ក្រុងឡុងដ៍៖ កិច្ចប្រជុំរាយការណ៍ខ្លីពីស្ថានភាពវីរុសកូរ៉ូណានៅអង់គ្លេសបានរេប្រធានបទចូលដល់តារាចម្រៀង នីគី មីណាជ ដែលបានបង្ហោះសារពីផលប៉ះពាល់នៃវ៉ាក់សាំងការពារជំងឺកូវីដធ្វើឱ្យមិត្តភក្ដិរបស់បងប្អូនជីដូនមួយនាងមានបញ្ហាហើមពងស្វាស។
លោកនាយករដ្ឋមន្ត្រី បូរីស ចនស៊ុន និងមន្ត្រីសុខាភិបាលជាន់ខ្ពស់លោក គ្រីស វីធី បានជជែកវែកញែកពីសំណេររបស់តារារ៉េបស្រីដ៏ល្បីល្បាញរូបនេះ សរសេរទៅកាន់អ្នកគាំទ្រនាតាមបណ្ដាញសង្គមធ្វីតធ័រ ២២,៦ លាននាក់ ពីការរារែកពុំទាន់ទទួលការចាក់វ៉ាក់សាំងរបស់នាង។
លក្ខខណ្ឌតម្រូវឱ្យចាក់វ៉ាក់សាំង ដើម្បីបានចូលរួមព្រឹត្តិការណ៍មហោស្រព Met Gala ដ៏ធំនៅក្រុងញូវយ៉ក បាននាំឱ្យនាងធ្វើការស៊ើបសួរស្រាវជ្រាវជុំវិញវ៉ាក់សាំងការពារជំងឺកូវីដ ១៩នេះ។
មន្ត្រីជាន់ខ្ពស់វ័យ ៥៥ ឆ្នាំ លោក វីធី ដែលពុំសូវស្គាល់មុខតារាសិល្បៈល្បីៗនោះ បានឆ្លើយតបនឹងការអះអាងរបស់នាងថា៖ «មានពាក្យចចាមអារាមច្រើនពីផលប៉ះពាល់នៃវ៉ាក់សាំងការពារកូវីដ ហើយក្នុងចំណោមនោះ ការអះអាងខ្លះពិតជាគួរឱ្យអស់សំណើច»។
លោកបន្តថា៖ «ការអះអាងពីផលប៉ះពាល់ដល់សុខភាពនោះ ច្បាស់ណាស់គឺដើម្បីបន្លាចមនុស្សកុំឱ្យទៅទទួលវ៉ាក់សាំង ហើយខ្ញុំគិតថា ពួកគេពិតជាគួរឱ្យអាម៉ាសណាស់»។
ដោយឡែកលោកនាយករដ្ឋមន្ត្រីវ័យ ៥៧ ឆ្នាំ បូរីស ចនស៊ុន ដែលទទួលការអប់រំច្រើនបែបបុរាណអភិរក្ស លោកបានលើកឡើងថា រូបលោកដូចជាមិនសូវស្គាល់ពីការងារសិល្បៈរបស់តារារ៉េបអាមេរិកនាង នីគី មីណាជ ទេ ហើយលោកមានចំណូលចិត្តស្ដាប់តារាចម្រៀងអង់គ្លេសឈ្មោះស្រដៀងគ្នានេះវិញគឺ Nikki Kanani ដែលជាអ្នកជួយផ្សព្វផ្សាយយុទ្ធនាការវ៉ាក់សាំងរបស់រដ្ឋាភិបាល។
មិនចាំយូរ តារាចម្រៀងរ៉េប នីគី មីណាជ បានផ្ញើសារសំឡេងនិយាយសំនៀងអង់គ្លេសបែបអ្នកក្រុងឡុងដ៍ ដោយអះអាងថា នាងកើតនៅអង់គ្លេស និងរៀនសាកលវិទ្យាល័យជាមួយអតីតនាយករដ្ឋមន្ត្រីអង់គ្លេស ម៉ាហ្គារ៉េត ថាច់ឆើរ។ ការនិយាយរបស់នាងទាំង២ចំណុចនេះ គឺពុំមែនជាការពិតទាល់តែសោះ៕ AFP/HR