ក្រុងកូប៉ិនហាក៖ សារមន្ទីរដែលនឹងដាក់តាំងកំណប់ទ្រព្យវត្ថុបុរាណបានឱ្យដឹងពីថ្ងៃចន្ទថា អ្នកស្ម័គ្រចិត្តផ្នែកបុរាណវិទ្យាម្នាក់បានរកឃើញវត្ថុមាសចំនួន ២២ មាននិមិត្តសញ្ញានៅសតវត្សរ៍ទី៦ ដែលអាចផ្តល់ព័ត៌មានលម្អិតអំពីប្រជាជនមុនសម័យកាលវីគីងនៅប្រទេសដាណឺម៉ាក។
លោក មេដស៍ រ៉ាវន៍ ប្រធានផ្នែកស្រាវជ្រាវនៅសារមន្ទីរ Vejle នៅភាគខាងលិចប្រទេសដាណឺម៉ាកបានប្រាប់ AFP ថា វត្ថុខ្លះមានគំនូរ និងសិលាចារឹក ដែលអាចសំដៅលើអ្នកគ្រប់គ្រងសម័យនោះ ប៉ុន្តែក៏រំឭកឡើងវិញនូវទេវកថាន័រស៍ផងដែរ។
អ្នកបុរាណវិទ្យាស្ម័គ្រចិត្តបានប្រើឧបករណ៍រាវរកលោហៈក្នុងការស្រាវជ្រាវរហូតប៉ះទីតាំងកំណប់មាស។
យោងតាមលោក រ៉ាវន៍ កំណប់មាសមានទម្ងន់ប្រហែល ១ គីឡូក្រាម។
លោកបាននិយាយថា បំណែកមួយនៃវត្ថុមាសសំដៅលើអធិរាជរ៉ូម ខនស្តានទីន ចាប់ពីដើមសតវត្សរ៍ទី៤។
លោក រ៉ាវន៍ បានបន្ថែមថា៖ «ការរកឃើញមានវត្ថុមាសជាច្រើនរួមទាំងមេដាយទំហំប៉ុនកូនចាន»។
យោងតាមការពិនិត្យដំបូង រតនសម្បត្តិអាចត្រូវបានគេកប់ទុកជាតង្វាយដល់ព្រះនៅពេល ដែលមានភាពច្របូកច្របល់នៃអាកាសធាតុនៅអឺរ៉ុបខាងជើងប្រែទៅជាត្រជាក់ជាងមុន បន្ទាប់ពីការផ្ទុះភ្នំភ្លើងនៅអ៊ីស្លង់ឆ្នាំ ៥៣៦ បានបញ្ជូនពពកផេះទៅលើមេឃគ្រប់ជិតបរិយាកាស។
លោកបាននិយាយថា៖ «មាននិមិត្តសញ្ញាជាច្រើនដែលពុំធ្លាប់ឃើញពីមុនមក ហើយវានឹងជួយឱ្យយើងពង្រីកចំណេះដឹងអំពីប្រជាជននៅសម័យនេះ»។
កំណប់នេះត្រូវបានគេរកឃើញនៅជិតទីក្រុងជេលីង ភាគនិរតីនៃប្រទេសដាណឺម៉ាក ដែលអ្នកប្រវត្តិសាស្ត្រចាត់ទុកថា កំណើតនៃស្តេចយុគសម័យវីគីង ដែលមានអាយុកាលចន្លោះពីសតវត្សរ៍ទី៨ ដល់ទី១២ ។
កំណប់ទ្រព្យនេះ នឹងត្រូវដាក់តាំងនៅសារមន្ទីរក្នុងទីក្រុង Vejle ចាប់ពីខែកុម្ភៈ ឆ្នាំ ២០២២៕ AFP/HR