ក្រុងប៉ារីស៖ ក្រុមហ៊ុនដេញថ្លៃក្រុងប៉ារីសមួយនឹងដាក់លក់គំរូគ្រោងឆ្អឹងដាយណូស័រត្រាយសើរ៉ាថប់ ឬហៅថា «Big John» ជាមួយនឹងការតាំងបង្ហាញដល់សាធារណជនជាមុន។ នេះបើយោងតាមក្រុមអ្នករៀបចំព្រឹត្ដិការណ៍លក់ដេញថ្លៃបានឱ្យដឹងនៅថ្ងៃអង្គារ។
ដាយណូស័រ ត្រាយសើរ៉ាថប់ស្ថិតក្នុងចំណោមដាយណូស័រងាយសម្គាល់ច្បាស់បំផុតដោយសារតែកុយ ៣ នៅលើក្បាលរបស់វា ដោយមួយស្ថិតនៅលើលើច្រមុះ និងពីរទៀតនៅលើថ្ងាស ដែលធ្វើឱ្យវាមានឈ្មោះតាមភាសាឡាទីនបែបនេះ។
វានឹងត្រូវបានដាក់តាំងបង្ហាញចាប់ពីថ្ងទី ១៨ ខែតុលា នៅក្រុមហ៊ុនដេញថ្លៃ Drouot ក្នុងក្រុងប៉ារីស ជាទីដែលវានឹងត្រូវបានរៀបចំដោយក្រុមអ្នកជំនាញ មកពី Giquello នៅថ្ងៃទី ២១ ខែតុលា។
វាត្រូវបានប៉ាន់ប្រមាណថា នឹងមានតម្លៃចន្លោះពី ១,២ ទៅ ១,៥ លានអឺរ៉ូ (១,៤ ទៅ ១,៨ លានដុល្លារ) ថ្វីដ្បិតតែការលក់ដេញថ្លៃដាយណូស័រនេះមិនត្រូវបានដឹងច្បាស់កន្លងមកយ៉ាងណាក៏ដោយ។
លោក Alexandre Giquello មកពីក្រុមហ៊ុនដេញថ្លៃ Giquello បាននិយាយថា ដាយណូស័រមានវិញ្ញាបនបត្រនាំចេញ និងមានអតិថិជនសក្ដានុពលមួយចំនួន។
ឆ្អឹងលលាដ៍ទំហំ ២ ម៉ែត្រ កម្ទេចឆ្អឹង និងស្នែងធំៗប្រមាណ ២០០ បំណែក ត្រូវបានដាក់ផ្គុំកាលពីថ្ងៃអង្គារនៅខាងបង្អួចនៃវិចិត្រសាលពិព័រណ៍ Drouot ភាគកណ្ដាលក្រុងប៉ារីស។
អម្បូរដាយណូស័រដែលមានសេសសល់គ្រោងឆ្អឹងជាង ៦០ ភាគរយ និងឆ្អឹងលលាដ៍ ៧៥ ភាគរយដ៏វិសេស Big John ត្រូវបានរកឃើញក្នុងឆ្នាំ ២០១៤ នៃរដ្ឋសោតដាកូតា សហរដ្ឋអាមេរិក ដោយភូមិសាស្ដ្រវិទូ វ៉ាល់ធ័រ ដាបាយូ ស្ទែនប៊ីល។ ការតម្លើងគ្រោងឆ្អឹងទាំងនេះត្រូវបានធ្វើឡើងនៅទីក្រុងTrieste ប្រទេសអ៊ីតាលី។
ការដាក់លក់ចេញថ្លៃនេះត្រូវបានធ្វើឡើងចំពេលទីផ្សារឆ្អឹងដាយណូស័រកំពុងតែពេញនិយម ជាមួយតម្លៃហក់ឡើងខ្ពស់ផុតកំណត់ត្រា ដែលធ្វើឱ្យសារមន្ទីររដ្ឋ និងមជ្ឈមណ្ឌលស្រាវជ្រាវនានមិនអាចប្រជែងឈ្នះក្រុមហ៊ុនឯកជនឡើយ។
កាលពីខែតុលា ឆ្នាំមុន ឆ្អឹងដាយណូស័រ អាល់ឡូសូរ៉ាស ដ៏កម្រ ជាពពួកសត្វដាយណូស័រដ៏ចំណាស់បំផុតមួយ ត្រូវបានដាក់លក់ដេញថ្លៃក្នុងក្រុងប៉ារីស ឱ្យអតិថិជនមិនបង្ហាញអត្ដសញ្ញាណម្នាក់ក្នុងតម្លៃជាង ៣លានអឺរ៉ូ ដែលលើសតម្លៃប៉ាន់ប្រមាណ ២ ដងឯនោះ។
កាលពីប៉ុន្មានសប្ដាហ៍មុន ឆ្អឹងទីរ៉េក អាយុកាល ៦៧ ឆ្នាំ ត្រូវបានដាក់លក់ក្នុងទីក្រុងញូវយ៉ក ក្នុងតម្លៃ ៣១,៨ លានដុល្លារ ដែលបំបែកកំណត់ត្រាចំពោះការលក់ដាយណូស័រ និងលើសតម្លៃប៉ាន់ស្មានត្រឹមតែចន្លោះពី ៦ ទៅ ៨ លានដុល្លារ។
យ៉ាងណាមិញ ក្នុងឆ្នាំ ២០២០ ដាយណូស័រជាច្រើនដែលដាក់លក់ក្នុងទីក្រុងប៉ារីស មិនអាចរកម្ចាស់ថ្មីដោយសារអតិថិជនឱ្យតម្លៃទាបជាងការគ្រោងទុក៕ AFP/HR