.jpg)
កូនខ្លាបេនហ្គាល់មួយក្បាល កំពុងត្រូវបានចិញ្ចឹមបីបាច់ដោយមនុស្សនៅសួនសត្វជាតិនីការ៉ាហ្គា។ AFP
ក្រុងម៉ាណាហ្គា៖ កូនខ្លាបេនហ្គាល់មួយក្បាលកំពុងត្រូវបានចិញ្ចឹមបីបាច់ដោយមនុស្សនៅសួនសត្វជាតិនីការ៉ាហ្គា ក្រោយពីមេរបស់វាមិនអាចផលិតទឹកដោះផ្គត់ផ្គង់កូនតូច ដែលបង្កើនហានិភ័យដល់ការផុតពូជអម្បូរខ្លានេះ។ នេះបើយោងតាមនាយកគ្រប់គ្រងសួនសត្វ អេឌួដូ សាកាសា បាននិយាយកាលពីថ្ងៃអង្គារ។
ខ្លា ដែលចាប់កំណើតកាលពីថ្ងៃសៅរ៍ គឺជាកូនទី៤ ដែលកើតនៅសួនសត្វជាតិក្នុងទីក្រុងម៉ាសាយ៉ា ចម្ងាយប្រមាណ ៣០ គីឡូម៉ែត្រភាគខាងត្បូងទីក្រុងម៉ាណាហ្គា។
សាកាសា បាននិយាយថា កូនខ្លាអាយុ ៤ ថ្ងៃ ដែលមិនទាន់មានឈ្មោះនៅឡើយ ត្រូវបាចិញ្ចឹមជាមួយទឹកដោះគោពិសេសសម្រាប់ឆ្មា។
លោកបានឱ្យដឹងថា៖ «កូនខ្លាញីនេះ ពិតជាគួរឱ្យស្រឡាញ៉ណាស់»។ លោកពន្យល់ដោយបានសម្អាងលើទឹកដោះសត្វសម្បូរជីវជាតិក្រោយការចាប់កំណើតថា៖ «យើងកំពុងថែទាំវា ដែលអាចបន្ដជីវិតរស់បាន។ នេះជាវេលាដ៏លំបាកសម្រាប់វា ពីព្រោះវាមិនបានទទួលទឹកដោះដំបូងក្រោយចាប់កំណើតសម្រាប់ការពារខ្លួន»។
មេរបស់វាមិនអាចផលិតទឹកដោះផ្គត់ផ្គង់កូនតូច ដែលបង្កើនហានិភ័យដល់ការផុតពូជអម្បូរខ្លានេះ។ AFP
មេរបស់កូនខ្លា ដាលីឡា បានផ្ដល់កំណើតកូនខ្លាញីពណ៌សមួយក្បាលឈ្មោះ នីវ ឬព្រឹល កាលពីខែធ្នូ តែកូនខ្លានោះបានស្លាប់ដោយសារបញ្ហាផ្លូវដង្ហើម ទើបអាយុបាន ២សប្ដាហ៍ ទោះបីជាទទួលការថែទាំពិសេសយ៉ាងណាក៏ដោយ។
សួនសត្វជាតិនីការ៉ាហ្គា ក៏មានខ្លាញីពីរក្បាលទៀត ដែលបានកើតកូនផងដែរ។
លោក សាកាសា បាននិយាយថា ការចាប់កំណើតថ្មីៗបានផ្ដល់ក្ដីសង្ឃឹម ដែលសួនសត្វអាចក្លាយជាមជ្ឈមណ្ឌលអភិរក្សអម្បូរខ្លាកម្រនេះ។
ខ្លាបេនហ្គាល់ ត្រូវបានចុះបញ្ជីលើសហភាពអន្ដរជាតិសម្រាប់កិច្ចការពារអម្បូរសត្វរងការគំរាមកំហែងក្នុងកម្រិតអាសន្ន ជាសត្វប្រឈមការផុតពូជ ដែលកើតចេញពីការប្រមាញ់ និងបំផ្លាញព្រៃឈើនៃដែនជម្រកធម្មជាតិនៅអាស៊ី៕ AFP/HR
កូនខ្លាបេនហ្គាល់មួយក្បាលកំពុងត្រូវបានចិញ្ចឹមបីបាច់ដោយមនុស្សនៅសួនសត្វជាតិនីការ៉ាហ្គា។ AFP
