.jpg)
ក្រុងប៉េកាំងព្យាយាមតម្រែតម្រង់វប្បធម៌យុវវ័យ ភាពរឹងមាំរបស់យេនឌ័រ។
ក្រុងប៉េកាំង៖ អាជ្ញាធរចិនបានបង្គាប់ឱ្យក្រុមហ៊ុនហ្គេមយក្សបញ្ចប់ការសម្លឹងឃើញតែប្រាក់ចំណូល និងកាត់មាតិកាបង្ហាញរូបភាពតួអង្គ «ស្រីមិនស្រី ប្រុសមិនប្រុស» ខណៈក្រុងប៉េកាំងព្យាយាមតម្រែតម្រង់វប្បធម៌យុវវ័យ ភាពរឹងមាំរបស់យេនឌ័រ និងទំនោរពេញនិយមនៃបច្ចេកវិទ្យាធំៗ។
វិធានការនេះត្រូវបានដាក់ចេញចុងក្រោយបំផុតដោយអាជ្ញាធរ ដើម្បីរឹតបន្តឹងដើម្បីគ្រប់គ្រងវិស័យបច្ចេកវិទ្យា ដែលធ្វើឱ្យក្រុមហ៊ុនមួយចំនួនធ្លាក់តម្លៃផ្សារហ៊ុនយ៉ាងខ្លាំង។
ក្រុមមន្ដ្រី កាលពីថ្ងៃពុធ បានកោះហៅក្រុមហ៊ុនធំៗ រួមទាំង Tencent និង NetEase ជាអ្នកដឹកនាំផ្សារហ៊ុនចម្បងពីរក្នុងឧស្សាហកម្មហ្គេមប្រាក់រាប់ពាន់លានដុល្លាររបស់ចិន ដើម្បីជជែកពីវិធានការទប់ស្កាត់បន្ដទៀត បន្ទាប់ពីការកំណត់ម៉ោងពេលលេងហ្គេមរបស់កុមារមកត្រឹម ៣ម៉ោងក្នុងមួយសប្ដាហ៍។
ចំណោមគោលដៅថ្មីៗគឺជាតារាតំណាងផលិតផល ដែលក្រុមអ្នកជំនាញនិយាយថា បានបង្កការខិងសម្បារពីសំណាក់អ្នកអភិរក្សនិយម ជាពិសេស មនុស្សជំនាន់មេដឹកនាំកុម្មុយនិស្ដមុនៗ។
រូបតំណាង៖ ក្រុមអ្នកកេភេទ និងភេទទីបីជួបជុំគ្នាក្នុងកម្មវិធីសិល្បៈនៅក្រុងប៉េកាំង។
កាលពីប៉ុន្មានថ្ងៃនេះ និយតករបានបង្គាប់ឱ្យប្រព័ន្ធផ្សព្វផ្សាយបញ្ចប់ការផ្សាយ «ទស្សនីយភាពអប្រក្រតី» ដូចជា «ភាពម្ញ៉េកម្ញ៉ក់» ដោយទទូចឱ្យពង្រឹងភាពជាបុរសមកធ្វើជាអ្នកតំណាងកម្មវិធី។
កាលពីថ្ងៃពុធកន្លងទៅ Xinhua បានរាយការណ៍ពីសេចក្ដីបង្គាប់របស់រដ្ឋាភិបាលជាច្រើនទៅលើឧស្សាហកម្មហ្គេម។
របាយការណ៍បានឱ្យដឹងថា៖ «មាតិកាអាសអាភាស និងហិង្សា ក៏ដូចជាអ្វីដែលប៉ះពាល់ដល់សង្គម រួមមាន កម្មវិធីយកលុយជាធំ និងបង្ហាញភាពទន់ជ្រាយរបស់បុរស គួរតែលុបចេញ»។
អាជ្ញាធរបានព្រមានថា សហគ្រិន ដែលមិនគោរពតាមបទបញ្ញត្ដិនេះនឹងត្រូវទទួលពិន័យ។
ជំនួយការសាស្ដ្រាចារ្យនៃសកលវិទ្យាល័យក្រុងហុងកុង ហ្គេង សុង បាននិយាយថា ចំណាត់ការនេះ បានកើតឡើងតាមការរិះគន់ថា «បុរសឃ្យូតៗបង្ហាញពីភាពទន់ជ្រាយផ្លូវកាយ និងផ្លូវចិត្ដ» ដោយបានលើកឡើងថា «បុរសចរឹតស្រីមិនអាចការពារប្រទេសបានឡើយ»។
លោក សុង បានបន្ថែមថា បុគ្គលស្រឡាញភេទដូចគ្នាត្រូវបានមើលឃើញជាអប្រក្រតីភាពនៃយេនឌ័រ ដែលនាំមានការច្របូកច្របល់ចំពោះការប្រតិព័ទ្ធភេទណាមួយ និងមានអត្ដសញ្ញាណាមួយឱ្យពិតប្រាកដឡើយ៕ AFP/HR
ក្រុមមន្ដ្រី កាលពីថ្ងៃពុធ បានកោះហៅក្រុមហ៊ុនធំៗ រួមទាំង Tencent និង NetEase។
