ក្រុងប៉ារីស៖ កាលពីឆ្នាំមុន ពេលបារាំងផ្ដើមមានវិធានការការពារបរិវេណស្មៅសមុទ្រមេឌីទែរណេ ដោយហាមឃាត់នាវាធំៗបោះយុថ្កាក្បែរតំបន់រុក្ខជាតិទឹកប្រៃ លោក Yves-Marie Loudoux ហាក់មានការស្រពិចស្រពិលចំពោះវិធានការនេះ។
អ្នកដឹកនាំនាវា Ocean Sapphire ប្រវែង ៤១ម៉ែត្រ លោក Loudoux ស្រាប់តែដឹងថា លោកលែងអាចរំកិលនាវាទៅចំណតដូចរាល់បានទៀត ដោយសារវានៅក្បែរបរិវេណងាយផុតស្រួល ដែលមានពពួកស្មៅ «ស្មៅនេពធូន» នៅឆ្នេរ ខូស៊ីកា ដែនដីបារាំង។
លោកបានរំឭកថា៖ «យើងគ្មានជម្រើសអ្វីផ្សេងទៀត យើងត្រូវបានបង្ខំឱ្យបង្វែចង្កូតទៅចតនាវានៅកន្លែងផ្សេង ដោយទៅឆ្ងាយរហូតដល់ចំណត សាដីនិយ៉ា ប្រទេសអ៊ីតាលី ក្បែរទីតាំង ដែលមានមនុស្សអាចហែលទឹកលេង»។
ប៉ុន្ដែពេលនេះ ភ្ញៀវរបស់លោក ដែលចំណាយប្រាក់ប្រមាណ ១១ ម៉ឺនអឺរ៉ូ (៥៣០ លានរៀល) ក្នុងមួយសប្ដាហ៍ ដើម្បីធ្វើដំណើរកម្សាន្ដលើសមុទ្រមេឌីទែរណេ អាចមានឱកាសបានទៅដែនទឹកខូស៊ីកា ដែលអរគុណដល់កិច្ចការអភិរក្សស្មៅសមុទ្រយ៉ាងពិសេសនេះ។
មីហ្គែល ម៉ាល់ឡារ៉ូនី នាយកគ្រប់គ្រងកំពង់ផែ Bonifacio និងប្រធានគម្រោងតម្លៃ ២,៣លានអឺរ៉ូ (២,៧លានដុល្លារ) បាននិយាយថា យុថ្កាអេកូឡូស៊ីសរុបចំនួន ១៤ ត្រៀមបោះនៅឆក Sant''Amanza ដើម្បីការពាររុក្ខជាតិបាតសមុទ្រនេពធូន ប្រមាណ ៦០ ហិកតា។
លោកបាននិយាយថា៖ «បញ្ហាគឺការថែរក្សាតំបន់ភាគខាងត្បូងខូស៊ីកា ទាក់ទាញវត្ដមាននាវា ខណៈការពារបរិស្ថានផងដែរ»។
ជាភាពវិសេសប្រចាំតំបន់មេឌីទែរណេ ស្មៅនេពធូន ស្ថិតក្នុងចំណោមស្មៅសមុទ្រ ៧០ប្រភេទ ដែលដុះក្នុងបាតសមុទ្រពីតំបន់អាទិករហូតដល់ត្រូពិក។
រុក្ខជាតិទាំងនេះដើរតួនាទីយ៉ាងសំខាន់ក្នុងការធ្វើឱ្យគុណភាពទឹកប្រសើរឡើង ដោយពួកវាបានស្រូបយកសារធាតុកាបោនឌីអុកស៊ីដ និងបញ្ចេញឧស្ម័នអុកស៊ីសែន ព្រមទាំងបានការថែទាំតាមធម្មជាតិ និងផ្ដល់ជាចំណីដល់ត្រីរាប់រយប្រភេទថែមទៀត។
ស្មៅនេពធូនប្រមាណ ៧៥០០ហិកតាត្រូវបានបំផ្លាញនៅតាមឆ្នេរប្រទេសបារាំងតែមួយ ហើយក្នុងឆ្នាំ២០២០ ប្រទេសបារាំងបានដាក់ការចូលចតនៃនាវាលើសប្រវែង ២៤ម៉ែត្រជាទង្វើក្រៅច្បាប់ ដោយបង្វែគោលដៅទៅចំណតផ្សេង។
លីន បាប៊ីយុល មកពីក្រុមហ៊ុនវិស្វកម្ម BRL បាននិយាយថា៖ «ដំណោះស្រាយ គឺ យុថ្កាអេកូឡូស៊ី ដែលសម្របខ្លួនទៅនឹងបាតសមុទ្រដោយការចម្លងកាត់ផ្នែកខាងក្រៅនៃសមាសធាតុថ្មសមុទ្រ ដែលធ្វើឱ្យងាយបំប្លែងទៅជាជីវចម្រុះ»។
នៅលើផ្ទៃទឹក យុថ្កាបណ្ដែតទឹកភ្ជាប់ជាមួយបេតុងនៅផ្នែកខាងក្រោមដើម្បីឱ្យទូកប្រវែងរហូតដល់ ៦០ ម៉ែត្របោះជាប់យុថ្កាដោយសុវត្ថិភាព ដោយមិនចាំបាច់ទម្លាក់យុថ្កាទូកបន្ថែម ដែលអាចប៉ះពាល់ដល់ស្មៅបាតសមុទ្រ។
សម្រាប់អ្នកដឹកនាំនាវា ដូចលោក Loudoux ការបោះយុថ្កាអេកូនេះ គឺជាដំណោះស្រាយដ៏ល្អបំផុត។
លោកបាននិយាយថា៖ «យុថ្កាបរិស្ថានមានកាន់តែច្រើន ភ្ញៀវទេសចរកាន់តែច្រើនអាចចូលចតកំពង់ផែឆ្នេរខូរស៊ីកាបន្ថែមទៀត»៕ AFP/HR