ក្រុងព្រីស្ទីណា៖ ក្រុមគ្រូពេទ្យបានវះកាត់កូសូវ៉ូម្នាក់បាននិយាយកាលពីថ្ងៃអង្គារថា គាត់បានយកទូរស័ព្ទដៃមួយគ្រឿងចេញពីក្រពះអ្នកទោសម្នាក់ដោយជោគជ័យ បួនថ្ងៃបន្ទាប់ពីបុរសនោះបានលេបឧបករណ៍ទាំងមូល។
អ្នកទោសអាយុ ៣៣ ឆ្នាំ ដែលអត្តសញ្ញាណមិនត្រូវបានបង្ហាញនោះ ត្រូវបានបញ្ជូនទៅព្យាបាលនៅគ្លីនិកក្រពះពោះវៀននៃមន្ទីរពេទ្យព្រីស្ទីណាកាលពីសប្តាហ៍មុន បន្ទាប់ពីមានការត្អូញត្អែអំពីការឈឺក្រពះអស់ជាច្រើនថ្ងៃ។
វេជ្ជបណ្ឌិត ស្គេនឌើរ តេឡាគូ ដែលដឹកនាំការវះកាត់បានដឹងថា អ្នកទោសរូបនោះបានលេបទូរស័ព្ទស៊េរីចាស់តូច ១ គ្រឿង ហើយត្រូវការវះកាត់យកវាចេញពីពោះបាន។
លោកបានប្រាប់ទីភ្នាក់ងារ AFP ថា៖ «ដោយប្រើវិធីសុងក្រពះ ដូច្នេះយើងមិនចាំបាច់វះកាត់ ចោះក្រពះហើយយើងបានដកទូរស័ព្ទចេញជា ៣ ផ្នែក»។
អ្នកជំងឺបានប្រាប់គ្រូពេទ្យថា ទូរស័ព្ទស្ថិតនៅក្នុងពោះរបស់ខ្លួនអស់រយៈពេល ៤ ថ្ងៃហើយ។
លោក តេឡាគូ បាននិយាយថា ដំណើរការវះកាត់ត្រូវប្រើពេលជាង ២ ម៉ោង ដោយពុំមានឧបសគ្គ។
យ៉ាងណាមិញ វេជ្ជបណ្ឌិតរូបនេះបានបន្ថែមថា៖ «អ្វីដែលយើងបារម្ភនោះគឺថ្មទូរស័ព្ទនៅក្នុងក្រពះ វាផ្ទុកជាតិអាស៊ីដដែលអាចនឹងធ្លាយចូលក្រពះរបស់អ្នកជំងឺ»។
លោកបានប្រៀបធៀបថា៖ «វាបីដូចជាការដើរនៅចម្ការមីនប៉ុ ន្តែសំណាងល្អ អ្វីៗដំណើរការទៅដោយរលូន»។
បន្ទាប់មកប៉ូលីសបានយកទាំងអ្នកជំងឺ និងទូរស័ព្ទដៃម៉ូឌែលដើមទសវត្សរ៍ឆ្នាំ ២០០០ ត្រឡប់ទៅពន្ធនាគារវិញ។
មកទល់ពេលនេះ នៅមិនទាន់ច្បាស់នៅឡើយទេថា តើមកពីមូលហេតុអ្វីបានជាបុរសនោះអាចលេបទូរស័ព្ទទាំងមូលបាន។
ក្រុមគ្រូពេទ្យជឿជាក់ថាឧបករណ៍នេះត្រូវបានរត់ពន្ធចូលទៅក្នុងពន្ធនាគារ ដើម្បីឱ្យអ្នកទោសអាចប្រើប្រាស់ទំនាក់ទំនងពិភពខាងក្រៅដោយខុសច្បាប់។
យ៉ាងណាមិញ ប៉ូលិសមិនបានបញ្ជាក់ និងមិនធ្វើអត្ថាធិប្បាយអំពីករណីនេះទេ៕ AFP/HR