ក្រុងហាណូយ៖ តាមដងវីថីធ្លាប់តែអ៊ូអរប្រែជារហោស្ថាន រានដាលតូចៗក្នុងក្រុងហាណូយ បានក្លាយជាទីកន្លែងសម្រាប់សកម្មភាពផ្សេងៗ។
ខណៈពលរដ្ឋក្រុងហាណូយត្រូវបានបិទខ្ទប់ រានហាលក្លាយជាទីជ្រកជ្រៀតសម្រាប់ដាក់តុធ្វើការងារ ក្រាលកម្រាលយោគៈ និងកន្លែងអង្គុយក្រេបកាហ្វេស្រូបខ្យល់បរិសុទ្ធនៅបរិវេណដ៏តូចនោះ។
មនុស្ស ៨លាននាក់រស់នៅក្នុងទីក្រុងរបស់វៀតណាមនេះ ស្ថិតក្នុងបម្រាមដ៏តឹងរឹងតាំងពីចុងខែកក្កដា ដែលត្រូវបាអនុញ្ញាតឱ្យធ្វើដំណើរទៅកាន់ម្ហូបអាហារ ឬមន្ទីរពេទ្យប៉ុណ្ណោះ។
ថ្វីដ្បិតតែវិធានការរបិទខ្ទប់ត្រូវបានបន្ធូរបន្ថយនៅតាមតំបន់ខ្លះនៃទីក្រុងយ៉ាងណាក៏ដោយ ក៏ពលរដ្ឋភាគច្រើនត្រូវសម្ងំតែក្នុងផ្ទះយ៉ាងតិច ២សប្ដាហ៍ទៀត ដោយសារអត្រានៃការស្លាប់ដោយសារជំងឺកូវីដបន្ដហក់ឡើង។
អ្នកស្រី ង្វៀង ស៊ួន អាញ បុគ្កលិកការិយាល័យ ដែលរស់នៅក្នុងប្លុកអគារខ្ពស់ៗ បាននិយាយថា៖ «ទំនាក់ទំនងជាមួយពិភពខាងក្រៅតែមួយគត់របស់ខ្ញុំគឺនៅរានហាលតូចនេះហើយ»។
អ្នកស្រី អាញ បានប្រជ្រៀតដាក់តុនៅរានហាលទំហំ ៣ម៉ែត្រការ៉េ ជាកន្លែងធ្លាប់ដាក់រុក្ខជាតិលម្អ។ វាតូច តែធំល្មមសម្រាប់អ្នកស្រីអង្គុយធ្វើការជាមួយកុំព្យូទ័រយួរដៃមួយគ្រឿង និងក្រេបកាហ្វេពេលព្រឹក គន់មើលភាពស្ងប់ស្ងាត់នៃដងវិថីនានា ដែលធ្លាប់តែណែនណាន់។
អ្នកស្រី អាញ បានប្រាប់ AFP ថា៖ «កាលពេលមុន ខ្ញុំមិនមានពេលសូម្បីតែឈរបាន ៥នាទីលើរានហាលនេះ។ ឥឡូវ វាក្លាយជាកន្លែងប្រចាំរបស់ខ្ញុំ»។
ដោយមានបម្រាមហាត់ប្រាណនៅខាងក្រៅ វាគ្មានអ្វីចម្លែកដែលមើលឃើញមនុស្សម្នាក្រវែលក្រវិលតែនៅបរិវេណដ៏តូចចង្អៀតនេះនោះទេ។
លោក ត្រាន់ ទ្រុងឃ្វាន ជាវិស្វករ IT បាននិយាយថា៖ «ខ្ញុំសម្ងំនៅរានហាល នៅជ្រុងបន្ទប់ ស្ទើរតែពេញមួយថ្ងៃៗ។ សម្ងំនៅតែក្នុងផ្ទះអ៊ីចឹងពិតជាមិនល្អនោះទេ ដោយក្មេងៗបង្កបញ្ហាជាច្រើន ដែលយើងមិនអាចផ្ចត់អារម្មណ៍លើការងារបាន»។
វៀតណាម ដែលត្រូវបានកោតសរសើរចំពោះចំណាត់ការដោះស្រាយវិបត្ដិកូវីដនេះកាលពីឆ្នាំមុន កំពុងរងនូវផលប៉ះពាល់យ៉ាងខ្លាំងតាំងពីរលកទី៤ បានបក់បោកមកកាលពីខែមេសា។
ប្រទេសវៀតណាម បានរាយការណ៍ពីអត្រាឆ្លងជាង ៥០ម៉ឺននាក់ និងស្លាប់ជាង ១៣ ០០០ នាក់។ ទីក្រុង និងខេត្ដជាច្រើន រួមទាំង មជ្ឈមណ្ឌលជំនួញភាគខាងត្បូងក្រុងហូជីមិញ កំពុងស្ថិតនៅក្រោមវិធានការបិទខ្ទបរយៈពេលជាច្រើនខែ។
លោក ទ្រុង បានបន្ដថា៖ «ក្ដីប្រាថ្នារបស់ខ្ញុំតែមួយគត់នាពេលនេះគឺចង់ឱ្យដកបម្រាមបិទខ្ទប់។ ដូច្នេះខ្ញុំអាចទៅធ្វើការដូចមុនវិញ។ វាពិតជាមានសម្ពាធខ្លាំងណាស់សម្រាប់ខ្ញុំដែលធ្វើការចេញពីរានហាលដ៏ចង្អៀតនេះ»៕ AFP/HR