.jpg)
អ្នកធ្វើលិខិតបញ្ជាក់សុខភាពក្លែងក្លាយប្រឈមនឹងទោសទណ្ឌរហូតដល់ ៥ ឆ្នាំ និងពិន័យប្រាក់រហូតដល់ ១៥ ម៉ឺនអឺរ៉ូ។
ក្រុងប៉ារីស: អ្នកដែលបដិសេធមិនចង់ចាក់វ៉ាក់សាំងនៅក្នុងប្រទេសបារាំង នឹងត្រូវរងការពិន័យរាប់រយអឺរ៉ូចំពោះវិញ្ញាបនបត្រសុខភាពក្លែងក្លាយចំពោះទីផ្សារងងឹតលើអនឡាញ ដែលបានបំផុសបំផុលខ្លាំង ពេលរដ្ឋាភិបាលតម្រូវឱ្យមានលិខិតបញ្ជាក់សុខភាពអំឡុងពេលចូលហាងកាហ្វេ រថភ្លើងក្នុងក្រុង និងទីកន្លែងសាធារណៈដទៃទៀត។
ប្រជាជនត្រូវបានតម្រូវឱ្យបង្ហាញភ័ស្ដុតាងថា ពួកគេបានទទួលការចាក់វ៉ាក់សាំង តេស្ដអវិជ្ជមានកូវីដ ១៩ ឬទើបជាសះស្បើយពីជំងឺកូវីដ ទើបអាចចូលសារមន្ទីរ រោងកុន ឬទីលានកីឡាតាំងពីខែកក្កដា។
ផ្សារងងឹតសម្រាប់ការចេញវិញ្ញាបនបត្រសុខភាពក្លែងក្លាយបានរីកសាយភាយខ្លាំងលើបណ្ដាញសង្គម Snapchat ទោះបីជាប្រឈមហានិភ័យជាប់គុកយ៉ាងណាក៏ដោយ។
ការផ្សព្វផ្សាយពាណិជ្ជកម្មខ្លះ បានបង្ហាញថា «ប័ណ្ណសុខភាពរបស់អ្នកនឹងត្រូវបានផ្ញើតាមអ៊ីមែលពី ៨ ទៅ ១០ ម៉ោងយ៉ាងយូរ» «ការចាក់វ៉ាក់សាំងគឺជាជម្រើសចម្បង ដែលអរគុណដល់សេវាកម្មរបស់យើង» ឬ «និយាយថា ទេ ចំពោះការវ៉ាក់សាំង និងធ្វើប័ណ្ណបញ្ជាក់សុខភាពដោយមិនបានចាក់វ៉ាក់សាំង»។
រដ្ឋាភិបាលតម្រូវឱ្យមានលិខិតបញ្ជាក់សុខភាពអំឡុងពេលចូលហាងកាហ្វេ រថភ្លើងក្នុងក្រុង និងទីកន្លែងសាធារណៈដទៃទៀត។ AFP
អ្នករៀបចំព្រឹត្ដិការណ៍អាយុ ២៨ ឆ្នាំ ម្នាក់បានប្រាប់ AFP ថា លោកទិញវិញ្ញាបនបត្របញ្ជាក់សុខភាពក្លែងក្លាយដោយត្រូវចាយប្រាក់ ៣៥០ អឺរ៉ូ (១,៦៧ លានរៀល) ខណៈការចាក់វ៉ាក់សាំងធ្វើឡើងដោយឥតគិតថ្លៃក្នុងប្រទេសបារាំង។
លោកបានបន្ដថា៖ «សន្ដិសុខបានប្រាប់ខ្ញុំថា ថ្វីដ្បិតតែខ្ញុំជាអ្នករៀបចំកម្មវិធីយ៉ាងណាក៏ដោយ បើខ្ញុំកើតកូវីដ ខ្ញុំមិនអាចចូលរួមក្នុងព្រឹត្ដិការណ៍ដែលខ្លួនឯងរៀបចំឡើង»។
លោកបាននិយាយថា លោកមិនបារម្ភត្រូវបានគេបោកដោយសារលោកមានមិត្ដភក្ដិ ដែលបានទិញលិខិតបញ្ជាក់សុខភាពនេះរួចហើយ។ អ្នកធ្វើលិខិតក្លែងក្លាយប្រឈមនឹងទោសទណ្ឌរហូតដល់ ៥ ឆ្នាំ និងពិន័យប្រាក់រហូតដល់ ១៥ ម៉ឺនអឺរ៉ូ (៧១៨ លានរៀល)។ អ្នកដែលប្រើលិខិតក្លែងក្លាយអាចជាប់គុក ៣ឆ្នាំផងដែរ។
មនុស្សជាច្រើនត្រូវបានចោទប្រកាន់ជុំវិញបញ្ហាលិខិតបញ្ជាក់សុខភាពក្លែងក្លាយនេះ។ ស្ដ្រីម្នាក់បានទទួលទោសជាប់គុក ១ឆ្នាំ ដោយត្រូវបញ្ឃាំងនៅក្នុងផ្ទះព្រោះបញ្ហាកូវីដ ១៩ ពីបទលក់ QR កូដ ក្លែងក្លាយចំនួន ២០០។ ស្ដ្រីរូបនេះធ្វើការនៅមជ្ឈមណ្ឌលចាក់វ៉ាក់សាំងស្រាប់៕ AFP/HR
រដ្ឋាភិបាលតម្រូវឱ្យមានលិខិតបញ្ជាក់សុខភាពអំឡុងពេលចូលហាងកាហ្វេ រថភ្លើងក្នុងក្រុង និងទីកន្លែងសាធារណៈដទៃទៀត។ AFP
