ក្រុងប៉ារីស៖ កាក់មាសកម្ររាប់រយកាក់ត្រូវបានប្រទះឃើញនៅក្នុងជញ្ជាំងភូមិគ្រឹះបារាំងដាច់ស្រយាលមួយ ហើយត្រូវបានដាក់លក់ដេញថ្លៃនាខែនេះ។ នេះបើយោងតាមក្រុមហ៊ុនលក់ដេញថ្លៃដែលរៀបចំការលក់បានឱ្យដឹងកាលពីព្រហស្បតិ៍។
កាក់ចំនួន ២៣៩កាក់ ផលិតឡើងមុនសម័យបដិវត្ដបារាំងអំឡុងពេលការគ្រងរាជស្ដេច ល្វីសទី១៣ និងល្វីសទី១៤ ត្រូវរកឃើញពេលម្ចាស់ភូមិគ្រឹះនៅភាគខាងលិចតំបន់ ប្រ៊ីតតានី បានជួលជាងកាត់ថ្មជួសជុលអគារ ៣ ខ្នងនៅក្នុងភូមិគ្រឹះ។ នេះបើយោងតាមអ្នករៀបចំការលក់ដេញថ្លៃ auctioneers។
អំឡុងពេលធ្វើការ កម្មករ ៣នាក់បានរកឃើញប្រអប់ដែកមួយផ្ទុកកាក់មាសពេញនៅក្នុងជញ្ជាំង។
ម្ចាស់ភូមិគ្រឹះ Francois Mion បានប្រាប់ AFP ថា៖ «ប្រអប់នោះត្រូវបានញាត់ចូលក្នុងជញ្ជាំង ជាប់នៅចន្លោះថ្ម»។
លោកបាននិយាយថា ប៉ុន្មានថ្ងៃក្រោយមក ពួកគេបានរកឃើញកាក់មាសបន្ថែមទៀតលាក់នៅលើធ្នឹមអគារ។
ការរកឃើញនៅឆ្នាំ២០១៩ ទើបត្រូវបានរាយការណ៍នាពេលនេះ ក្រោយពីម្ចាស់ភូមិគ្រឹះទៅរកក្រុមហ៊ុនលក់ដេញថ្លៃជួយលក់ទ្រព្យសម្បត្ដិរបស់ពួកគេ។
ប្រាក់ចំណូលពីការលក់ ដែលប៉ាន់ប្រមាណចន្លោះពី ២៥ ម៉ឺន ទៅ ៣០ ម៉ឺនអឺរ៉ូ (២៩៦ ០០០ - ៣៥៥ ០០០ ដុល្លារ) នឹងត្រូវបានចែងចែកមួយចំនួន រួមទាំងកម្មកររកឃើញកាក់នោះមុនគេផងដែរ។
កាក់មាស រួមមាន កាក់រូប Louis d''Or និងរូប Louis d''Or ភ្លោះ ជាច្រើនកាក់ រួមទាំង កាក់ដ៏កម្ររំលេចរូបស្ដេច ល្វីសទី១៤ បន្សល់តាំងពីឆ្នាំ ១៦៤៦ ដោយគ្រាន់តែកាក់នេះមានតម្លៃប្រមាណ ១៥ ០០០ អឺរ៉ូ ឯនោះ។
យោងតាមច្បាប់ប្រទេសបារាំង ការរកឃើញទ្រព្យបុរាណវត្ថុទាំងអស់ គឺជាសម្បត្ដិរបស់រដ្ឋជាស្វ័យប្រវត្ដិ បើត្រូវបានរកឃើញក្នុងទីតាំងឯកជនតាំងពីពាក់កណ្ដាលឆ្នាំ ២០១៦ មក។
ប៉ុន្ដែដោយសារប្ដីប្រពន្ធគ្រប់គ្រងភូមិគ្រឹះនេះក្នុងឆ្នាំ ២០១២ ពួកគេមានសិទ្ធិលក់ទ្រព្យសម្បត្ដិជាជាងការប្រគល់ឱ្យរដ្ឋាភិបាល៕ AFP/HR