.jpg)
អាជីវករជូតញៀសក្លៀស ដែលនឹងត្រូវបានប្រើប្រាស់ជាសំណាកតេស្តរកជំងឺកូវីដ ១៩។ AFP
ក្រុងបាងកក៖ ចំពោះអ្នកលក់ដូរនៅតាមផ្សារក្នុងក្រុងបាងកក ការបែកញើសហៀរទឹកក្លៀកស្រោចអាវយឺតក្នុងបរិយាកាសក្ដៅហើយសើម អាចផ្ទុកនូវសមាសធាតុ ដែលអាចវិភាគរកសញ្ញាផ្ទុកវីរុសកូរ៉ូណា។ នេះបើយោងតាមក្រុមអ្នកវិទ្យាសាស្ដ្រក្នុងស្រុក។
ក្រុមអ្នកស្រាវជ្រាវកំពុងតែអភិវឌ្ឍឧបករណ៍ស្វែងរកវីរុសចល័តនៅលើញើស និងការធ្វើតេស្ដនៅតាមហាងដងផ្លូវឯផ្សារម្ហូបអាហារក្នុងទីក្រុងបាងកក។
លោក ឆាឌីន កូលស៊ីង មកពីសាកលវិទ្យាល័យឈូឡាឡុងកន ក្រុងបាងកក បាននិយាយថា៖ «ពីសំណាកទាំងនេះ យើងបានរកឃើញថា អ្នកឆ្លងជំងឺកូវីដ ១៩ បានបញ្ចេញសារធាតុគីមីដ៏គួរឱ្យកត់សម្គាល់។ យើងបានប្រើលទ្ធផលនៃការរកឃើញនេះដើម្បីអភិវឌ្ឍឧបករណ៍មួយក្នុងការស្វែងរកក្លិនជាក់លាក់ដែលផលិតដោយបាក់តេរីណាមួយនៅក្នុងញើសអ្នកជំងឺកូវីដ ១៩»។
លោក ឆាឌីន ដែលនិយាយថា ការធ្វើតេស្ដមានកម្រិតជាក់លាក់រហូតដល់ ៩៥ភាគរយ រំពឹងថា វាអាចត្រូវបានដាក់ឱ្យប្រើប្រាស់ក្នុងតម្លៃទាបសមរម្យជាងឧបករណ៍រតេស្ដស្ដង់ដារ ដែលតម្រូវចូលមន្ទីរពិសោធ។
យ៉ាងណាមិញ វាស្ថិតក្នុងតំណាក់កាលអភិវឌ្ឍនៅឡើយ ហើយការស្រាវជ្រាវនៅមិនទាន់ត្រូវបានចុះផ្សាយ ឬសិក្សាបន្ថែមនោះទេ។ ក្រុមអ្នកវិទ្យាសាស្ដ្របានកែសម្រួលឧបករណ៍ ដែលប្រើសម្រាប់ស្វែងរកសារធាតុគីមីពុលក្នុងបរិស្ថាន។
លោក ឆាឌីន កូលស៊ីង មកពីសាកលវិទ្យាល័យឈូឡាឡុងកនថា ការធ្វើតេស្ដមានកម្រិតជាក់លាក់រហូតដល់ ៩៥ភាគរយ។ AFP
ការធ្វើតេស្ដពាក់ព័ន្ធការដាក់សំឡីក្រោមក្លៀកចំនួន ១៥នាទី មុនពេលយកមកដាក់លើកែវកញ្ចក់ និងសម្លាប់មេរោគដោយប្រើកាំរស្មី UV។
លោក ឆាឌីន បាននិយាយថា៖ «អ្នកបច្ចេកទេសបានទាញយកសំណាកមួយចំនួនដោយប្រើទុយោបឺត និងច្របាញ់ទៅក្នុងឧបករណ៍វិភាគដើម្បីពិនិត្យលទ្ធផល»។
ការប្រមូលសំណាកប្រើពេល ១៥នាទី ហើយលទ្ធផលបញ្ចេញមកត្រឹម ៣០វិនាទីប៉ុណ្ណោះ។ ការតេស្ដតាមរយៈញើសទទួលបានការសាទរពីអាជីវករលក់ដូរក្នុងផ្សារក្រុងបាងកក ដែលនិយាយថា វាល្អជាងឧបករណ៍តេស្ដរុកច្រមុះទៅទៀត។
អ្នកលក់ឪឡឹកអាយុ ៤៣ឆ្នាំម្នាក់បានប្រាប់ AFP ថា៖ «ការតេស្ដញើសនេះពិតជាងាយស្រួលដោយសារខ្ញុំត្រូវការធ្វើការលក់ដូរអំឡុងពេលលទ្ធផល។ ដោយការតេស្ដ PCR ខ្ញុំត្រូវទៅកាន់មជ្ឈមណ្ឌលតេស្ដ អង្គុយ និងរង់ចាំលទ្ធផលយូរ ហើយវាពិតជាខ្ជះខ្ជាយពេលវេលាមែនទែន»។
ថៃ ដែលកំពុងប្រយុទ្ធប្រឆាំងនឹងរលកទី ៣ និងរលកដ៏កាន់តែអាក្រក់ទៀត បានរាយការណ៍អត្រាឆ្លង ១៦០០០នាក់កាលពីថ្ងៃព្រហស្បតិ៍សប្ដាហ៍មុន ដែលនាំចំនួនអ្នកឆ្លងសរុបកើនជិត ១,៣៤លាននាក់៕ AFP/HR
