.jpg)
«គ្រួសារ និងជំទង់» មាន ១៣១ ទំព័រ និងសៀវភៅ «បុត្រតូចសំណព្វចិត្ត» ដែលត្រូវបានបោះពុម្ពឡើងវិញ។ រូបថត សហការី
ភ្នំពេញ: ជំទង់ជាវ័យមួយដែលមានការអភិវឌ្ឍខួរក្បាលខ្លាំង និងចាប់ផ្ដើមផ្លាស់ប្ដូរខ្លួនពីមនុស្សធ្លាប់តែពឹងផ្អែកទៅជាមនុស្សមានឯករាជ្យលើខ្លួនឯង។ ឪពុកម្ដាយភាគច្រើនស្ទាក់ស្ទើរនឹងផ្ដល់ភាពឯករាជ្យឱ្យកូនដោយក្ដីបារម្ភខ្លាចពួកគេធ្លាក់ខ្លួនជាបុគ្គលមិនល្អក្នុងសង្គម។
អ្នកជំនាញសុខភាពផ្លូវចិត្ដ លោក ហឿ សេធុល បានចំណាយពេលអំឡុងប្រទេសជួបវិបត្ដិកូវីដដោយសារសាលារៀនអប់រំពិសេសរបស់លោកត្រូវផ្អាក មកសរសេរសៀវភៅទាក់ទងការអប់រំផ្លូវចិត្ដកុមារ និងក្មេងជំទង់។
«គ្រួសារ និងជំទង់» មាន ១៣១ ទំព័រ ដែលត្រៀមចេញលក់ក្នុងខែកញ្ញានេះ ជាមួយតម្លៃ ២ ម៉ឺនរៀល ផ្ដោតលើជុំវិញបញ្ហា និងដំណោះស្រាយរវាងគ្រួសារ និងក្មេងជំទង់ អាយុចន្លោះពី ១១ ទៅ ២៤ ឆ្នាំ ដើម្បីជំរុញឱ្យក្លាយជាបុគ្គលល្អក្នុងសង្គម។
លោក សេធុល ស្ថាបនិកសាលារៀនអប់រំពិសេស KCPS Counseling and Psycho-Education Services និងប្រធានសមាគមអ្នកប្រឹក្សាយោបល់ និងអ្នកចិត្ដសាស្ដ្រនៅកម្ពុជា បាននិយាយថា៖ «យើងផ្ដោតលើការអប់រំដល់ក្មេងជំទង់។ ខ្ញុំមើលឃើញថា ជំទង់ប្រឈមមុខច្រើនទាក់ទងនឹងទំនាក់ទំនងគ្រួសារ ការគាំទ្រ ការមិនយល់អំពីបញ្ហានៃការរីកលូតលាស់
ផ្លូវចិត្ដ និងរបៀបនៃការចិញ្ចឹមបីបាច់ជំទង់ពីសំណាក់ក្រុមគ្រួសារ»។
លោកបាននិយាយក្នុងនាមជាអ្នកចិត្ដសាស្ដ្រ និងមានបទពិសោធធ្វើការជាមួយក្មេង មនុស្សចាស់ និងជំទង់ ក៏ដូចជាទទួលបានព័ត៌មានច្រើនពីសាលារៀនក្នុងស្រុក និងសាលាស្ដង់ដាអន្ដរជាតិដែលរាយការណ៍អំពីបញ្ហាប្រឈមរបស់ជំទង់។
សៀវភៅគ្រួសារ និងជំទង់ ដែលចំណាយពេលចងក្រងជិត ២ ឆ្នាំ រៀបរាប់អំពីរឿងរ៉ាវរបស់ជំទង់ ប្រភេទគ្រួសារដែលផ្ដល់ភាពកក់ក្ដៅដល់ជំទង់ របៀបរបបគ្រប់គ្រងរបស់ឪពុកម្ដាយ និងវិធីសាស្ដ្រចិញ្ចឹមកូនតាមបែបសម័យថ្មី រួមទាំងរបៀបនៃការអភិវឌ្ឍខ្លួនប្រាណរបស់ជំទង់។
លោក សេធុល បានប្រាប់ ភ្នំពេញ ប៉ុស្ដិ៍ថា៖ «ចំណុចទី១ ជំទង់មួយដែលត្រូវបានយកមកសរសេរជាបទពិសោធ តែមិនមែនផ្ដោតលើក្មេងណាជាក់លាក់នោះទេ។ ចំណុចទី២ យើងនិយាយពីគ្រួសារ ទម្រង់នៃគ្រួសារ បែបបទនៃគ្រួសារថា តើប្រភេទគ្រួសារបែបណាផ្ដល់ភាពកក់ក្ដៅដល់ជំទង់។ ខ្ញុំលើកយកទ្រឹស្ដីអ្នកចិត្ដសាស្ដ្រ អ្នកសិក្សាសង្គមមួយចំនួនស្ដីពីគ្រួសារ ក៏ដូចជាវប្បធម៌គ្រួសារបែបខ្មែរ»។
