ក្រុងប៉ារីស៖ ពេល OnlyFans បានប្រកាសគម្រោងហាមឃាត់មាតិកាសិច វាអាចមានជោគវាសនាស្រដៀងគ្នាដូចនឹងវេបសាយដទៃ ដែលបាត់បង់អ្នកមើលជាច្រើន។
OnlyFans ជាវេបសាយដែលមានអ្នកប្រើប្រាស់ ១៥០ លាននាក់ ភាគច្រើនចូលរួមដោយសារមាតិកាសិច ដែលអ្នកផលិតមាតិកាលក់ផលិតផលរបស់ខ្លួនដោយផ្ទាល់។
តាំងពីដាក់ដំណើរការឆ្នាំ ២០១៦ OnlyFans បានចំណាយប្រាក់ជាង ៤,៥ ពាន់លានដុល្លារ ដល់អ្នកផលិតមាតិកា ដែលរួមទាំងតារាល្បីៗ ដូចជា តារារ៉េប ខាឌី ប៊ី និងតួកុនសិចជាច្រើនទៀត តែក៏មានសិស្ស និស្សិត និងមនុស្សចាស់ ដែលស្វែងរកប្រាក់ចំណូលផងដែរ។
ដូច្នេះ តើក្រុមហ៊ុននេះសម្លាប់ខ្លួនឯងដោយការបញ្ឈប់នូវអ្វីដែលជាផលិតផលពេញនិយមរបស់ខ្លួន?
ស្កាឡេត វូដហ្វដ ជាអ្នកវិភាគនៅវិទ្យាស្ថានជូនីភើ ដែលបានចុះផ្សាយការសិក្សាស្ដីពីអនាគតឧស្សាហកម្មកម្សាន្ដផ្លូវភេទឌីជីថល បាននិយាយថា៖ «នេះជាវិធានការដ៏ប្រថុយប្រថានពីសំណាក់ OnlyFans ដែលគិតគូរចំពោះប្រាក់ចំណូល ទទួលបានពីអ្នកផលិតមាតិកាអាសអាភាស»។
វេបសាយមូលដ្ឋាននៅទីក្រុងឡុងដ៍ ដែលទទួលបានចំណូល ២០ ភាគរយ កាត់ពីអ្នកផលិតមាតិកា តែត្រូវទទួលសម្ពាធពីធនាគារ និងវិនិយោគិនចំពោះការសម្រេចចិត្ដនេះ។
វាមិនមែនជាលើកដំបូងដែលក្រុមហ៊ុនហិរញ្ញវត្ថុទាំងនេះរងនូវការស្ដីបន្ទោសចំពោះអ្វីដែលក្រុមអ្នករិះគន់និយាយថា ជាការបង្ក្រាបដោយមិនត្រឹមត្រូវលើមាតិកាសិច នាំឱ្យអ្នករកស៊ីផ្លូវភេទជាច្រើន ដែលប្រើប្រាស់វេបសាយរកភាពជោគជ័យ កាលពីមុន ត្រូវអស់អាជីព។
OnlyFans មិនទាន់បានបញ្ជាក់មាតិកាអ្វីខ្លះដែលខ្លួននឹងហាមឃាត់ក្រោមគោលការណ៍ថ្មីចាប់ពីខែតុលា តែក្រុមហ៊ុននេះបានឱ្យដឹងថា រូបភាពអាក្រាតនៅអាចបន្ដអនុញ្ញាត។
ការហាមឃាត់ «មាតិកាសិចច្បាស់ៗ» អាចនឹងវាយបំបែកឆ្នាំងបាយរបស់អ្នករកស៊ីផ្លូវភេទរាប់ម៉ឺននាក់ ដែលទទួលបានចំណូល និងសុវត្ថិភាពការងារពីវេបសាយនេះ។
វិចិត្រករនៅរដ្ឋតិចសាស់ ប្រ៊ីយ៉ា គ្រេដនី មិនអាចឈរជើងនៅលើវេបសាយ OnlyFans លើសពី ១ សប្ដាហ៍ ព្រោះមាតិកាគំនូរមិនអាចជ្រៀតចូលមាតិកាក្ដៅសាច់។
នាងនិយាយថា៖ «មហាជននៅលើនេះមិនចាប់អារម្មណ៍នឹងគំនូរដើមឈើទេ បើមិនយល់សាររបស់ខ្ញុំ»។
ប៉ុន្ដែ OnlyFans នៅតែបន្ដគាំទ្រអ្នកផលិតមាតិកាជាច្រើនទៀត ចាប់ពីតារាចម្រៀងរហូតដល់គ្រូបង្វឹកកាយសម្ព័ន្ធ។ ក្នុងនោះអ្នកលេងហ្វេសសិនមកពីក្រុងតូរ៉ូនតូ បាបារ៉ា អាឡេកស៍ ក៏គ្មានបំណងចូលរួមនោះដែរ រហូតដល់ OnlyFans បញ្ចុះបញ្ចូលអ្នកនាងបង្កើតទំព័រមួយជាថ្នូរនឹងការផ្សព្វផ្សាយឥតគិតថ្លៃ។
អ្នកនាងនិយាយថា៖ «ខ្ញុំទទួលហ្វេនជាច្រើន ដោយពួកគេមិនចាំបាច់ចូលមើលលើអ៊ីនស្ដាក្រាម និង TikTok របស់ខ្ញុំឡើយ។ ពួកគេអាចទទួលបានមាតិកាដ៏មានគុណភាពនាពេលអនាគតផងដែរ»៕ AFP/HR