ក្រុងមូស្គូ៖ សារមន្ទីរហ៊ើមីថេច រុស្ស៊ី ជាទីកន្លែងរក្សាទុកវត្ថុសិល្បៈធំបំផុតក្នុងពិភពលោក បានប្រកាសកាលពីថ្ងៃអង្គារថា ខ្លួននឹងលក់វត្ថុសិល្បៈជាច្រើន រួមទាំង ស្នាដៃរបស់វិចិត្រករ ឡេអូណាដូ ដា វ៉ាំងស៊ី ក្នុងទម្រង់បច្ចេកវិទ្យាឌីជីថល (NFT)។
សារមន្ទីរនៅក្រុងសេនត៍ ភើតធើរប៊ើក ដែលសហការជាមួយ Binance NFT នឹងធ្វើការដាក់លក់ដេញថ្លៃចាប់ផ្ដើមពីថ្ងៃអង្គារ រហូតដល់ថ្ងៃទី ៧ ខែកញ្ញា។ នេះបើយោងតាមសេចក្ដីថ្លែងការណ៍របស់សារមន្ទីរហ៊ើមីថេច។
NFT ជាវត្ថុឌីជីថលភ្ជាប់ជាមួយវិញ្ញាបនបត្រពីភាពត្រឹមត្រូវតាមផ្លូវច្បាប់ បង្កើតឡើងដោយបច្ចេកវិទ្យាប្លុកឆែន ដែលស្គាល់ជារូបិយបណ្ណ crypto។ វាមិនត្រូវបានធ្វើក្លែងក្លាយ ឬលួចនោះទេ។
រយៈពេលជាច្រើនឆ្នាំមកនេះ NFT កាន់តែទទួលបានភាពពេញនិយមដោយក្រុមអ្នកប្រមូលវត្ថុសិល្បៈ ដោយស្នាដៃខ្លះអាចលក់ក្នុងតម្លៃរាប់លានដុល្លារ។
សារមន្ទីរហ៊ើមីថេច នឹងដាក់បង្ហាញវត្ថុសិល្បៈមួយចំនួនលើបច្ចេកវិទ្យា NFT រួមទាំងស្នាដៃចម្លងម៉ាដូណា លីតតា របស់វិចិត្រករ ឡេអូណាដូ ដា វ៉ាំងស៊ី ក៏ដូចជា វីនសិន វ៉ាន់ហ្គច វិចិត្រករ ក្លដ ម៉ុនណេត និង វ៉ាស៊ីលី ខានឌីនស្គី។
តម្លៃស្នាដៃសិល្បៈនីមួយៗត្រូវបានកំណត់ចាប់ពី ១ ម៉ឺនដុល្លារប៊ីណាន់ ជារូបិយបណ្ណ crypto យកតាមលំនាំរូបិយបណ្ណដុល្លារអាមេរិក។ ប្រាក់ចំណូលពីការលក់ទាំងអស់នឹងដាក់ជាសម្បត្ដិរបស់សារមន្ទីរ។
វត្ថុសិល្បៈឌីជីថល NFT នីមួយៗនឹងដាក់ចេញជាពីរចំណែក ដោយមួយទុកនៅសារមន្ទីរ និងមួយទៀតប្រគល់ជូនអតិថិជន។ ទិន្នន័យធំរបស់ NFT នឹងរួមបញ្ចូលទាំងហត្ថលេខានាយកសារមន្ទីរ Hermitage លោក Mikhail Piotrovsky។
លោកបានឱ្យដឹងក្នុងសេចក្ដីថ្លែងការណ៍ថា៖ «សារមន្ទីរហ៊ើមីថេច គឺជាអ្នកច្នៃបង្កើតដ៏អភិរក្ស និងសារមន្ទីរដ៏អភិរក្ស ដែលប្រើប្រាស់បច្ចេកវិទ្យាចុងក្រោយបំផុត»។
បង្កើតឡើងក្នុងឆ្នាំ ១៧៦៤ និងជាអតីតរាជវាំងរដូវរងារបស់រាជវង្សរុស្ស៊ី សារមន្ទីរ Hermitage ជាកន្លែងរក្សាស្នាដៃសិល្បៈជាង ៣លានផ្ទាំង»៕ AFP/HR