.jpg)
លោក វេក ចាប់ផ្ដើមធ្លាក់ខ្លួនពិការភ្នែកពេលដឹងថា កើតជំងឺមហារីកអាយុ ៦ឆ្នាំ។ AFP
ក្រុងឡាអេ៖ ដៃម្ខាងកាន់ឧបករណ៍បញ្ជា ដៃម្ខាងទៀតកាន់ឧបករណ៍ Braille និងម៉ាសពាក់លើភ្នែក Blind Warrior Sven អាចយកជ័យជម្នះលើដៃគូប្រយុទ្ធបានយ៉ាងជោគជ័យ។
លោក ស្វេន វ៉ាន់ ដេ វេក បាននិយាយជាមួយស្នាមញញឹម ដោយផ្ដួលសត្រូវយ៉ាងដំណំលើវិបសាយវីដេអូហ្គេម Twitch ថា៖ «ខ្ញុំពាក់ម៉ាសបិទភ្នែកនេះ ដោយសារពេលខ្លះអ្នកដទៃអត់ជឿថា ខ្ញុំជាអ្នកពិការភ្នែកមែនទែន»។
លោក វេក ទើបមានអាយុ ៦ឆ្នាំ ពេលដឹងថា ខ្លួនកើតជំងឺមហារីក។ លោកបានធ្លាក់ខ្លួនពិការភ្នែក តែប្ដេជ្ញាចិត្ដមិនបណ្ដែតបណ្ដោយឱ្យភាពពិការនេះរារាំងដល់មហិច្ឆតាពីកុមារភាពក្នុងវិស័យវីដេអូហ្គេមនេះឡើយ។
រហូតដល់អាយុ ៣៥ ឆ្នាំ ទើបបុរសជនជាតិហូឡង់រូបនេះ បានប្រកួតឈ្នះបេក្ខជនឆ្នើមលំដាប់ពិភពលោកមួយចំនួននៅព្រឹត្ដិការណ៍ប្រកួតជុំវិញទ្វីបអឺរ៉ុប និងបានគ្រងជើងឯកចំពោះការលេងហ្គេមស៊េរី «Street Fighter»។
លោក ស្វេន វ៉ាន់ ដេ វេក អ្នកលេងហ្គេមអនឡាញពិការភ្នែក និងជើងឯក Street Fighter V។ AFP
សមត្ថភាពស្ដាប់ពិតជាអាវុធដ៏សំខាន់ចំពោះរូបលោក ដោយលោកបញ្ជាតេឡេលើហ្គេម Street Fighter V ដែលរចនាឡើងជាមួយសំឡេងយ៉ាងលម្អិតពិសេស ដោយប្រើប្រាស់បច្ចេកវិទ្យាសំឡេងសញ្ញា និងការបញ្ជាសំឡេង។
ក្រោយពីបានហ្វឹកហាត់ជាច្រើនឆ្នាំ និងជាច្រើនម៉ោងក្នុងមួយថ្ងៃ ដៃគូប្រជែងជាច្រើននាក់បានប្រាប់ថា សមត្ថភាពពួកគេចាញ់ដាច់ឆ្ងាយ តាមរយៈការដឹងពីសំឡេងវាយសន្ធាប់ និងសន្ធឹកខ្យល់នៃអ្នកប្រយុទ្ធរបស់លោក វេក។
លោកបានពន្យល់ថា៖ «ដោយការស្ដាប់សំឡេងលម្អិតទាំងនោះ ខ្ញុំអាចដឹងថា តើខ្ញុំស្ថិតនៅខាងឆ្វេង ឬនៅខាងស្ដាំ និងអាចប្រតិកម្មតបទៅនឹងគូប្រយុទ្ធយ៉ាងដូចម្ដេច»។
នេះជាជំនាញដែលលោករកចំណូលបានតាមរយៈ Twitch ជាវេបសាយដែលមានអ្នកប្រើប្រាស់ប្រមាណ ៣០ លាននាក់ក្នុងមួយថ្ងៃ ភាគច្រើនជាអ្នកចូលទៅមើលវីដេអូគេលេងហ្គេម។
ការដាក់បញ្ចូលស្ទូឌីយូសំឡេងដើម្បីសម្របតាមតម្រូវការរបស់លោក វេក ទាមទារឱ្យបច្ចេកទេសជំនាញ ក៏ដូចជាភាពច្នៃប្រឌិតពីជើងឯកហ្គេម ដែលធ្វើការប្រចាំថ្ងៃក្នុងនាមជាវិស្វករ IT។
លោក វេក ចាប់ផ្ដើមធ្លាក់ខ្លួនពិការភ្នែកពេលដឹងថា កើតជំងឺមហារីកអាយុ ៦ ឆ្នាំ។ AFP
ស្ទូឌីយូ ដែលស្ថិតនៅក្នុងអាផាតមិនរបស់លោកក្នុងទីក្រុងឡាអេ រួមមានកុំព្យូទ័រពីរគ្រឿង បំពាក់ភ្ជាប់ទៅនឹងឧបករណ៍ប៊ូតុងស្ទាប Braille។ ឧបករណ៍នេះបកប្រែសំណេរមតិយោបល់នៅលើឆាតវីដេអូកំពុងផ្សាយផ្ទាល់ទៅកាន់សារលើ Braille ដែលលោកអាចអានដោយការស្ទាប និងឱ្យលោកធ្វើការប្រាស្រ័យទាក់ទងជាមួយអ្នកទស្សនាផងដែរ។
ប៉ុន្តែអត់មានអេក្រង់កុំព្យូទ័រនៅចំពោះមុខលោកនោះទេ។ នៅមុខលោកគឺជាជញ្ជាំងតែប៉ុណ្ណោះ។
លោកបាននិយាយថា៖ «ខ្ញុំមិនត្រូវការអេក្រង់រូបភាពសម្រាប់មើលទេ ហើយវាអាចសន្សំសំចៃអគ្គិសនីបានខ្លះ»។
លោក វ៉ាន់ ដេ វេក គ្រប់គ្រងក្រុមមួយលើ Twitch ជាទីដែលទំហំប្រាក់លោកទទួលអាស្រ័យលើអ្នកចុចជាវ ឬ (subscribers) ដោយពេលនេះមានប្រមាណ ៣ ពាន់នាក់ និងទឹកប្រាក់ដែលពួកគេបរិច្ចាគ។
បច្ចុប្បន្ន លោកអាចរកចំណូលបានក្រោម ១០០ អឺរូ (៤៨ ម៉ឺនរៀល) ក្នុងមួយខែពីការលេងវីដេអូហ្គេមនេះ តែរំពឹងថា ថ្ងៃណាមួយលោកនឹងសម្រេចគោលដៅជាដៃគូ ដែលអាចឱ្យលោកលេងផ្សាយផ្ទាល់ជាការងារពេញម៉ោង។
លោកបានអះអាងថា៖ «បើខ្ញុំនៅតែគិតថា ខ្លួនខ្វាក់ភ្នែក អត់អាចលេងវីដេអូហ្គេមបាន ខ្ញុំច្បាស់ជាបោះបង់ចោលបាត់ទៅហើយ។ បើខ្ញុំអាចធ្វើវាបាន ខ្ញុំធានាថា អ្នកដទៃទៀតដ៏អាចធ្វើវាបានដែរ»៕ AFP/HR
លោក ស្វេន វ៉ាន់ ដេ វេក អ្នកលេងហ្គេមអនឡាញពិការភ្នែក និងជើងឯក Street Fighter V។ AFP
