ក្រុងឌូបៃ៖ ទីក្រុងឈូងសមុទ្រនានាដូចជា ក្រុងឌូបៃនេះត្រូវបានទទួលស្គាល់ជាគោលដៅវិស្សមកាលរដូវក្ដៅ តែក្រុមអ្នកជំនាញបានព្រមានថា បញ្ហាបម្រែបម្រួលអាកាសធាតុអាចធ្វើឱ្យទីតាំងខ្លះនៃតំបន់សម្បូរធនធានប្រេងនេះមិនស័ក្ដិសមសម្រាប់ការរស់នៅរបស់មនុស្ស។
សីតុណ្ហភាពប្រចាំថ្ងៃក្នុងទីក្រុងឆ្នេរនេះស្ថិតក្នុងកម្រិត ៤០ អង្សាសេ រយៈពេលជាច្រើនខែ និងធ្វើឱ្យកាន់តែធ្ងន់ធ្ងរដោយកត្ដាសំណើមខ្ពស់។
លោក Sameer អ្នកជិះម៉ូតូតាមដងផ្លូវជនជាតិប៉ាគីស្ថានបាននិយាយ ស្របពេលញើសស្រក់តាមថ្ងាសថា៖ «ខ្ញុំធ្វើការពីម៉ោង ៩ ព្រឹក ដល់ម៉ោង ៤ រសៀលក្នុងរដូវក្ដៅនេះ»។
លោក Sameer ដែលធ្វើការឱ្យក្រុមហ៊ុនផលិតកម្មវិធីដឹកជញ្ជូនតាមទូរស័ព្ទ និងសុំមិនបញ្ចេញឈ្មោះត្រកូលបានបន្ដថា៖ «ជួនកាលក្រុមហ៊ុន ឬមនុស្សម្នាបានផ្ដល់ទឹកឱ្យពួកយើងផឹក ហើយយើងត្រូវសម្រាករៀងរាល់ ៣ម៉ោងម្ដង»។
របាយការណ៍ថ្មីមួយនាខែនេះចេញដោយគណកម្មការអន្ដររដ្ឋាភិបាលស្ដីពីបម្រែបម្រួលអាកាសធាតុ (IPCC) របស់អង្គការសហប្រជាជាតិ បានបង្ហាញថា បម្រែបម្រួលអាកាសធាតុកំពុងតែផ្លាស់ប្ដូរយ៉ាងឆាប់រហ័ស ដែលពិតជាគួរឱ្យព្រួយបារម្ភ នោះដោយសារតែសកម្មភាពរបស់មនុស្សកន្លងមក។
សូម្បីតែពេលនេះ ពលរដ្ឋក្រុងឌូបៃ តែងតែចាកចេញទៅគោលដៅត្រជាក់ៗអំឡុងពេលខែក្ដៅខ្លាំង ខណៈមនុស្សជាច្រើន ដែលនៅតែសម្ងំក្នុងបន្ទប់ម៉ាស៊ីនត្រជាក់ និងពឹងអាស្រ័យលើសេវាកម្មដឹកជញ្ជូនផ្សេងៗ។
អេមីរ៉ាត់ អារ៉ាប់រួម ក៏ជាប្រទេសដ៏ក្ដៅស្ងួតសោះកក្រោះបំផុតមួយក្នុងលោក ហើយរយៈពេល ៧ ឆ្នាំចុងក្រោយ ប្រទេសនេះមានយន្ដហោះបង្កើតពពកភ្លៀងសិប្បនិម្មិតទៀតផង។
លោក អេលហ្វាទី អេលតាហៀរ សាស្ដ្រាចារ្យជលវិទ្យា និងអាកាសធាតុនៅវិទ្យាស្ថានបច្ចេកទេសម៉ាសាឈូសេត បាននិយាយថា៖ «ជាទូទៅ កម្រិតរលកកម្ដៅនឹងបន្ដហក់ឡើងយ៉ាងខ្លាំង»។
