.jpg)
ខ្លាឃ្មុំផេនដាមួយក្បាលបានផ្ដល់កំណើតកូនភ្លោះនៅសួនសត្វក្រុងម៉ាទ្រីដ កាលពីថ្ងៃចន្ទ។
ក្រុងម៉ាទ្រីដ៖ ខ្លាឃ្មុំផេនដាយក្សមួយក្បាលបានផ្ដល់កំណើតកូនភ្លោះនៅសួនសត្វក្រុងម៉ាទ្រីដ កាលពីថ្ងៃចន្ទ នូវអ្វិដែលក្រុមមន្ដ្រីមានការអបអរយ៉ាងខ្លាំងនោះគឺ «ជាការចូលរួមចំណែកដ៏ធំធេង» ចំពោះកិច្ចការអភិរក្សពូជសត្វងាយរងគ្រោះទាំងនេះ។
សួនសត្វ Zoo Aquarium ក្រុងម៉ាទ្រីដ បានឱ្យដឹងថា ផេនដាញីមួយក្បាលឈ្មោះ ហួ ហ៊្សុយ បា បានផ្ដល់កំណើតកូនដំបូងនៅម៉ោង ៨:៣០ ព្រឹក ដោយប្រើរយៈពេល ៤ ម៉ោង ខណៈកូនទីពីរកើតមកនៅពេលថ្ងៃត្រង់។
វីដេអូឃ្លីបកូនដំបូងដែលចាប់កំណើតបានបង្ហាញរូបភាពកូនខ្លាឃ្មុំអត់រោម ពណ៌ផ្កាឈូក មានកាយវិការស្រវេស្រវាពេលបានឃើញពន្លឺ ដោយមេរបស់វាចាប់ផ្ដើមសម្អាតរាងកាយ និងដាក់វាលើពោះ។
កូនខ្លាឃ្មុំផេនដាទាំងពីរក្បាលនឹងរស់ពឹងអាស្រ័យទាំងស្រុងលើមេក្នុងរយៈពេល ៤ ខែដំបូង រហូតដល់ពួកវាអាចដើរដោយខ្លួនឯង។ នេះបើយោងតាមសេចក្ដីថ្លែងការណ៍របស់សួនសត្វ។
អ្នកបច្ចេកទេសពីរនាក់មកពីមជ្ឈមណ្ឌលបង្កាត់ពូជផេនដាក្រុងឈិងឌូ ប្រទេសចិន នឹងជួយពេទ្យសត្វក្នុងស្រុកក្នុងការថែទាំកូនផេនដា ដែលភេទរបស់ពួកវាមិនត្រូវបានសម្គាល់នោះទេ។
វីដេអូឃ្លីបកូនដំបូងដែលចាប់កំណើតបានបង្ហាញរូបភាពកូនខ្លាឃ្មុំអត់រោម ពណ៌ផ្កាឈូក។
ពួកវាទាំងពីរក្បាលគឺជាកូនទី៥ និងទី៦ របស់មេ ហួ ហ៊្សុយ បា ជាមួយដៃគូឈ្មោះ ប៊ីង ស៊ីង។
សួនសត្វបានឱ្យដឹងទៀតថា៖ «កំណើតរបស់ពួកវាគឺជាការចូលរួមចំណែកយ៉ាងធំដល់កិច្ចការអភិរក្សពពួកសត្វរងការគំរាមកំហេង។ សត្វផេនដាញីរមែងមានកូនពីរក្នុងពេលតែមួយ។
យោងតាមអ្នកជំនាញ បានឱ្យដឹងថា ការបន្ដពូជរបស់សត្វផេនដា ទាំងនៅសួនសត្វ និងក្នុងព្រៃ ពិតជាមានការលំបាកខ្លាំង ដោយសារសត្វតិចតួចណាស់ដែលមានអារម្មណ៍ចង់បង្កកំណើត ទោះបីជាពួកវាចង់ ពួកវាក៏មិនចេះដោយញីដោយឈ្មោលថែមទៀត។
បញ្ហាកាន់តែស្មុគស្មានទៀតនោះ ទ្វារបើកទទួលការបង្កកំណើតហាក់តូចចង្អៀតដោយសារផេនដាញីមានកម្ដៅរាងកាយតែម្ដងគត់ក្នុងមួយឆ្នាំ ត្រឹមតែមួយ ឬពីរថ្ងៃប៉ុណ្ណោះ។
ផេនដាយក្សត្រូវបានចុះបញ្ជីជាពូជសត្វជិតផុតពូជដោយសហភាពអន្ដរជាតិសម្រាប់ការអភិរក្សធម្មជាតិ ដោយមានសត្វប្រមាណតិចជាង ២ ០០០ ក្បាល នៅមានវត្ដមានក្នុងព្រៃ៕ AFP/HR
កូនខ្លាឃ្មុំផេនដាទាំង២ក្បាលនឹងរស់ពឹងអាស្រ័យទាំងស្រុងលើមេក្នុងរយៈពេល ៤ ខែដំបូង។
