.jpg)
រូបតំណាង៖ យុវតីប្រើអុីនស្តាក្រាមនិយមការប្រៀបធៀបរូបសម្រស់។ រូបថត AFP
ក្រុងសានហ្វ្រានស៊ីស្កូ: Instagram បានការពារខ្លួនដោយច្រានចោលរបាយការណ៍មួយថា បណ្ដាញ សង្គមនេះធ្វើឱ្យប៉ះពាល់សុខភាពផ្លូវចិត្ដក្មេងស្រី ដោយបានឱ្យដឹងថា ខ្លួននឹងលុបរាល់ការបង្ហោះពីអាថ៌កំបាំងគ្មានមូលដ្ឋានអំពីសម្រស់រាងកាយ។
ប្រធានផ្នែកគោលនយោបាយសាធារណៈរបស់ Instagram អ្នកស្រី ខារីណា ញូវតុន បានតបតនឹងរបាយការណ៍របស់កាសែត Wall Street Journal ដែលបង្ហាញមាតិកា Instagram ផ្ដោតលើរូបភាពជាចម្បង បានបង្កផលប៉ះពាល់ដល់យុវវ័យ ជាពិសេស ក្មេងស្រី។
តែអ្នកស្រី ញូវតុន បានដកស្រង់ការសិក្សារបស់សាកលវិទ្យាល័យហាវើដ ដោយបានកត់សម្គាល់ថា «ទាំងផលវិជ្ជមាន និងអវិជ្ជមាន» បានផ្ដល់បទពិសោធដល់យុវវ័យអាមេរិកនៅលើបណ្ដាញសង្គម។
យុវវ័យអាចរីករាយក្នុងការទាក់ទងមិត្ដភក្ដិលើបណ្ដាញសង្គមនៅថ្ងៃនេះ ហើយនៅថ្ងៃក្រោយ ក៏ឈ្លោះជាមួយមនុស្សដដែលនេះផងដែរ។
យោងតាមកាសែតខាងលើបានឱ្យដឹងថា ការស្រាវជ្រាវក្នុងស្ថាប័នបានបង្ហាញថា យុវវ័យបានចោទ Instagram ដែលបង្កើនបញ្ហាក្រេវក្រោធ និងធ្លាក់ទឹកចិត្ដ។
យ៉ាងណាមិញ Instagram បានខំដោះស្រាយបញ្ហាមាតិកាប្រមាថ អត្ដឃាត ធ្វើបាបខ្លួនឯង និងជំងឺផ្នែកទទួលទានអាហារដែលកើតឡើងពីបណ្ដាញសង្គមមួយនេះផងដែរ។
Instagram ក៏កំពុងស្វះស្វែងរកវិធីស្វែងយល់នូវប្រភេទនៃការបង្ហោះធ្វើឱ្យអ្នកទស្សនាមានអារម្មណ៍ដោយការប្រៀបធៀប រួចបង្វែរមកមើលមាតិកាធ្វើឱ្យអារម្មណ៍ល្អវិញ។
អ្នកស្រីបន្តថា៖ «យើងកំពុងបង្កើនការដោះស្រាយបញ្ហាប្រៀបធៀបគ្នាក្នុងសង្គម និងរូបរាងកាយអវិជ្ជមានរបស់ខ្លួន។ យើងជឿជាក់ថា នឹងអាចជួយចង្អុលបង្ហាញអ្នកប្រើប្រាស់ស្វែងរកមាតិកាដែលល្អ និងផ្លាស់ប្ដូរវប្បធម៌ឱ្យតម្លៃរូបសម្រស់ក្នុងក្ដីស្រមៃលើបណ្ដាញសង្គម»៕ AFP/HR
