ក្រុងឡូសអេនជឺលេស៖ ការិយាល័យលក់សំបុត្រកុននៅអាមេរិកខាងជើងបានទទួលជោគជ័យ ពេលភាពយន្ដថ្មីរបស់ Disney រឿង «Shang-Chi and the Legend of the Ten Rings» ដែលបង្ហាញវត្ដមានកំពូលវីរបុរស Marvel ជាជនជាតិអាស៊ីដំបូង បានហក់ឡើងក្នុងកំណត់ត្រានៃការលក់សំបុត្ររហូតដល់ ៧១,៤លានដុល្លារ នៅពេលបើកសម្ពោធ។ នេះបើយោងតាមអ្នកតាមដានឧស្សាហកម្មកម្សាន្ដ Exhibitor Relations បានឱ្យដឹងកាលពីថ្ងៃអាទិត្យ។
វេបសាយ Hollywood Reporter បានឱ្យដឹងថា តួលេខដ៏ខ្ពស់ សម្រាប់ការលក់ពីថ្ងៃសុក្រដល់ថ្ងៃអាទិត្យកន្លងទៅ ហើយភាពយន្ដនេះគ្រោងនឹងរកចំណូលបានប្រមាណ ១២,១លានដុល្លារបន្ថែមទៀតនៅថ្ងៃចន្ទ។
លោក ដាវីន អេ ហ្គ្រូស មកពី Franchise Entertainment Research បាននិយាយថា៖ «នេះគឺជាការបើកសម្ពោធដ៏គួរជាមោទនៈនៅចំទិវាពលកម្មដ៏ស្ងាត់ជ្រងំ។ តួលេខរយៈពេល ៣ថ្ងៃគឺជាទឹកប្រាក់កំណត់ត្រាថ្មីក្នុងឱកាសសម្រាកវិស្សមកាល ដែលជាសញ្ញាវិជ្ជមានក្នុងការបញ្ឈប់រដូវក្ដៅ»។
តារាភាពយន្ដជនជាតិកាណាដាលោក Simu Liu ដែលសម្ដែងជាតួអង្គ «Shang-Chi» ធ្លាប់តួអង្គជំនួសក្នុងឈុតគ្រោះថ្នាក់ និងអតីតជាគណនេយ្យករក្រុមហ៊ុន Deloitte។ លោកសម្ដែងជាកំពូលវរជនថ្មីបំផុតរបស់ Marvel ជាអតីតឃាតករស្ថិតក្រោមស្រមោលបិសាចរបស់ឪពុក។ ភាពយន្ដនេះ ក៏មានតួអង្គសំខាន់ៗមួយចំនួនទៀត ដូចជា Awkwafina, Tony Leung និង Michelle Yeoh។
ភាពយន្តជាទីចំណាប់អារម្មណ៍ជាមួយតួឯកតំណាងឱ្យអាស៊ីនេះ បានគ្រងតំណែងទីពីរនៃពិធីបើកសម្ពោធជាមួយការលក់សំបុត្រដាច់បំផុតអំឡុងវិបត្ដិកូវីដនាឆ្នាំនេះ ដោយស្ថិតនៅពីក្រោយភាពយន្ដ Marvel នៃរឿង «Black Window» ដែលរកចំណូលបាន ៨០លានដុល្លារពេលបើកសម្ពោធ។
បើធ្វើការប្រៀបធៀប ភាពយន្ដរបស់ Universal នៃរឿង «Candyman» ឈរលើលំដាប់កំពូលនៃការិយាល័យលក់សំបុត្រកាលពីចុងសប្ដាហ៍មុន ជាមួយទឹកប្រាក់ ២២លានដុល្លារ មុនពេលធ្លាក់ទៅលេខ ២ នាសប្ដាហ៍នេះ ជាមួយការលក់ ៣ថ្ងៃបាន ១០,៦ លានដុល្លារ (១៣ លានដុល្លារក្នុងរយៈពេល ៤ ថ្ងៃ)។ វាជាការសម្ដែងរបស់តារាភាពយន្ដអាមេរិក Yahya Abdul-Mateen II។
ស្ថិតក្នុងលំដាប់ទី ៣ នាសប្ដាហ៍នេះ គឺរឿង «Free Guy» ដែលទទួលបានទឹកប្រាក់ ៨,៧ លានដុល្លារ (១១,២ លានដុល្លារ រយៈពេល ៣ ថ្ងៃ)។ តារាភាពយន្ដកំប្លែកបែបវិទ្យាសាស្ដ្រ Ryan Reynolds ជាបុគ្គលិកធនាគារ ដែលជាប់ផុងខ្លួននៅក្នុងវីដេអូហ្គេម៕ AFP/HR