លោកបានព្រមានថា ជាមួយសីតុណ្ហភាពកាន់តែក្ដៅ និងសើម នៅចុងសតវត្សរ៍នេះ ផ្នែកខ្លះនៃឈូងសមុទ្រនឹងជួបនូវ «រលកកម្ដៅ ដែលនឹងធ្វើឱ្យមនុស្សពិបាករស់នៅ»។
ល្បាយកម្ដៅ និងសំណើមអាចបង្កគ្រោះថ្នាក់ដល់ជីវិត បើមនុស្សមិនអាចរក្សាសភាពត្រជាក់អំឡុងពេលបែកញើសនោះទេ។
ក្រុមអ្នកវិទ្យាសាស្ដ្របានប៉ាន់ប្រមាណថា មនុស្សពេញវ័យដែលមានសុខភាពល្អនៅក្នុងម្លប់ដោយទទួលទានទឹកអត់កំណត់ ប្រាកដជាស្លាប់ បើសីតុណ្ហភាពហៅថា «អំពូលភ្លើងសើម» បានកើនឡើងលើស ៣៥ អស្សាសេ រយៈពេល ៦ ម៉ោង។
អំពាវនាវឱ្យកាត់បញ្ចេញកាបោនដែលបង្កបញ្ហាយ៉ាងធ្ងន់ធ្ងរដល់សេដ្ឋកិច្ចសម្រាប់បណ្ដាលប្រទេសសម្បូរប្រេង និងឧស្ម័នទាំងនេះ ចាប់ពីអារ៉ាប៊ី សាអូឌី រហូតដល់អូម៉ង់ និងកាតា។
ប៉ុន្ដែនាប៉ុន្មានឆ្នាំនេះ រដ្ឋនៅតាមបណ្ដាឈូងសមុទ្រមួយចំនួនមានបំណងងាយរកគោលការណ៍បរិស្ថានបៃតង ខណៈពួកគេព្យាយាមស្ទួយបរិស្ថាន និងកែសម្រួលសេដ្ឋកិច្ចដែលបញ្ចៀសពីប្រេង។
អារ៉ាប់រួម អេមីរ៉េត មានគោលដៅបង្កើនការពឹងអាស្រ័យលើថាមពលស្អាតរហូតដល់ ៥០ ភាគរយ នៅត្រឹមឆ្នាំ ២០៥០ និងកាត់បន្ថយសារធាតុកាបោនពីម៉ាស៊ីនភ្លើងដល់ ៧០ភាគរយ។
ទីក្រុងអាប៊ូដាប៊ី ស្ថិតក្នុងចំណោមទីក្រុង ៧ នៅតំបន់អារ៉ាប់ រួមជាមួយ ឌូបៃ បានឱ្យដឹងថា ខ្លួនកំពុងកសាងរោងចក្រសូឡាមួយទីតាំងដ៏ធំបំផុតក្នុងលោក ដែលនឹងមានសមត្ថភាពផ្ដល់ថាមពលអគ្គិសនីផ្គត់ផ្គង់ប្រមាណ ១៦ ម៉ឺនផ្ទះនៅទូទាំងប្រទេសក្នុងឆ្នាំ ២០២២។
លោក ខាលេដ ចាម៉ាល់ អាល់-ហ្វាលី បាននិយាយ ផ្ទះរបស់លោកប្រើថាមពលសូឡាសុទ្ធ និងទទូចឱ្យរដ្ឋាភិបាលធ្វើការសម្រេចចិត្ដឱ្យប្រាកដប្រជាក្នុងការប្រយុទ្ធប្រឆាំងនឹងបម្រែបម្រួលអាកាសធាតុ។
លោក ហ្វាលី បានបន្ដថា គំនិតគិតចង់ចាកចេញពីសភាពពិតនៃសីតុណ្ហភាពដ៏ក្ដៅជាសកលគឺ «មិនអាចទៅរួចនោះទេ»៕ AFP/HR