្រែកប្រាប់ពេលវេលារៀងរាល់មួយម៉ោងម្ដងនាពេលរាត្រីពីលើប៉មជួងព្រះវិហារកាតូលិក Lausanne។
ក្រុងស្វ៊ីសនេះ បានប្រកាសកាលពីថ្ងៃព្រហស្បតិ៍ថា កាសសាន់ត្រេ បេរដូស ចាប់ផ្ដើមធ្វើការងារជាជំនួយការអ្នកយាមកាមយប់នៅព្រះវិហារ Lausanne នៅថ្ងៃទី ១៦ ខែសីហា។
សេចក្ដីថ្លែងការណ៍បានបង្ហាញថា៖ «នេះជាលើកដំបូងដែលតួនាទីនេះ ត្រូវបានផ្ដល់ឱ្យស្ដ្រីជាអ្នកធ្វើ ដែលជួយថែរក្សាប្រពៃណីបន្សល់តាំងពីឆ្នាំ ១៤០៥ ក៏ដូចជាជួយអភិវឌ្ឍផងដែរ»។
អ្នកនាង បេរដូស ទំនងជាស្ដ្រីដំបូងបំផុតដែលត្រូវបានតែងតាំងឱ្យបំពេញកិច្ចការនេះប្រចាំនៅតំបន់អឺរ៉ុប។ ស្ដ្រីយាមយប់ថ្មីរូបនេះ បាននិយាយថា ខ្លួនពិតជារំភើបចំពោះភារកិច្ចថ្មីនេះ។
បុរសអ្នកយាមព្រះវិហារ Lausanne គោះជួងទម្ងន់ ៣៦០០គីឡូក្រាម។ AFP
អ្នកមានកំណើតកើតជាក្នុងទីក្រុង Lausanne រូបនេះ បានឱ្យដឹងថា៖ «តាមដែលខ្ញុំអាចនៅចាំបាន ប្រពៃណីនេះធ្វើឱ្យខ្ញុំចូលចិត្ដយ៉ាងខ្លាំង ហើយខ្ញុំតែងតែមានបំណងចង់ធ្វើជានារីយាមយប់»។
អ្នកនាងចូលរួមជាមួយក្រុមការងារជាបុរសៗ ដែលតែងតែឡើងប៉មជួងព្រះវិហាររៀងរាល់រាត្រីអស់រយៈពេល ៦១៦ ឆ្នាំ។ ពេញមួយឆ្នាំៗ ចាប់ពីម៉ោង ១០ យប់ដល់ម៉ោង ២ ទៀបភ្លឺ អ្នកយាមយប់ ពាក់មួកខ្មៅធំ និងកាន់ចង្កៀង ដើរឆ្ពោះទៅកាន់ជួងព្រះវិហារបំពេញភារកិច្ចជាអ្នកប្រាប់ម៉ោងពេលដល់ពលរដ្ឋទីក្រុងដ៏ស្រស់ត្រកាលនៅក្បែរបឹង ហ្សឺណែវ។
លើកលែងតែជំនួសម្ដងកាល ស្ដ្រីមិនដែលកាន់មុខតំណែងនេះឡើយ។ នេះបើយោងតាមសេចក្ដីថ្លែងការណ៍ខាងលើ ដែលដកស្រង់ព័ត៌មានពីអ្នកយាមរាត្រីលើឈូងសមុទ្រអឺរ៉ុប។
ប្រភពដដែលបានបន្ដថា៖ «ព្រះវិហារ Lausanne ជាទីកន្លែងមានប្រជាប្រិយមួយក្នុងតំបន់»៕ AFP/HR
ទិដ្ឋភាពព្រះវិហារ Lausanne ដែលបន្ដប្រពៃណីរាប់រយឆ្នាំដោយការគោះជួងប្រាប់ម៉ោងពលរដ្ឋ។ AFP
