ក្រុងសេអ៊ូល៖ ក្រុមតារាចម្រៀងល្បីល្បាញប្រចាំប្រទេសកូរ៉េ BTS ទទួលបានលិខិតឆ្លងដែនការទូតនៅមុនមហាសន្និបាតអង្គការសហប្រជាជាតិ ខណៈពួកគេមានតួនាទីថ្មីជាបេសកជនពិសេសរបស់លោកប្រធានាធិបតី។ នេះបើយោងតាមការិយាល័យប្រធានាធិបតីកូរ៉េខាងត្បូង។
ក្រុមតារាចម្រៀងមានឈ្មោះបោះសំឡេងលើសកលលោក ដោយគ្រាន់តែចម្រៀងមួយបទក្រោមចំណងជើងថា «Dynamite» គ្រងលេខមួយកំពូលតារាង Billboard Hot 100 កាលពីឆ្នាំ ដែលធ្វើឱ្យពួកគេក្លាយជាក្រុមចម្រៀងកូរ៉េខាងត្បូងដំបូងបំផុតឈរលើកំពូលតារាងអាមេរិកនេះ។
ពួកគេបានទទួលភាពល្បីល្បាញជាមួយការកៀរគរចំណូលបានរាប់ពាន់លានដុល្លារដល់សេដ្ឋកិច្ចកូរ៉េខាងត្បូង ហើយកាលពីឆ្នាំមុន ផលិតផលរបស់ពួកគេ HYBE បានកើនភាគច្រើនយ៉ាងសម្បើម។
ពេលនេះ ក្រុងសេអ៊ូលកំពុងសម្លឹងមើលពីសមត្ថភាពរបស់ពួកគេផ្សេងទៀត ដោយលោកប្រធានាធបតី ជូន ជេអ៊ីន បានតែងតាំងពួកគេជាបេសកជនពិសេសរបស់លោកសម្រាប់មនុស្សជំនាន់ក្រោយ និងវប្បធម៌នាពេលអនាគត។
ប្រធានក្រុម BTS លោក RM បាននិយាយក្នុងកម្មវិធីនៅវិមានប្រធានាធិបតី Blue House កាលពីថ្ងៃអង្គារ ដើម្បីប្រគល់ជូនពួកគេលិខិតឆ្លងដែនការទូតពណ៌ក្រហម ដោយសារលិខិតឆ្លងដែនធម្មតាមានពណ៌បៃតង។
លោក មូន ជេអ៊ីន បានប្រាប់សមាជិកក្រុមចម្រៀងថា មេដឹកនាំបរទេសជាច្រើនដែលលោកបានជួបក៏ឆ្លៀតពេលជជែកជាមួយលោកអំពីរឿងរបស់ក្រុម K-pop មួយនេះដែរ។
ខណៈធ្វើដំណើរផ្លូវការ ពួកគេនឹងរីករាយនឹងឯកសិទ្ធិពិសេស ដូចជា សហគមន៍ការទូត និងអាចគេចផុតពីការត្រួតពិនិត្យនៅអាកាសយានដ្ឋាន។ ក្នុងនាមជាបេសកជនពិសេស ក្រុមចម្រៀងបុរសនេះនឹងថ្លែងសារអំឡុងរៀបចំកម្មវិធីគោលដៅអភិវឌ្ឍចីរភាពកាលពីថ្ងៃចន្ទ មុនជំនួបមហាសន្និបាតរបស់អង្គការសហប្រជាជាតិ ហើយវីដេអូសម្ដែងមួយនឹងត្រូវចាក់បញ្ចាំងផងដែរ។
លោក RM ធ្លាប់បានថ្លែងសារជាភាសាអង់គ្លេសពីប្រធានលើកកម្ពស់តម្លៃខ្លួនឯងក្រោមប្រធានបទ «និយាយពីខ្លួនឯង» ក្នុងមហាសន្និបាតរបស់អង្គការសហប្រជាជាតិ ក្នុងឆ្នាំ២០១៨។
មានប្រតិកម្មវិជ្ជមានជាច្រើនជុំវិញតួនាទិថ្មីរបស់ BTS ដោយកត់សម្គាល់ថា ប្រជាប្រិយភាពរបស់ពួកគេនឹងជួយកូរ៉េឱ្យឈរកាន់តែរឹងមាំលើឆាកអន្ដរជាតិ។
អ្នកប្រើប្រាស់ Daumជាវេបសាយធំទីពីររបស់កូរ៉េ បានសរសេរថា៖ «អរគុណ BTS មុខមាត់ប្រទេសកូរ៉េខាងត្បូងកនឹងកាន់តែខ្ពស់ត្រដែត។ ពួកគេបានបំពេញការងារមានប្រសិទ្ធភាពលើសពីអ្នកការទូតរាប់រយនាក់បញ្ចូលគ្នាទៅទៀត»៕ AFP/HR