.jpg)
រូបតំណាងៈ ស្ត្រីបម្រើការការិយាល័យដើរកាត់ស្ពាននៅក្រុងឡុងដ៍។ រូបថត AFP
ក្រុងឡុងដ៍៖ នាយកគ្រប់គ្រងនៅតាមក្រុមហ៊ុនធំៗជាស្ដ្រីក្នុងចក្រភពអង់គ្លេសទទួលបានប្រាក់ចំណូលស្ទើរតែ ៣ ភាគ តិចជាងបុរសដែលមានតំណែងដូចគ្នា។ នេះបើយោងតាមការសិក្សាមួយបានបង្ហាញ កាលពីដើមសប្ដាហ៍នេះ។
នាយកគ្រប់គ្រងជាស្ដ្រីនៅក្រុមហ៊ុនធំមួយ ត្រូវបានចុះបញ្ជីជាអ្នករកចំណូលខ្ពស់ FTSE 100 ក្រុងឡុងដ៍ ជាមួយទឹកប្រាក់មធ្យម ២៣៧ ០០០ ផោន (១,៣២ ពាន់លានរៀល) ក្នុង ១ ឆ្នាំ។ នេះបើយោងតាមការស្រាវជ្រាវពីសម្ព័ន្ធប្រឹក្សាញូវស្ទ្រីត (NSCG) បានឱ្យដឹង។
ចំណូលនោះជិត ៧៣ ភាគរយ តិចជាងប្រាក់ចំណូលតំណែងនាយកគ្រប់គ្រងជាបុរស FTSE 100 ដែលរកចំណូលមធ្យម ៨៧៥ ៩០០ផោន (ជិត ៥ ពាន់លានរៀល)។ គម្លាតថ្លៃឈ្នួលដ៏ខុសគ្នានេះក៏លើសខ្វះគ្នាខ្លះនៅតំបន់ដទៃទៀតនៃទីផ្សារការងារក្នុងចក្រភពអង់គ្លេសផងដែរ។
បុរសនៅចក្រភពអង់គ្លេសរកចំណូលមធ្យម ១៥,៥ ភាគរយលើសស្ដ្រី។ នេះបើយោងតាមទិន្នន័យផ្លូវការចុងក្រោយ ចេញផ្សាយដោយការិយាល័យស្ថិតិជាតិ។ ទោះជាយ៉ាងណា ការចំណាយលើតំណែងគ្រប់គ្រងនេះរមែងជាបុរស ពីព្រោះស្ដ្រីមិនសូវមានតួនាទីខ្ពស់បែបនោះឡើយ។
បុរស ទំនងជាមានអត្រាកាន់កាប់តំណែងខ្ពស់ៗច្រើន ដូចជា នាយកប្រតិបត្ដិ និងប្រធានផ្នែកហិរញ្ញវត្ថុជាដើម។
អ្នកនិពន្ធការសិក្សា និងជានាយក NSCG ក្លែរ កាធ័រ បាននិយាយថា៖ «ខណៈការអភិវឌ្ឍកំពុងតែជំរុញស្ដ្រីហក់ឡើងតំណែងខ្ពស់ៗ ការសិក្សានេះបានបង្ហាញថា យើងនៅតែមានកិច្ចការច្រើនទៀតត្រូវធ្វើ»។
អ្នកនាង កាធ័រ បានបន្តទៀតថា៖ «ដោយផ្ដោតលើភាគរយនៃតំណែងនាយកគ្រប់គ្រងជាស្ដ្រីតែមួយមុខ នោះគឺមិនគ្រប់គ្រាន់ទេ ពេលយើងព្យាយាមជំរុញសមភាព ចាំបាច់ត្រូវតែគិតដល់កត្តាអត្ថប្រយោជន៍របស់ពួកគេដែលទទួលបាន»៕ AFP/HR
