.jpg)
ពីឆ្វេងទៅស្ដាំ គីម កាដាសៀន តន្ត្រីករកាណាដា Grimes និង តារាចម្រៀងរ៉េប Lil Nas X។
ក្រុងញូវយ៉ក៖ ក្រុងញូវយ៉កនាថ្ងៃចន្ទត្រូវបានបំភ្លឺដោយតារាល្បីៗមកពីគ្រប់វិស័យ គ្រងឈុតហ្វេសសិនថ្លៃៗ មកចូលរួមរាត្រីសមោសរ ក្រោយពីខកខានដោយសារការរីករាលដាលនៃវីរុសកូរ៉ូណាអស់ជាច្រើនខែ។
ភ្ញៀវកិត្តិយសប្រមាណ ៤០០ នាក់ ជាតារាហូលីវូដលំដាប់ខ្ពស់ កំពូលអត្តពលិក អ្នកនិពន្ធ និងអ្នកសម្ដែងមានឈ្មោះបោះសំឡេង ដែលខ្លះបានចាក់វ៉ាក់សាំង និងខ្លះត្រូវបានធ្វើតេស្តអវិជ្ជមានកូវីដ ១៩។
អ្នកចូលរួមភាគច្រើនដែលមិនមានពាក់ម៉ាស់ នាំគ្នាដើរលើកម្រាលព្រំពណ៌សសាជាថ្មី ជម្នះវិបត្តិជំងឺឆ្លងសកល ក្រោយពីកម្មវិធីនេះខកខានប្រារព្ធកាលពីឆ្នាំមុន។
តារាចម្រៀងរ៉េប Lil Nas X ដែលម្នាក់ឯងលេងម៉ូដសម្លៀកបំពាក់ដល់ទៅ ៣ឈុត បកម្ដងមួយស្រទាប់ៗ។
តារារ៉េបស្រីអាមេរិក Megan Thee Stallion ដែលទើបតែមានឱកាសចូលរួមរាត្រីសមោសរនេះជាលើកដំបូង និងគ្រងឈុតរ៉ូបដ៏ប្រណីត បានប្រាប់ទីភ្នាក់ងារ AFP៖ «វាពិតជាមិនគួរឱ្យជឿសោះ! ខ្ញុំមានអារម្មណ៍ថា ឱព្រះអើយ យើងដូចកំពុងស្ថិតនៅក្រុងហ៊ូស្តុន រដ្ឋតិចសាស់សោះ»។
នាងបានបន្លឺឡើងថា៖ «ខ្ញុំពិតជារំភើបណាស់ដែលបានមកដល់ទីនេះ»។
យ៉ាងណាមិញ តារាចម្រៀងរូបនេះសារភាពថា នាងហាក់ដូចជាប្លែក និងភ្ញាក់ផ្អើលនឹងវត្តមានមនុស្សច្រើន ក្រោយពីវិបត្តិកូរ៉ូណាជាសកលបានធ្វើឱ្យមនុស្សម្នាសាំនឹងភាពឯកា។
ស្ថិតក្នុងចំណោមមនុស្សតិចតួចដែលពាក់ម៉ាស់ក្នុងកម្មវិធី តន្ត្រីករស្រីកាណាដា គ្រីមស៍ ដែលត្រូវបានគេស្គាល់ថាជាដៃគូស្នេហាជាមួយសេដ្ឋីប្រាក់ពាន់លានដ៏ល្បីល្បាញ អ៊ីឡុន ម៉ាស បានគ្រងឈុតប្លែកភ្នែកពណ៌ប្រផេះ ដោយលីដាវយ៉ាងចែងចាំង ជួយឱ្យនាងរក្សាគម្លាតពីភ្ញៀវដទៃទៀតយ៉ាងហោច១ម៉ែត្រកន្លះ។
កីឡាការិនីតេន្នីស ណាអូមី អូសាកា និងកីឡាការិនីកាយសម្ព័ន្ធ Simone Biles។ AFP
រឹតតែលេចធ្លោជាងគេនោះ គឺតារាចម្រៀងរ៉េប Lil Nas X ដែលម្នាក់ឯងលេងម៉ូដសម្លៀកបំពាក់ដល់ទៅ ៣ឈុត បកម្ដងមួយស្រទាប់ៗ ផ្ដើមចេញពីអាវគ្រងដូចស្ដេច រហូតដល់អ្នកចម្បាំងអាវក្រោសមាស និងចុងក្រោយអៀមខោប៉ាក់ឌិនបែបសិល្បករ។
