ក្រុងតូក្យូ៖ ចាប់ពីផ្លូវប្រសប់ស៊ីប៊ូយ៉ា ដ៏ល្បីល្បាញក្នុងក្រុងតូក្យូ រហូតដល់ដែនកោះអូគីណាវ៉ា ដាច់ស្រយាលបំផុត បណ្ដាដងវិថីក្នុងប្រទេសជប៉ុនសុទ្ធតែមានគុណសម្បត្ដិរួមមួយនោះគឺ «ប្លុក ធេនជិ» (tenji) ជាការ៉ូរាងការ៉េពណ៌សម្រាប់អ្នកថ្មើរជើងដើម្បីជំនួយដល់អ្នកពិការភ្នែក។
ផ្លូវថ្មើរជើងបែបកាយវិញ្ញាណ ត្រូវបានច្នៃបង្កើតឡើងក្នុងប្រទេសជប៉ុន តាំងពីជាង ៥០ ឆ្នាំមុន ដើម្បីជួយដល់អ្នកមានបញ្ហាចក្ខុធ្វើដំណើរយឺតៗ និងប្រកបដោយសុវត្ថិភាពនៅជុំវិញបរិស្ថានក្នុងទីក្រុង។
ឥដ្ឋការ៉ូដ៏សម្បូរច្រើននៅស្ថានីយរថភ្លើងក្រោមដី ផ្លូវប្រសប់អ្នកថ្មើជើង និងមុខអគារសាធារណៈ តែងតែរំលេចនូវពណ៌លឿង ដែលត្រូវបានជឿថា ជាពណ៌ងាយស្រួលមើលឃើញបំផុតសម្រាប់អ្នកមានបញ្ហាភ្នែក។
ឥដ្ឋទាំងនេះមានពីរប្រភេទ ដោយមួយមានរាងការ៉េជាមួយស្នាមឆ្នូតផុស ជាសញ្ញាប្រាប់អ្នកថ្មើរជើងថា ពួកគេអាចដើរជាន់ប្រកបដោយសុវត្ថិភាព និងជាស្លាកស្នាម ដែលអាចដើរតាម ខណៈឥដ្ឋមានស្លាមដុបមូលៗផុសឡើងដូចគ្នា ជាសញ្ញាបញ្ជាក់នៃការផ្លាស់ប្ដូរទិសដៅ ឬកន្លែងសំចត ដូចជា ច្រកចូល ឬសញ្ញាគ្រោះថ្នាក់នៅខាងមុខ ដូចជា គែមនៃខឿន ជណ្ដើរ ឬភ្លើងសញ្ញាចរាចរណ៍ជាដើម។
លោក តូយ៉ូហារុ យូស៊ីហ៊្សុមិ សមាជិកប្រតិបត្ដិនៃសហព័ន្ធខ្សោយចក្ខុជប៉ុន បានប្រាប់ទីភ្នាក់ងារ AFP ថា៖ «ដើរតាមវិថីថ្មើរជើងកាយវិញ្ញាណ បានធ្វើឱ្យមានជំនឿចិត្ដថា វាមានសុវត្ថិភាពក្នុងការដើរលើវា»។
លោក យូស៊ីហ៊្សុមិ ដែលពិការភ្នែកតាំងពីអាយុ ១២ ឆ្នាំ បានធ្វើដំណើរប្រមាណ ៤០ នាទីរៀងរាល់ថ្ងៃ ទៅតាមវិថីថ្មើរជើងប្លុក ធេនជិ ជាឈ្មោះភាសាជប៉ុនសម្រាប់មនុស្សពិការភ្នែក។
លោកបាននិយាយថា៖ «ផ្លូវមិនសុទ្ធតែត្រង់រហូតនោះទេ ហើយវាតែងតែមានកោង ឬបត់។ អរគុណដល់ការណែនាំពីប្លុក ធេនជិ នេះ ដែលធ្វើឱ្យខ្ញុំមានអារម្មណ៍ថា មានសុវត្ថិភាពពីព្រោះខ្ញុំដឹងថា ខ្ញុំកំពុងដើរលើផ្លូវ»។