លោកបានឱ្យដឹងថា ពេលបានអានសៀវភៅនេះ ប្រិយមិត្ដនឹងបានដឹងថា តើគួររៀបចំគ្រួសារបែបណាដែលមានផលល្អទៅលើជំទង់ ដោយផ្ដល់ភាពកក់ក្ដៅ និងទំនុកចិត្ដ។
លោក សេធុល បានបន្ដថា៖ «ទី៣ ខ្ញុំផ្ដោតទៅលើប្រភេទឪពុកម្ដាយ ដោយសារឪពុកម្ដាយខ្លះខ្វាយខ្វល់ពេក ខ្លះតឹងរ៉ឹងពេក ហើយខ្លះទៀតព្រងើយកន្ដើយពេក។ តើឪពុកម្ដាយបែបណា ដែលជួយឱ្យជំទង់មានការប្រាស្រ័យទាក់ទងបានល្អ? ១ ទៀត ខ្ញុំប្រើពាក្យថា ការចិញ្ចឹមបីបាច់តាមបែបសម័យថ្មី តាមរយៈការប្រើប្រាស់ពាក្យពេចន៍ ការអប់រំជំទង់ ការផ្ដល់សេចក្ដីស្រឡាញ់ ភាពកក់ក្ដៅដល់កូន របៀបនៃការប្រាស្រ័យ និងពិភាក្សា។
អ្នកជំនាញសុខភាពផ្លូវចិត្ត និងប្រឹក្សាយោបល់ផ្នែកចិត្តសាស្ដ្ររូបនេះ បានរៀបរាប់អំពីរបៀបនៃការអភិវឌ្ឍឆ្ពោះទៅកាន់ភាពវ័យជំទង់ស្រាយចម្ងល់ថាតើអ្វីទៅជាវ័យជំទង់? តើពួកគេអភិវឌ្ឍផ្នែករាងកាយយ៉ាងដូចម្ដេច? តើការអភិវឌ្ឍផ្នែកផ្នត់-គំនិតយ៉ាងដូចម្ដេច? និងតើខួរក្បាលពួកគេមានការប្រែប្រួលដូចម្ដេច?
លើសពីនេះ វាក៏បានឆ្លើយទៅនឹងសំណួរសួរថា តើជំទង់ប្រឈមមុខនឹងបញ្ហាផ្លូវចិត្ដអ្វីខ្លះ? ជំទង់នឹងស្វែងយល់ពីដំណោះស្រាយនៃបញ្ហាដោយខ្លួនឯង ក្នុងដំណើរប្រកបដោយឯករាជភាព។
សៀវភៅគ្រួសារ និងជំទង់ ជួយជំរុញពួកគាត់ប្រើឱ្យអស់ពីសមត្ថភាពទាក់ទងនឹងការអភិវឌ្ឍផ្នែកខួរក្បាល ពីព្រោះពីកុមាររហូតដល់វ័យជំទង់ ខួរក្បាលរបស់ក្មេងមានការអភិវឌ្ឍខ្លាំង (Critical period) ជាដំណាក់កាលមួយនៃការលូតលាស់ដ៏ស្រួចស្រាល់បំផុត។
លោក ហឿ សេធុល ប្រធានសមាគមអ្នកប្រឹក្សាយោបល់ និងអ្នកចិត្ដសាស្ដ្រនៅកម្ពុជា។ សហការី
លោក សេធុល ដែលបញ្ចប់ការសិក្សាផ្នែកបរិញ្ញាបត្រជាន់ខ្ពស់ជាអ្នកប្រឹក្សាយោបល់ចិត្ដសាស្ដ្រពីសាកលវិទ្យាល័យ De La Salle ប្រទេសហ្វីលីពីន បាននិយាយថា៖ «ជំទង់ស្ថិតក្នុងវ័យ transaction period [អន្តរកាល] ដែលចាប់ផ្ដើមផ្លាស់ប្ដូរខ្លួនពីមនុស្សធ្លាប់តែពឹងផ្អែកទៅជា មនុស្សមានឯករាជភាព»។