រីឯអត្តពលិកកាយសម្ព័ន្ធ Simone Biles ដែលទើបតែស្រក់ទឹកភ្នែកនៅកីឡាអូឡាំពិកក្រុងតូក្យូ បានគ្រងឈុតរ៉ូបយ៉ាងសំពោង ដែលទាមទារជំនួយការ ៦នាក់ចាំទាញកុំឱ្យទាក់ជើងដួល។
ប៉ុន្តែអ្វីដែលចម្លែកជាងគេគឺវត្តមានស្រមោលខ្មៅដើរដូចចម្លាក់គ្មានមុខ ដែលគ្រប់គ្នាអាចសន្និដ្ឋានយ៉ាងច្បាស់ថា ជាការលេងស្ទីលចម្លែងរបស់តារាទូរទស្សន៍ គីម កាដាសៀន។
កម្មវិធីសមោសរ Met Gala ឆ្នាំនេះមានការសហការដឹកនាំដោយតារាភាពយន្ត Timothee Chalamet កវី Amanda Gorman តារាចម្រៀង Billie Eilish និងកីឡាការិនីតេន្នីស ណាអូមី អូសាកា។
តារាហូលីវូដ មេហ្គាន ហ្វក ខេដ ហាត់សិន និង តារាម៉ូដែលរុស្ស៊ី Irina Shayk។ AFP
ជាទូទៅកម្មវិធីនេះត្រូវបានធ្វើឡើងដើមខែឧសភា ប៉ុន្តែវាត្រូវបានពន្យារពេលរហូតដល់ថ្ងៃទី ១៣ ខែកញ្ញា ឆ្នាំ ២០២១ ខណៈកម្មវិធីឆ្នាំ ២០២០ត្រូវបានលប់ចោល។
សហអ្នកដឹកនាំកិត្តិយសរាត្រីសមោសរដ៏អស្ចារ្យនេះគឺ អ្នកស្រី អាណា វីនធួរ និពន្ធនាយកទស្សនាវត្ដី Vogue ដែលជាអ្នកប្រែក្លាយកម្មវិធីសប្បុរសធម៌នេះទៅជាព្រឹត្តិការណ៍ធំក្នុងសកលលោក ក្រោមការឧបត្ថម្ភដោយថម ហ្វដ និង អាដាម ម៉ូសេរី នាយកអ៊ីនស្តាក្រាម។
ការរៀបចំកម្មវិធីដ៏អធិកអធមនៅសហរដ្ឋអាមេរិក ខណៈពិភពលោកកំពុងជួបវិបត្តិជំងឺរាតត្បាត ចៀសពុំរួចទេនូវការរិះគន់។ ប៉ុន្តែមូលហេតុចម្បងនៃរាត្រីសមោសរនេះគឺការប្រមូលចំណូលទ្រទ្រង់វិទ្យាស្ថានសម្លៀកបំពាក់ នៃសារមន្ទីរមេត្រូផូលីធិន ក្រុងញូវយ៉ក៕ AFP/HR
តារាម៉ូដែល Emily Ratajkowski រាជនីច្នៃម៉ូដវ័យចិតប្លាយ វ៉េរ៉ា វ៉ាង និងនិពន្ធនាយក Vogue អាណា វីនធួរ។ AFP
ឈុតស្រមោលខ្មៅគ្រងដោយតារាទូរទស្សន៍ គីម កាដាសៀន។ AFP
តារាចម្រៀង រីហាណា និងតារារ៉េប App Rocky។ AFP
គូស្នេហ៍ Shawn Mendes និង Camila Cabello, គូស្នេហ៍ Bennifer និង គូស្នេហ៍ ចាស្ទីន ប៊ីប៊ឺ។ AFP
តារាម៉ូដែល Kendall Jenner, Hailee Steinfeld និងតារាចម្រៀងនូវែលសេឡង់ Lordes។ AFP
