ក្រុងឡូសអេនជឺលេស៖ ក្រោយពីរំលងឱកាសបុណ្យហាឡូវីន ១ ឆ្នាំមក យូនីវើសហ្សលស្ទូឌីយោហូលីវូដ (Universal Studios Hollywood) ដ៏ល្បីល្បាញបានលេងយ៉ាងអស់ដៃដោយបង្កការពញ្ញាក់ព្រឺព្រួច ដកស្រង់តាមខ្សែភាពយន្តភ័យរន្ធត់សម័យដើមមកតុបតែងជុំវិញឧទ្យានកម្សាន្តរបស់ខ្លួនឯរដ្ឋកាលីហ្វ័រនីញ៉ា។
ខណៈពេលដែលព្រឹត្តិការណ៍ «រាត្រីរន្ធត់ហាឡូវីន» កាលពីឆ្នាំមុនត្រូវបានលុបចោលដោយសារតែការរីករាលដាលនៃជំងឺកូវីដ ១៩ អ្នករៀបចំកម្មវិធីកំពុងបំផុសថា អតិថិជននៅឆ្នាំ ២០២១ នឹងមានអារម្មណ៍រំភើបរីករាយចំពោះយប់ដ៏គួរឱ្យភ័យខ្លាចជាងពេលណាៗទាំងអស់។
នាយកច្នៃប្រឌិតលោក ចន ម័រហ្វី បានប្រាប់ទីភ្នាក់ងារ AFP ក្នុងដំណើរទស្សនកិច្ចនៅពីក្រោយឆាកថា៖ «ភាពភ័យរន្ធត់ស័ក្ដិសមនឹងស្ថានភាពមានបញ្ហាបំផុតក្នុងជីវិត»។
ភាពយន្តខ្មោចនានា ដូចជារឿងបិសាចជញ្ជក់ឈាម Dracula ឆ្នាំ ១៩៣១ និងរឿងខ្មោចពីរ៉ាមីដ The Mummy ឆ្នាំ ១៩៣២ ជាដើម។
លោក ម័រហ្វី បាននិយាយថា៖ «ទាំងនេះ គឺជាខ្សែភាពយន្តល្បីៗ នៅសម័យមាសរបស់ពួកគេ។ ភាពភ័យរន្ធត់ឆ្លើយតបនឹងស្ថានភាពបច្ចុប្បន្ន ហើយការទស្សនាវាធ្វើឱ្យយើងដកឃ្លាចេញពីសង្គមដ៏គ្រោះថ្នាក់»។
អ្នកទស្សនាដែលប្រាថ្នាបទពិសោធព្រឺសម្បុរអាចមកកាន់ឧទ្យានកម្សាន្តនៅជុំវិញទីក្រុងឡូសអេនជឺលេស ដែលបានបើកឡើងវិញនៅខែមេសា បន្ទាប់ពីកូវីដ ១៩ បានវាយលុកក្រុងធំជាងគេទី២ នៅសហរដ្ឋអាមេរិក។
ទិដ្ឋភាពហាឡូវីនឆ្នាំនេះ ក៏មានភ្ជាប់នូវសាច់រឿងពាក់ម៉ាស់ទាញចូលបរិបទកូវីដ សម្រាប់បិសាចផងដែរ ដោយលោកបាននិយាយថា៖ «វាជាការបន្ថែមរសជាតិច្នៃប្រឌិតថែម»។
ឈរក្បែរធុងថ្លុកឈាម លោក ម័រហ្វី និយាយថា៖ «ភាពភ័យរន្ធត់ព្រឺព្រួចបង្រៀនយើងពីវិធីដោះស្រាយនឹងការភ័យខ្លាចផ្ទាល់ខ្លួន នៅក្នុងជីវិតប្រចាំថ្ងៃរបស់យើង»៕ AFP/HR