ក្រុងវេនិក៖ ការសារស័ព្ទដ៏រំជួលចិត្តពីផលិតករកុនអាហ្វហ្គានីស្ថាននៅមហោស្រពភាពយន្ដក្រុងវេនិក កាលពីចុងសប្ដាហ៍ ខណៈផលិតករភាពយន្ដស្ដ្រី ២ នាក់ ព្រមានប្រឆាំងនឹងការសន្យារបស់ក្រុមតាលីបង់។
ផលិតករ សារ៉ា ការីមី អាយុ ៣៨ ឆ្នាំ បានប្រាប់ក្រុមអ្នកសារព័ត៌មាននៅមហោស្រពភាពយន្ដថា៖ «គ្រាន់តែ ២ សប្ដាហ៍ បុគ្គលឆ្នើមភាគច្រើននាំគ្នាចាកចេញពីមាតុភូមិ រាប់ពីអ្នកដែលមានលទ្ធភាពភៀសខ្លួន»។
អ្នកស្រី ការីមី ដែលបានឈ្នះពានរង្វាន់អន្ដរជាតិជាច្រើនចំពោះស្នាដៃរបស់ខ្លួនបានបន្ដថា៖ «ចូរស្រមៃមើលថា តើប្រទេសមួយអត់មានអ្នកសិល្បៈវាទៅជាយ៉ាងម៉េច?»។
ឧស្សាហកម្មភាពយន្ដអាហ្វហ្គានីស្ថាន ត្រូវបានបញ្ឈប់ទាំងស្រុងត្រឹមវេលាអន្ដរកាលរយៈពេលតែប៉ុន្មានម៉ោង ក្រោយពីក្រុមតាលីបង់គ្រប់គ្រងប្រទេសកាលពីខែមុនបន្ទាប់ពីទាហានអាមេរិកបានដកចេញ។
អ្នកស្រីបានបន្ថែមថា៖ «ភាពយន្ដនៅក្នុងស្ដុកកំពុងត្រូវបានត្រួតពិនិត្យដោយក្រុមតាលីបង់។ ការងាររបស់ផលិតករត្រូវបានបញ្ចប់ត្រឹមរយៈពេលប៉ុន្មានម៉ោង។ អ្នកខ្លះបានចាកចេញដោយយកកុំព្យូទ័រយួរដៃ តែខ្លះទៀតអត់បានអីទៅសោះ»។
មិត្ដភក្ដិអ្នកស្រីឈ្មោះ សារ៉ា ម៉ានី ដែលល្បីដោយសារស្នាដៃភាពយន្ដឯកសារអំពីជនរងគ្រោះពីការរំលោភដោយសាច់ញាតិ «កុមារីមួយពាន់នាក់ដូចរូបខ្ញុំ» បានបន្ថែមថា៖ «ការដួលរលំនេះមានន័យថា យើងបាត់បង់អ្វីៗគ្រប់យ៉ាង»។
ជាមួយភាពភ័យខ្លាចតែប្ដេជ្ជាចិត្ដខ្ពស់ អ្នកស្រី ម៉ានី បានប្រើប្រាស់គំរូសាលារៀនតន្ដ្រីចម្រុះតែ ១ គត់របស់ក្រុងកាប៊ុល។
អ្នកស្រីបាននិយាយទាំងទឹកភ្នែករហាមថា៖ «ក្រុមតាលីបង់ឥឡូវកំពុងគ្រប់គ្រងអគារនោះ។ ពួកគេបានបំផ្លាញឧបករណ៍សិក្សា ហើយសិស្សក៏នាំគ្នាលាក់ខ្លួនផងដែរ»។
អ្នកស្រី ម៉ានី ដែលក្លាយជាប្រធានអង្កភាពភាពយន្ដអាហ្វហ្គានីស្ថានដំបូងក្នុងឆ្នាំ ២០១៩ បាននិយាយអំពីការរត់ភៀសខ្លួន កាលពីថ្ងៃទី ១៥ ខែសីហាថា៖ «ខ្ញុំកំពុងធ្វើការធម្មតាសុខៗស្រាប់តែប៉ុន្មានម៉ោងក្រោយមក ខ្ញុំត្រូវធ្វើការសម្រេចចិត្ដដ៏តឹងតែងក្នុងឆាកជីវិតថា តើត្រូវនៅ ឬចាកចេញពីប្រទេស?»។
អ្នកស្រីបានបន្តថា៖ «យើងជាអ្នកសម្ដែង អ្នកដឹកនាំរឿង ផលិតករ យើងមិនមែនអ្នកនយោបាយទេ។ យើងគ្រាន់តែបង្កើតក្ដីសុបិនរបស់យើងប៉ុណ្ណោះ»៕ AFP/HR