.jpg)
ខ្លាពូម៉ាទម្ងន់ជាង ៣៦ គីឡូក្រាម ត្រូវបានរឹបអូសពីម្ចាស់នៅក្រុងញូវយ៉ក។ រូបថត AFP
ក្រុងញូវយ៉ក៖ អាជ្ញាធរបានរឹបអូសខ្លាពូម៉ាទម្ងន់ជាង ៣៦ គីឡូក្រាម ពីអាផាមិនមួយនៅទីក្រុងញូវយ៉ក។
មន្ត្រីនិយាយថា កូនខ្លាពូម៉ានេះមានអាយុ ១១ ខែ ឈ្មោះ សាសា បានរស់នៅក្នុងផ្ទះមួយក្នុងតំបន់ Bronx។
កូនខ្លាញីត្រូវបានសង្គ្រោះកាលពីសប្តាហ៍មុននៅក្នុងប្រតិបត្តិការរួមគ្នាដោយប៉ូលិស និងអង្គការសង្គមមនុស្សធម៌អាមេរិក មន្ត្រីសាលាក្រុង និងបុគ្គលិកសួនសត្វ Bronx។
សេចក្តីថ្លែងការណ៍បានបង្ហាញថា ម្ចាស់ខ្លាពូម៉ាបានចូលខ្លួន ហើយប្រគល់វា អំឡុងពេលធ្វើប្រតិបត្តិការដកហូតយកសត្វព្រៃនោះមកវិញ។
សត្វខ្លាពូម៉ា ត្រូវបានគេនាំទៅសួនសត្វ Bronx ដែលជាកន្លែងពេទ្យសត្វបានពិនិត្យសុខភាព និងមើលថែវាកាលពីចុងសប្តាហ៍។
បន្ទាប់មក ខ្លាពូម៉ា សាសា ត្រូវបានគេបញ្ជូនទៅជម្រកសត្វ Turpentine Creek ក្នុងរដ្ឋអាខេនសាស់ ជាកន្លែងមើលថែសត្វត្រូវបានគេបោះបង់។
អ្នកស្រី ឃែលលី ដូនីថាន នាយកទទួលបន្ទុកគ្រោះមហន្តរាយសត្វរបស់អង្គការ Humane បាននិយាយថា៖ «ខ្លាពូម៉ានេះសំណាងគួរសមដែលម្ចាស់របស់វាស្គាល់ថា វាជាសត្វព្រៃមិនសមនឹងរស់នៅក្នុងអាផាតមិន ឬបរិយាកាសក្នុងស្រុកណាមួយ»។
អ្នកស្រីបានបន្ថែមថា៖ «ទឹកភ្នែករបស់ម្ចាស់វា និងសំឡេងខ្លាពូម៉ាសម្ដែងពីអារម្មណ៍ជ្រួលច្រាល់របស់វា គឺជាទិដ្ឋភាពនៅពេលដែលយើងនាំវាចេញពីផ្ទះ ដោយពុំដឹងថា តើវាមកដល់ទីក្រុងតាមរយៈការជួញដូរបែបណា? អ្វីដែលយើងត្រូវដឹងនោះ គឺសត្វព្រៃមានគ្រប់ទីកន្លែងក្រៅពីជម្រកដ៏ស័ក្ដិសមរបស់វា គឺព្រៃ»។
មន្ត្រីប៉ូលិស ឌើរមុត ស៊ា បាននិយាយថា ករណីនេះកំពុងស្ថិតក្រោមការស៊ើបអង្កេត ដោយសារមិនមានព័ត៌មានបន្ថែមពីម្ចាស់របស់វា។
កាលពីឆ្នាំ ២០០៣ ប៉ូលិសបានរឹបអូសសត្វខ្លាពេញវ័យទម្ងន់ ១៩៣ គីឡូក្រាម និងឆ្នាំ ២០០៤ មានករណី ខ្លាខាំក្មេង ៨ ឆ្នាំ ដែលខ្លានោះចិញ្ចឹមដោយឪពុករបស់ក្មេង៕ AFP/HR
