ក្រុងប៊ែរឡាំង៖ ខ្សែប្រយុទ្ធកណ្ដាលក្រុមតោខៀវ Chelsea លោក Kai Havertz បាននិយាយកាលពីថ្ងៃពុធថា លោកបានរៃអង្គាសប្រាក់ជិត ៤០ ម៉ឺនអឺរ៉ូ (១,៩ ពាន់លានរៀល) សម្រាប់ជួយជនរងគ្រោះទឹកជំនន់នៅភាគខាងលិចប្រទេសអាល្លឺម៉ង់ និងបានឱ្យដឹងថា លោកបានជួយសង្គ្រោះសេះតឿផូនី និងលាពីទីសត្ដឃាតថែមទៀត។
លោក Havertz អាយុ ២២ ឆ្នាំ មកពីក្រុង Aachen ជាតំបន់រងគ្រោះធ្ងន់ធ្ងរមួយដោយគ្រោះធម្មជាតិទឹកភ្លៀងនៅពាក់កណ្ដាលខែកក្កដា ដែលយ៉ាងតិចធ្វើឱ្យមនុស្ស ១៩០ នាក់ បាត់បង់ជីវិត។
កីឡាករខ្សែប្រយុទ្ធអាល្លឺម៉់ង់ ដែលបានរកគ្រាប់បាល់ជ័យជម្នះ Champions League រដូវកាលមុន បានដាក់លក់ដេញថ្លៃនូវស្បែកជើង ១០០ គូ ដើម្បីរៃអង្គាសប្រាក់មូលនិធិជួយជនរងគ្រោះដោយសារទឹកជំនន់។
លោកបានប្រាប់អ្នកសារព័ត៌មានថា៖ «ទង្វើមនុស្សធម៌នេះធ្វើឱ្យសប្បាយរីករាយ។ ហេតុការណ៍នេះប៉ះពាល់យ៉ាងខ្លាំងដល់រូបខ្ញុំដោយសារវាកើតឡើងនៅក្បែរគ្រួសារខ្ញុំរស់នៅបំផុត។ មនុស្សជាច្រើនបានបាត់បង់អ្វីៗគ្រប់យ៉ាង និងលែងមានផ្ទះសម្បែងជ្រកទៀតហើយ»។
លោកបានរៃអង្គាសប្រាក់មូលនិធិដោយសហការជាមួយកាកបាទក្រហមអាល្លឺម៉ង់ ដើម្បីធានាថា ជំនួយទាំងនោះបានទៅដល់ដៃជនរងគ្រោះផ្ទាល់។
Havertz ក៏បារម្ភពីសុខុមាលភាពសត្វ និងបានសង្គ្រោះសត្វ ដែលត្រៀមយកទៅទីសត្ដឃាតផងដែរ។
លោកបានបន្ថែមថា៖ «ខ្ញុំមានកាន់តែរីករាយដោយបានសង្គ្រោះសត្វលា សេះ ឬសេះតឿផូនី។ មានលា ៤ ក្បាលនៅផ្ទះគ្រួសារខ្ញុំនាពេលនេះ»៕ AFP/HR