.jpg)
រូបតំណាង៖ លោកបង្កកសពម្ដាយដោយខ្ចប់ក្នុងថង់ទឹកកកនៅបន្ទប់ក្រោមដី។
ក្រុងវីយែន៖ ប៉ូលិសអូទ្រីស បានឱ្យដឹងកាលពីថ្ងៃព្រហស្បតិ៍ថា ពួកគេបានរកឃើញសាកសពស្ដ្រីម្នាក់អាយុ ៨៩ ឆ្នាំ ដែលបានស្លាប់កាលពីមួយឆ្នាំមុន និងត្រូវបានខ្ចប់រក្សាទុកក្នុងបន្ទប់ក្រោមដីដោយកូនប្រុស ដែលចង់បន្ដអត្ថប្រយោជន៍ពីម្ដាយ។
នៅក្នុងសេក្ដីថ្លែងការណ៍មួយ ប៉ូលិសបានឱ្យដឹងថា ម្ដាយដែលត្រូវបានជឿថាកើតជំងឺវង្វេង បានស្លាប់កាលពីខែមិថុនា ឆ្នាំមុន។
ពួកគេបានបន្ថែមថា៖ «បុរសអាយុ ៦៦ ឆ្នាំ បានរក្សាសពរបស់អ្នកស្រីដើម្បីបន្ដទទួលអត្ថប្រយោជន៍ផ្សេងជំនួសម្ដាយ»។
ជនសង្ស័យនេះ បានរស់នៅជាមួយម្ដាយនៅក្បែរទីក្រុង Innsbruck ក្នុងតំបន់ ទីរ៉ុល។ លោកបានសារភាពថា ក្រោយម្ដាយស្លាប់ ខ្លួនបានបង្កកសពម្ដាយដោយខ្ចប់ក្នុងថង់ទឹកកកនៅបន្ទប់ក្រោមដី ដើម្បីរក្សាសពកុំឱ្យធុំក្លិន។ បន្ទាបមក កូនប្រុសរូបនេះបានប្រើបង់រុំខ្ចប់សពដើម្បីស្រូបទឹកចេញពីសព។
រូបតំណាង៖ ត្រូវបានខ្ចប់រក្សាទុកក្នុងបន្ទប់ក្រោមដីដោយកូនប្រុស ដែលចង់បន្ដអត្ថប្រយោជន៍ពីម្ដាយ។
Helmut Gufler ទទួលបន្ទុកអង្គភាពបង្ក្រាបអំពើបោកប្រាសសន្ដិសុខសង្គម បានប្រាប់បណ្ដាញផ្សព្វផ្សាយ ORF ថា៖ «គាត់បានខ្ចប់សពម្ដាយជាមួយចំណីឆ្មា ដែលទីបំផុតសពនោះក្លាយជាម៉ាំងមី»។
ពេលបងប្អូនប្រុសរបសបុរសរូបនោះមកសាកសួររឿងម្ដាយ លោកបាននិយាយថា ម្ដាយទៅសម្រាកព្យាបាលនៅពេទ្យ។ ជនសង្ស័យរូបនេះ បានទទួលអត្ថប្រយោជន៍របស់ម្ដាយពីប្រៃសណីយរៀងរាល់ខែ តែអ្នករត់សំបុត្រប្រៃសណីយថ្មីបានស្នើសុំជួបអ្នកទទួលអត្ថប្រយោជន៍។
ពេលកូនប្រុសបដិសេធ អ្នករត់សំបុត្របានរាយការណ៍ទៅកាន់អាជ្ញាធរ ហើយសពត្រូវបានរកឃើញនៅថ្ងៃសៅរ៍។
បុរសរូបនេះបានទទួលប្រាក់ ៥ម៉ឺនអឺរ៉ូ (៥៩០០០ដុល្លារ) តាំងពីខែមិថុនា ឆ្នាំ ២០២០ ពីការផ្ដល់ប្រាក់នេះ។ ការធ្វើកោសលវិច្ឆ័យសពបានបង្ហាញថា បុរសរូបនេះមិនបានសម្លាប់ម្ដាយ។ ជនសង្ស័យត្រូវបានចោទប្រកាន់ពីបទបន្លំទទួលប្រាក់អត្ថប្រយោជន៍ និងលាក់សពក្នុងផ្ទះ៕ AFP/HR
រូបតំណាង៖ ប៉ូលិសបានឱ្យដឹងថា ម្ដាយ ដែលត្រូវបានជឿថាកើតជំងឺវង្វេង បានស្លាប់កាលពីខែមិថុនា ឆ្នាំមុន។