វិថីមានឥដ្ឋ ធេនជិ ដ៏ខ្វាត់ខ្វែង គឺជាគំនិតរបស់ស្ថាបនិក ស៊ីអ៊ីឈី មីយ៉ាកេ មកពីអូកាម៉ាយ៉ាភាគខាងលិចជប៉ុន។
ក្រោយពីអង្កេតការដើររបស់អ្នកដំណើរពិការភ្នែក ដែលមានជំនួយពីឈើច្រត់ ដោយពួកគេស្ទើរតែត្រូវបានរថយន្ដបុកនៅចំណុចផ្លូវប្រសប់ លោក មីយ៉ាកេ បានសម្រេចស្ម័គ្រចិត្ដច្នៃបង្កើតអ្វីមួយសម្រាប់អ្នកថ្មើរជើងមានបញ្ហាភ្នែកដើរប្រកបដោយសុវត្ថិភាព។
ក្នុងឆ្នាំ ១៩៦៧ វិថីប្លុក ធេនជិ ដំបូងនៅជប៉ុនត្រូវបានធ្វើឡើងលើផ្លូវប្រសប់មួយក្បែរសាលារៀនសម្រាប់អ្នកពិការភ្នែកក្នុងទីក្រុង អូកាយ៉ាម៉ា។
វាត្រូវការពេលវេលា ៣ឆ្នាំក្នុងការក្រាលការ៉ូពណ៌លឿងក្នុងខណ្ឌដំបូងនៃទីក្រុងតូក្យូ និងបន្ដពង្រីកវិសាលភាពទូទាំងសកលលោក ដោយមានប្រជាប្រិយរហូតដល់ត្រូវបានបង្ហាញជា Google Doodle គំនូរជីវចលក្នុងឆ្នាំ២០១៩។
បន្ទាប់មក វិថីប្លុក ធេនជិ ត្រូវបានបន្ដច្នៃបង្កើតជាបន្តបន្ទាប់រហូតដល់បច្ចុប្បន្ន។
កម្មវិធីទូរស័ព្ទ បើកដំណើរការឆ្នាំនេះ មានបំណងដោះស្រាយបញ្ហានេះ ជាមួយការប្រើប្រាស់ QR កូដ នៅតាមស្ថានីយជាច្រើនក្នុងទីក្រុងតូក្យ ដែលអ្នកថ្មើរជើងអាចស្គេនសម្រាប់ការជូនដំណឹងជាសំឡេង រួមទាំងការប្រាប់ទិសដៅ និងចម្ងាយទៅកាន់គោលដៅ។
លោក យូអ៊ីឈិ កូនីស៊ិ អគ្គនាយកក្រុមហ៊ុន LiNKX ដែលអភិវឌ្ឍកម្មវិធីទូរស័ព្ទនេះ បាននិយាយថា៖ «យើងចង់ធ្វើអ្វីម្យ៉ាងទាក់ទងនឹងបញ្ហានេះដោយប្រើប្រាស់បច្ចេកវិទ្យាទំនើប»។
ជាមួយកម្មវិធីទូរស័ព្ទ អ្នកប្រើប្រាស់អាចជ្រើសរើសគោលដៅ ដូចជា ច្រកចេញណាមួយ បន្ទប់ទឹក និងរថយន្ដតាក់ស៊ីចេញពីស្ថានីយរថភ្លើង។ ដូច្នេះ QR កូដ បានផ្ដល់ភាពងាយស្រួល ដែលត្រូវបានបំពាក់នៅតាមស្ថានីយរថភ្លើងចំនួន ៩ ក្នុងក្រុងតូក្យូ ហើយក្រុមហ៊ុនរំពឹងថានឹងពង្រីកគម្រោងនេះបន្ដទៀត។
លោកបានឱ្យដឹងថា៖ «ខ្ញុំគិតថា វានឹងធ្វើឱ្យពិភពលោកជាទីកន្លែងដ៏ប្រសើរសម្រាប់អ្នកមានពិការភាព»៕ AFP/HR