លោកបន្ថែមថា៖ «បើសិនជាយើងមិនបានបង្វឹកគាត់បានល្អទេ ពួកគេនឹងនៅតែជាមនុស្សពឹងផ្អែក។ ប៉ុន្ដែឪពុកម្ដាយខ្លះបែរជាខ្លាចភាពឯករាជ្យរបស់កូន។ ជាក់ស្ដែងយើងឃើញគាត់ចេញទៅក្រៅ យើងខ្លាច យើងភ័យ យើងអត់ហ៊ានឱ្យគាត់ចេញប្រឡូកក្នុងសង្គមទេ ដោយខ្លាចគាត់ខិលខូច។ ការគិតបែបនេះអាចត្រឹមត្រូវ តែវាក៏ជាការរារាំងមួយ ដែលធ្វើឱ្យគាត់បាត់បង់ឯករាជភាពរបស់គាត់។
មុនពេលចូលរោងពុម្ព «គ្រួសារ និង ជំទង់» ត្រូវបានស្នើឱ្យឪពុកម្ដាយមួយចំនួនអានសាកល្បងដើម្បីស្វែងយល់ចំណាប់អារម្មណ៍ពីអត្ថប្រយោជន៍នៃបទពិសោធ ក៏ដូចជា ភាពងាយយល់នៃការប្រើប្រាស់ពាក្យពេចន៍។
ដោយមិនចាត់ទុកខ្លួនជាអ្នកនិពន្ធ លោកបានបញ្ជាក់ថា ការបោះពុម្ពសៀវភៅកើតចេញពីចំណូលចិត្ដសរសេរចងក្រង ជាផ្នែកមួយនៃវិជ្ជាជីវៈរបស់លោក។
អ្នកចិត្តសាស្ត្រដែលព្យាយាមផ្សព្វផ្សាយលក់សៀវភៅ មិនមាននៅតាមបណ្ណាគាររូបនេះ បានលើកឡើងពីសមិទ្ធផលកន្លងមកថា៖ «សៀវភៅដំបូងរបស់ខ្ញុំ បុត្រតូចសំណព្វចិត្ដ ដែលត្រូវបានបោះពុម្ព ៣ ០០០ ក្បាល យើងបានលក់ដាច់អស់។ នៅមានឪពុកម្ដាយមួយចំនួន សុំឱ្យបោះពុម្ពឡើងវិញ។ ដូច្នេះ យើងបោះពុម្ពឡើងវិញ ដោយបានធ្វើបច្ចុប្បន្នភាពបន្ថែមព័ត៌មានថ្មីៗចូល ពីជាង ៦០ ទំព័រ ដល់ជាង ១៤០ ទំព័រ»។
លោក សេធុល បាននិយាយអំពីសៀវភៅ «បុត្រតូចសំណព្វចិត្ដ» និពន្ធក្នុងឆ្នាំ ២០១៧ និងត្រូវបានបោះពុម្ពឡើងវិញ ដែលផ្ដោតលើការចិញ្ចឹមបីបាច់កូនតាមបែបវិជ្ជមាន និងចិត្ដសាស្ដ្រ ចំពោះកុមារអាយុចាប់ពី ២ ទៅដល់ ១០ ឆ្នាំ។
សៀវភៅ «ឪពុកម្ដាយកុមារអូទីសឹម»។ សហការី
សៀវភៅ ១ ក្បាលទៀត «ឪពុកម្ដាយកុមារអូទីសឹម» មាន ៤០ ទំព័រ ចងក្រោយដោយអ្នកគ្រូ សុខ សុគន្ធមាលា បង្រៀននៅសាលាអប់រំពិសេស KCPS ដើម្បីឱ្យមាតាបិតាស្វែងយល់ថា តើអ្វីទៅជាអូទីសឹម ហើយវាមានលក្ខណៈបែបណា?
ជាមួយជំនឿចិត្តថា ការទទួលចំណេះដឹងពីសៀវភៅទាំងនេះ រួមចំណែកមួយផ្នែកដើម្បីបង្កើតធនធានមនុស្ស លោក សេធុល ក៏បានឱ្យដឹងដែរថា៖ «ភាគច្រើន ខ្ញុំមិនយកថវិកានេះសម្រាប់ប្រើប្រាស់ផ្ទាល់ខ្លួនទេ ខ្ញុំដកតែថ្លៃដើម ហើយសេសសល់ខ្ញុំធ្វើការបរិច្ចាគទៅសាលារៀន ទិញសម្ភារសិក្សាចែកកុមារនៅទីជនបទ ចូលរួមថវិកាគន្ធបុប្ផា មន្ទីរពេទ្យកុមារអង្គរ និងជួយគ្រួសារចង់បង្កើតមុខរបរ បាន ៣-៤ គ្រួសារ»៕
