.jpg)
វិធីកែច្នៃទឹកកខ្វក់ដើម្បីប្រើឡើងវិញ មានតម្លៃថោកជាងការច្នៃទឹកសមុទ្រ។ រូបថត AFP
ក្រុងប៉ារីស៖ តើអ្នកហ៊ានប្រើទឹកពីក្បាលរ៉ូប៊ីណេដែលមានប្រភពពីលូទេ? ការសម្អាតទឹកពីកាកសំណល់ ហើយបង្វែរទៅប្រព័ន្ធចែកចាយប្រើឡើងវិញ គឺជាជ្រើសដ៏ប្រសើរបំផុតតបតនឹងវិបត្តិកង្វះទឹកស្អាតទូទាំងពិភពលោក។ នេះបើយោងតាមអង្គការសហប្រជាជាតិ ទោះបីជាការអនុវត្តនេះអាចធ្វើឱ្យមហាជនខ្ពើមរអើម ឬញញើតនឹងប្រើក្ដី។
ពិភពលោកកាន់តែរងសម្ពាធក្នុងការពន្លឿនការកែច្នៃទឹកកខ្វក់ប្រើប្រាស់ឡើងវិញ ដើម្បីឆ្លើយតបនឹងតម្រូវការកំណើនប្រជាជន និងការប្រែប្រួលនៃអាកាសធាតុ។
លោក រីឆាត ខូន័រ និពន្ធនាយករបាយការណ៍ចុះផ្សាយដោយអង្គការយូណេស្កូបានប្រាប់ AFP ថា៖ «ការកែច្នៃទឹកកខ្វក់ឱ្យស្អាតដើម្បីប្រើឡើងវិញ នឹងកាន់តែមានទំហំច្រើន ដោយសារតែពុំមានជម្រើស»។
រដ្ឋធានីនៅណាមីប៊ី បានឈានមុខគេក្នុងការប្រែក្លាយទឹកកាកសំណល់ទៅជាទឹកប្រើប្រាស់ឡើងវិញតាំងពីឆ្នាំ ១៩៦០ ខណៈសិង្ហបុរីក៏សង្វាតបង្កើនកន្លែងកែច្នៃស្ដុកទឹកស្អាត។
នៅភាគខាងត្បូងប្រទេសបារាំង គម្រោងកែច្នៃទឹកកខ្វក់ប្រើប្រាស់ឡើងវិញ ត្រូវបានប្រើប្រាស់ក្នុងវិស័យឧស្សាហកម្ម ការលាងសម្អាតថ្នល់ទីក្រុង និងស្ថានីយថាមពល។
គម្រោងនៅភាគខាងត្បូងបារាំង បានប្រើប្រាស់ទឹកក្នុងវិស័យកសិកម្ម។ រូបថត AFP
មានជម្រើស ២ ក្នុងការកែច្នៃទឹកប្រើឡើងវិញ គឺទី១ ការសម្លាប់មេរោគរួចលាយជាមួយទឹកសាបនៅខាងលើអាងស្ដុក ឬក៏ចម្រោះក្រោមដីមុននឹងបញ្ជូនវាទៅសម្លាប់មេរោគរួចចែកចាយ។ ជម្រើសទី២ ដែលពុំសូវត្រូវបានប្រើប្រាស់ គឺការយកទឹកកខ្វក់មកច្រោះបន្សុទ្ធហើយបញ្ជូនទៅប្រព័ន្ធចែកចាយផ្ទាល់តែម្ដង។
លោក ខូន័រ បានទទូចថា ការកែច្នៃទឹកកខ្វក់ប្រើប្រាស់ឡើងវិញ ចំណាយអស់តិចជាងការបន្សាបទឹកសមុទ្រយកមកប្រើប្រាស់ទៅទៀត។
គួរឱ្យសោកស្ដាយ ទឹកដែលប្រើរួច ៨០ ភាគរយត្រូវបានបង្ហូរទៅបរិស្ថានវិញ ដោយពុំមានការសម្អាតជាតិពុល ជាពិសេសនៅប្រទេសក្រីក្រ។ នេះបើយោងតាមរបាយការណ៍ឆ្នាំ ២០១៧ របស់អង្គការសហប្រជាជាតិ។
លោក ខូន័រ បានទទូចថា កត្តាខ្ពើមរអើមនឹងទឹកកែច្នៃ ពុំគួរមានឡើយ ដោយសារតែអវកាសយានិកនៅស្ថានីយអវកាសអន្តរជាតិក៏ប្រើទឹកដែលកែច្នៃពីតំណក់ញើស និងទឹកនោមខ្លួនប្រើប្រាស់ឡើងវិញដែរ។
លោកបានបញ្ជាក់ថា៖ «អត់មានអវកាសយានិកណាម្នាក់ឈឺ ដោយសារតែការប្រើប្រាស់ទឹកកែច្នៃពីកាកសំណល់នោះទេ»៕ AFP/HR
