ក្រុងម៉ាទ្រីដ៖ ស្ដ្រីវ័យ ១៩ ឆ្នាំម្នាក់ កំពុងព្យាយាមទាមទារសំណងរាប់លានអឺរ៉ូក្រោយពីមានហេតុការណ៍ ដែលនាងត្រូវបានផ្លាស់ប្ដូរជាមួយទារិកាមួយផ្សេងទៀតនៅមន្ទីរពេទ្យអេស្ប៉ាញមួយកាលពីជិត ២ ទសវត្សរ៍មុន។
ទារិកាទាំងពីរត្រូវបានដាក់ច្រឡំគ្នាក្នុងឆ្នាំ ២០០២ ក្រោយពីពួកគេកើតខុសគ្នា ៥ ម៉ោង និងបានដាក់ក្នុងទូរចិញ្ចឹមនៅមន្ទីរពេទ្យ San Millan de Logrono ភាគខាងជើងប្រទេសអេស្ប៉ាញ ដោយសារតែ «បញ្ហាខុសបច្ចេកទេសរបស់មនុស្សដ៏មហាកម្រ»។ នេះបើយោងតាមអាជ្ញាធរសុខាភិបាលក្នុងតំបន់។
កំហុសឆ្គងនេះត្រូវបានរកឃើញកាលពី ៤ ឆ្នាំមុន ក្រោយពីយុវតីម្នាក់ ដែលត្រូវបានប្ដូរ បានធ្វើតេស្ដ DNA ជាផ្នែកមួយនៃជម្លោះលើការចំណាយអាហារកិច្ចរបស់កូន។
មេធាវី ចូស សែស-ម៉រហ្គា បានប្រាប់ AFP ថា ពេលនេះ យុវតី អាយុ ១៩ ឆ្នាំ កំពុងទាមទារប្រាក់សំណង ៣ លានអឺរ៉ូ (៣,៥ លានដុល្លារ) ពីអាជ្ញាធរសុខាភិបាលចំពោះការប្រគល់កូនខុសឪពុកម្ដាយបង្កើត។
លោកបាននិយាយថា៖ «យើងកំពុងនិយាយអំពីការខូចខាតដ៏សម្បើម ដែលនឹងធ្វើឱ្យមានការផ្លាស់ប្ដូរជីវិតគាត់ និងមិនអាចប៉ះប៉ូវវិញបាន»។
លោកបានបន្ដថា អាជ្ញាធរសុខាភិបាលក្នុងតំបន់រីអូចា ពេលនេះបានផ្ដល់ឱ្យយុវតីរូបនេះ ដែលចង់រក្សាភាពអនាមិក នូវសំណងទឹកប្រាក់ ២១៥ ០០០ អឺរ៉ូ (២៥៤ ០០០ ដុល្លារ)។
ប្រធានសុខាភិបាលតំបន់ សារ៉ា អាល់បា បាននិយាយថា ប្រព័ន្ធកុំព្យូទ័រកាលពីជំនាន់នោះមិនមានព័ត៌មានលម្អិត ដូចបច្ចុប្បន្ននេះទេ និងបានសង្កត់ធ្ងន់ថា ករណីច្រឡំគ្នាស្រដៀងនេះមិនអាចកើតឡើងម្ដងទៀតនោះទេ។
អ្នកស្រីបានថ្លែងក្នុងសន្និសីទកាសែតមួយកាលពីថ្ងៃអង្គារថា ក្រុមមន្ដ្រីមិនបានដឹងអំពីករណីដទៃទៀតនៅមន្ទីរពេទ្យនោះ ដែលក្រោយមកបានបិទទ្វារ។
អ្នកស្រី អាល់បា បានបន្ដថា៖ «យើងមិនអាចកំណត់ថា តើនរណាគួរត្រូវតែទទួលការបន្ទោសចំពោះកំហុងនេះឡើយ។ វាជាបញ្ហាបច្ចេកទេសដ៏កម្របំផុត ដែលមិនអាចកើតឡើងនៅពេលបច្ចុប្បន្នជាដាច់ខាត។ យើងអាចធានាថា វានឹងមិនកើតឡើងឡើយ»។
មេធាវី សែស-ម៉រហ្គា បានឱ្យដឹងថា យុវតីម្នាក់ទៀតដែលត្រូវបានច្រឡំពេលប្រសូត និងត្រូវបានប្រគល់ឱ្យគ្រួសារផ្សេង ក៏បានធ្វើតេស្ដ DNA ដែរ។
លោកបានបន្ថែមថា យុវតីបានស្នើសុំមិនបញ្ចេញអត្ដសញ្ញាណ មកទល់ពេលនេះពុំបានដាក់ពាក្យបណ្ដឹងទេ។
យោងតាមរបាយការណ៍ពីអេស្ប៉ាញ ទារិកាម្នាក់ត្រូវបានប្រគល់ឱ្យបុរសស្ត្រីមួយគូដែលជាឪពុកម្ដាយរបស់នាង រីឯទារិកាមួយទៀត ដែលធំឡើងបានដាក់ពាក្យបណ្ដឹង ត្រូវបានចិញ្ចឹមបីបាច់ដោយស្ត្រីម្នាក់ដែលនាងតែងយល់ច្រឡំថាគឺជាជីដូនបង្កើតរបស់នាង៕ AFP/HR