ក្រុងវ៉ាលែនស្យា៖ ពិធីបុណ្យ «ហ្វាឡាស» នៃក្រុងវ៉ាលែនស្យា បានបញ្ចប់ទៅដោយការដុតកាំជ្រួច និងរូបសំណាកចម្រុះពណ៌នាចុងសប្ដាហ៍ ក្រោយការប្រារឰពិធីក្នុងទីក្រុងភាគខាងកើតអេស្ប៉ាញ ត្រូវបានអនុញ្ញាតឡើងវិញអំឡុងពេលវិបត្ដិកូវីដ។
ពិធីបុណ្យប្រពៃណីរយៈពេល ៥ ថ្ងៃ ធ្លាប់តែធ្វើក្នុងខែមីនា ត្រូវបានលុបចោលកាលពីឆ្នាំមុន ខណៈវិបត្ដិកូវីដញាំញីប្រទេសអេស្ប៉ាញខ្លាំង។
ឆ្នាំនេះ ក្រុមមន្ដ្រីបានពន្យារហូតដល់ថ្ងៃទី ១ ខែកញ្ញា ក្នុងការធ្វើពិធីបុណ្យ ហ្វាឡាស ដែលត្រូវបានទទួលស្គាល់ដោយអង្គការយូនីស្កូ។
នេះជាលើកដំបូង ដែលពិធីបុណ្យនេះត្រូវបានផ្អាក រាប់ចាប់តាំងពីពេលបញ្ចប់សង្គ្រាមស៊ីវិលអេស្ប៉ាញឆ្នាំ ១៩៣៦-៣៩។
រៀងរាល់ឆ្នាំ ពលរដ្ឋផលិតរូបសំណាកទីមោងចម្រុះពណ៌រាប់រយ ពីឈើ ស្នោ និងក្រដាសស្អិត ដោយខ្លះធំប៉ុនអគារកម្ពស់ ៤ ជាន់។
ដោយមានឈ្មោះថា «ninots» រូបសំណាករំលេចនូវតួអង្គក្នុងព្រេងនិទានកថា និងរូបអ្នកនយោបាយ និងតារាល្បីៗក្នុងទម្រង់គំនូរជីវចល។
រូបសំណាក ninots ត្រូវបានដាក់តាំងបង្ហាញនៅតាមដងវិថីនៃទីក្រុងមេឌីទែរ៉ាណេ រួចដុតចោលនៅថ្ងៃបុណ្យចុងក្រោយ ដែលជាភ្នក់ភ្លើងដ៏សន្ធោសន្ធៅហៅថា «ក្រេម៉ា» ជាប្រពៃណីច្រើនសតវត្សរ៍ ដើម្បីឧទ្ទិសដល់បរិបាលជាងឈើ St Joseph។
កាំជ្រួចរំលេចនូវភាពស្រស់ស្អាតនៃស្បៃរាត្រី ខណៈឆ្នាំនេះ មានការដុតរូបសំណាកប្រមាណ ៧៥០ ឈុត ត្រូវបានប្រារឰឡើងដោយគ្មានអ្នកអបអររាប់ពាន់នាក់ ដូចបណ្ដាមុនកូវីដ។
ភ្នក់ភ្លើងនៃការបញ្ចប់កម្មវិធីបុណ្យត្រូវបានធ្វើឡើងរយៈពេល ២ ម៉ោង មុនបម្រាមគោចរទប់ស្កាត់វីរុសចូលជាធរមាននៅម៉ោង ១ រំលងអធ្រាត្រ។
វិបត្ដិកូវីដបានបង្ខំឱ្យអេស្ប៉ាញលុបចោលព្រឹត្ដិការណ៍ប្រពៃណីធំៗជាច្រើន រួមទាំងពិធីបុណ្យគោដេញជល់ ផាមប្លូណា និងបុណ្យ Seville''s Holy Week៕ AFP/HR