.jpg)
ព្រះនាង ម៉ាកុ និងលោក កៃ កូមូរុ បានសម្រេចព្រះហឬទ័យចូលរោងការដោយមិនចាំបាច់មានពិធីតាមប្រពៃណី។ AFP
ក្រុងតូក្យូ៖ វិថីស្នេហាប្រាកដជាមិនភ្លឺរលោងដូចក្រាលកៅស៊ូឡើយ តែក្រោយពីបញ្ហាចម្រូងចម្រាសជាសាធារណៈ និងការពន្យាថ្ងៃមង្គលរួចមក ព្រះនាងម្ចាស់ជប៉ុន ម៉ាកុ ត្រៀមខ្លួនចូលរោងការ និងរើទៅរស់នៅសហរដ្ឋអាមេរិក។
ព្រះរាជបុត្រីព្រះអង្គម្ចាស់គ្រងរាជ្យ តែងតែមានជួបបញ្ហាជាហូរហែចំពោះព្រះរាជបំណងរៀបពិធីអភិសេកជាមួយសំណព្វចិត្ដ កៃ កូមូរុ។
អ្នកទាំងពីរពេលនេះ បានសម្រេចចិត្ដរៀបមង្គលការដោយរំលងពិធីប្រពៃណីខ្លះ និងបដិសេធប្រាក់ដែលតែងតែធ្វើឡើងសម្រាប់រាជវង្សជាស្ដ្រីក្នុងការរៀបការចេញពីខ្សែរាជវង្ស។
ច្បាប់ស្នងរាជរបស់អធិរាជជប៉ុនបានចែងថា ព្រះនាងម្ចាស់ ព្រះជន្ម ២៩ ព្រះវស្សា នឹងបាត់បង់ព្រះបរមងារក្រោយពីរៀបអភិសេកជាមួយរាស្ដ្រ។ ប៉ុន្ដែលោក កូមូរុ នៅត្រូវបានស៊ើបអង្កេតលើការចោទប្រកាន់នានា ដែលម្ដាយរបស់លោកបានខ្ចីប្រាក់ពីអតីតគូស្នេហ៍ និងមិនបានសងវិញ។
ក្រោយពីមានការចុះផ្សាយពីការអះអាងទាំងនេះ កំហឹងបានផ្ទុះឡើងចំពោះគូស្នេហ៍ទាំងពីរនៅក្នុងប្រទេស ដែលសមាជិករាជវង្សត្រូវប្រណីបតន៍ទៅតាមស្ដង់ដារប្រាកដប្រជា។
ព្រះនាងម្ចាស់ ព្រះជន្ម ២៩ព្រះវស្សា នឹងបាត់បង់ព្រះបរមងារក្រោយពីរៀបអភិសេក។
ពួកគេបានពន្យាចូលរោងការ ហើយលោក កូមូរុ ផ្លាស់ទៅរស់នៅសហរដ្ឋអាមេរិកដើម្បីបន្ដការសិក្សាផ្នែកច្បាប់ ក្នុងបំណងដែលត្រូវបានមើលឃើញថា បញ្ចៀសចំណាប់អារម្មណ៍បែបអវិជ្ជមានមកលើពួកគេ។
ព្រះរាជទាយាទ អាគីស៊ីណុ កាលពីឆ្នាំមុន បានមានព្រះរាជបន្ទូលថា ព្រះអង្គគាំទ្រដល់ការអភិសេករបស់ព្រះបុត្រី តែព្រះនាងត្រូវទទួលបានការគាំទ្រពីមហាជនផងដែរ។
យ៉ាងណាមិញ ព្រះនាង ម៉ាកុ បានសម្រេចព្រះហឬទ័យចូលរោងការដោយមិនចាំបាច់មានពិធីតាមប្រពៃណី ស្របតាមព្រះរាជពិធីរបស់រាជវង្សឡើយ និងមិនបដិសេធប្រាក់ប្រគល់ជូនសមាជិករាជវង្សជាស្ដ្រី ដែលរៀបការជាមួយរាស្ដ្រសាមញ្ញ។
ទឹកប្រាក់ប្រាក់នោះមិនទាន់ដឹងច្បាស់ ទោះបីជារបាយការណ៍ជាច្រើនបានសរសេរថា យ៉ាងតិច ១៣៧ លានយ៉េន (១,២ លានដុល្លារ) យ៉ាងណាក៏ដោយ។
ព្រះនាងក៏ ត្រូវបានជឿថា មានផែនការរើទៅរួមរស់ជាមួយស្វាមីនៅសហរដ្ឋអាមេរិក ក្រោយរៀបអភិសេករួច ដែលស្រដៀងនឹងគូស្នេហ៍រាជវង្សចក្រភពអង់គ្លេស ព្រះអង្គម្ចាស់ ហាររី និងព្រះនាង មេហ្គាន ម៉ាកខល ផងដែរ៕ AFP/HR
ព្រះនាងម្ចាស់ ព្រះជន្ម ២៩ព្រះវស្សា នឹងបាត់បង់ព្រះបរមងារក្រោយពីរៀបអភិសេក។ AFP
