.jpg)
លោក រ៉ូបឺត ថៃល័រ ដែលមានម្ដាយ បងស្រី ភរិយា និងក្មួយរបស់លោក កើតជំងឺមហារីក។ AFP
ក្រុងញូវយ៉ក៖ រណ្ដៅធំៗ ផ្សែងខ្មួលខ្មាញ់ និងអាងទឹកពណ៌ត្នោតស្ថិតនៅប្របតាមបណ្ដោយឯត្រើយម្ខាងនៃទន្លេមីសស៊ីសស៊ីពពី ក្នុងរដ្ឋ Louisiana ជាទីដែលរោងចក្រស្លប្រេង និងសារធាតុសំយោគពីប្រេង ប្រតិបត្ដិការចាក់ឫសគល់ជាងពីរទសវត្សរ៍។ សូមស្វាគមន៍មកកាន់ «ជ្រលងមហារីក»។
ការបំពុលបរិស្ថានក្នុងវិស័យឧស្សាហកម្មលើសណ្ឋានដីបែបជ្រលងរវាងទីក្រុងញួវអុលែនស៍ និងបានក្រុងបាតុន រូ បានធ្វើឱ្យពលរដ្ឋអាហ្វ្រិក-អាមេរិក ប្រឈមហានិភ័យនៃការអភិវឌ្ឍទៅជាជំងឺមហារីករហូតដល់ជិត ៥០ ដង លើសពលរដ្ឋទូទៅ។ នេះបើយោងតាមទីភ្នាក់ងារការពារបរិស្ថានអាមេរិក (EPA) បានឱ្យដឹងដូច្នេះ។
រយៈពេលជាច្រើនឆ្នាំ ក្រុមសកម្មជន ដែលបានហៅជ្រលងលាតសន្ធឹងប្រវែង ១៤០ គីឡូម៉ែត្រ ជាជ្រលងមហារីក បាននិងកំពុងតែប្រយុទ្ធប្រឆាំងក្នុងការសម្អាតបរិស្ថានក្នុងតំបន់។
កាលពីនិទាឃរដូវឆ្នាំមុន ជ្រលងមហារីកចាប់ផ្ដើមឡើងទំព័រមុខតាមបណ្ដាសារព័ត៌មាននូវភាពខុសប្លែកពីគេរបស់វានោះគឺអត្រាស្លាប់ដោយសារជំងឺកូវីដខ្ពស់បំផុតក្នុងប្រទេស។
លោក ប៊ីរ៉ុន (រូបឆ្វេង) និងលោក អង់ហ្គេឡូ បេរណាដ ជាបងប្អូននឹងគ្នា ឈរមុខផ្ទះនៅរដ្ឋ Louisiana។ AFP
រ៉ូបឺត ថៃល័រ អាយុ ៧៩ ឆ្នាំ ជាគ្រឹស្ដបរិស័ទ St John''s the Baptist បាននិយាយថា៖ «វាលាតសន្ធឹងកាត់សហគមន៍នេះ។ អ្នកស្រុកមានការភ័យខ្លាចមែនទែន»។
កាលពីខែមេសា ឆ្នាំ ២០២០ ពេលមានអត្រាឆ្លងខ្ពស់បំផុតក្នុងរលកទីមួយ មនុស្ស ៣នាក់បានស្លាប់រៀងរាល់ថ្ងៃក្នុងសហគមន៍ ដែលមានពលរដ្ឋរស់នៅ ៤៣ ០០០ នាក់។
អង់ហ្គេឡូ បេណាដ អាយុ ៦០ ឆ្នាំ ដែលធ្វើការនៅរោងចក្រចម្រាញ់ប្រេង ម៉ារ៉ាតុន បាននិយាយថា៖ «នៅ Reserve យើងទាំងអស់គ្នាធ្លាប់រួមសុខរួមទុក្ខជាមួយគ្នាគ្រប់ពេលវេលា។ ឥឡូវ លែងមានឱកាសទៀតហើយ។ ខ្ញុំមិនសូវចេញក្រៅដូចមុនទេ»។
តាំងពីពេលនោះ សមាជិកគ្រឹស្ដបរិស័ទម្នាក់ចំណោម ៨នាក់បានឆ្លងវីរុស។ វីរុសបំប្លែងខ្លួន ដែលតា ធ្វើឱ្យស្ថានភាពកាន់តែអាក្រក់ ដោយអត្រាឆ្លងបានហក់ឡើងខ្លាំងអំឡុងពេលប៉ុន្មានសប្ដាហ៍ចុងក្រោយនេះ។
ពលរដ្ឋរស់នៅជ្រលងមហារីក ប្រឈមនឹងអត្រាជំងឺមរណៈ និងបន្ថែមដោយហានិភ័យជំងឺកូវីដ។ AFP
ពលរដ្ឋម្នាក់ទៀត រ៉ូប៊ឺត ម៉រ បានបន្ដថា៖ «ពេលមានវ៉ាក់សាំងមកដល់ជាលើកដំបូង លោកដឹងទេ យើងនឹកស្មានថា វាជួយយើងច្រើន តែយើងគិតខុសហើយ»។
ពេល ថៃល័រ បានឮអំពីរឿងរ៉ាវនេះ លោកមានការភ្ញាក់ផ្អើលតូចតួច។ អតីតកម្មករសំណង់រូបនេះតែងតែងឿងឆ្ងល់ថា តើហេតុអ្វីជំងឺមហារីក ដែលកើតឡើងម្ដាយ បងស្រី ភរិយា និងក្មួយរបស់លោក រាតត្បាតខ្លាំងនៅក្នុងទីប្រជុំជននេះ។
អង្គការសហប្រជាជាតិ ក៏បានចាប់អារម្មណ៍ចំពោះវិបត្ដិនៅតំបន់នេះ ដោយបានចេញរបាយការណ៍មួយកាលពីដើមឆ្នាំ ដែលប្រកាស «ចលនាយុត្ដិធម៌បរិស្ថាន» ក្នុងតំបន់។
សម្រាប់ពលរដ្ឋដូចលោក អង់ហ្គេឡូ បេណាដ ការចាប់អារម្មណ៍លើសហគមន៍លោកនាប៉ុន្មានខែចុងក្រោយនេះ គឺជាឱកាសសម្រាប់ប្រទេសក្នុងការដោះស្រាយបញ្ហាមួយចំនួន មិនថា ជាបញ្ហាជាតិសាសន៍ ឬជំនឿជំទាស់នឹងការចាក់វ៉ាក់សាំង និងវិធានការកូវីដផ្សេងៗទៀត។
លោកបានប្រាប់ AFP ថា៖ «អស់លោកដឹងទេ ព្រះជាម្ចាស់ឱ្យហេតុការណ៍នេះកើតឡើងដោយមានហេតុផលច្បាស់ណាស់។ យើងត្រូវរិះរកវិធីដោះស្រាយដោយត្រឹមត្រូវ និងកៀរគរពលរដ្ឋទៅចាក់វ៉ាក់សាំង»៕ AFP/HR
អង្គការសហប្រជាជាតិ ក៏បានចាប់អារម្មណ៍ចំពោះវិបត្ដិបំពុលបរិស្ថាន និងសុខភាពនៅតំបន់នេះ។ AFP
