ក្រុងកាប៊ុល: នៅមជ្ឈមណ្ឌលហ្វឹកហ្វឺនបណ្ដោះអាសន្នមួយនៅអាកាសយានដ្ឋានក្រុងកាប៊ុល សុនខជាច្រើនក្បាលដែលត្រូវបានទុកចោលអំឡុងពេលជម្លៀសខ្លួនដ៏ចលាចលមួយខែចុងក្រោយពីប្រទេសអាហ្វហ្កានីស្ថាន ពេលនេះបានរកឃើញផ្ទះថ្មី និងក្រុមអ្នកបង្វឹកថ្មីហើយ។
ខណៈមិនច្បាស់ថានរណាជាម្ចាស់របស់ឆ្កែទាំងនេះ ពួកវាជាច្រើនក្បាលត្រូវបានរកឃើញនៅតាមបរិវេណអាកាសយានដ្ឋាន ដែលត្រូវបានប្រើដោយកងទ័ពអាមេរិក ហើយឆ្កែខ្លះត្រូវបានបង្វឹកឱ្យហិតរកគ្រឿងផ្ទុះ។ នេះបើយោងតាមក្រុមអ្នកបង្វឹកថ្មី។
ពួកវាស្ថិតក្នុងចំណោមសំណល់ពីកិច្ចការអន្ដរាគមន៍របស់អាមេរិក ២ ទសវត្សរ៍ ដែលមមាញឹកក្នុងការជម្លៀសមនុស្សជាង ១២ ម៉ឺននាក់ពីទីក្រុងកាប៊ុល ខណៈក្រុងតាលីបង់វិលមកកាន់អំណាច។
ជាអ្នកបង្វឹក ហេវាដ អាហ្ស៊ីហ្ស៊ី ដែលធ្វើការឱ្យក្រុមហ៊ុនមួយផ្ដល់សេវាកម្មសន្ដិសុខនៅអាកាសយានដ្ឋាន បាននិយាយថា លោកបានចេញស្វែងរកសុនខត្រូវបានបោះបង់ចោល ពេលដែលជើងយន្ដហោះចុងក្រោយរបស់អាមេរិកចាកចេញទៅ។
លោកបានប្រាប់ AFP នៅមជ្ឈមណ្ឌលហ្វឹកហ្វឺន ដែលស្ថិតនៅតាមសាលអកាសយានដ្ឋានត្រូវបានប្រើសម្រាប់យានហោះអាមេរិក និងសម្ភារយោធា។
លោកបានឃើញ ៣០ ក្បាល ដោយពាក់កណ្ដាលនៅបរិវេណនោះ ដែលគ្រប់គ្រងដោយកងទ័ពអាមេរិក។ សត្វឆ្កែជាច្រើនទៀត ត្រូវបានរកឃើញនៅតាមបរិវេណដទៃទៀត ដែលធ្លាប់គ្រប់គ្រងដោយអតីតប៉ូលិសអាហ្វហ្កានីស្ថាន។
ពេលនេះ សត្វទាំងនេះត្រូវបានផ្ដល់ចំណីអាហារ ថែទាំ និងបង្វឹកដោយលោក អាហ្ស៊ីហ្ស៊ី និងក្រុមការងារនៅមជ្ឈមណ្ឌលហ្វឹកហ្វឺនរបស់ក្រុមហ៊ុនសន្ដិសុខ ដែលជាជម្រកច្នៃចេញពីទូកុងតឺន័រពីរ បែងចែកតាមទ្រុងរបស់វា។
សហរដ្ឋអាមេរិកបានដកចេញកងទ័ពចុងក្រោយពីប្រទេសអាហ្វហ្កានីស្ថានកាលពីថ្ងៃទី ៣០ ខែសីហា ដោយបញ្ចប់សង្គ្រាមដ៏យូរបំផុតរបស់អាមេរិកនៅមុនខួបការវាយប្រហារថ្ងៃទី ១១ ខែ កញ្ញា ឆ្នាំ ២០០១ ដែលនាំឱ្យមានការឈ្លានពានរបស់អាមេរិក។
ប៉ុន្មានម៉ោងក្រោយទាហានចុងក្រោយចាកចេញ ក្រុមអង្នការសិទ្ធិសត្វ PETA បានឱ្យដឹងក្នុងសេចក្ដីថ្លែងការណ៍ថា ឆ្កែហិតគ្រឿងផ្ទុះ ៦០ ក្បាល និងឆ្កែធ្វើការងារ ៦០ ក្បាលទៀត ត្រូវបានបោះបង់ចោលដោយកងទ័ពអាមេរិក។
ក្រុមអង្គការបានអំពាវនាវដល់ប្រធានាធិបតី ចូ បៃដេន «ចាត់វិធានការភ្លាមៗ» ដោយព្រមានថា ឆ្កែទាំងនោះជួបទុក្ខព្រោះកម្ដៅថ្ងៃដោយគ្មានលទ្ធភាពទទួលបានអាហារ និងទឹកថែទៀត។
ភ្លាមៗនេះ មន្ទីរបញ្ឆកោណបានច្រានចោលថា កងទ័ពអាមេរិកបានបោះបង់សុខនមួយចំនួននៅអាកាសយានដ្ឋាននោះទេ៕ AFP/HR