ក្រុងសិង្ហបុរី៖ ឆ្កែស្រម៉ូវពណ៌សពីរក្បាលដែលពាក់កន្សែងចងកអង្គុយយ៉ាងស្ងៀមស្ងាត់ ពេលម្ចាស់របស់ពួកវាលើកដៃជាសញ្ញាស្វាគមន៍ និងថតរូបសែលហ្វី បង្ហោះអួតដល់អ្នកគាំទ្រលើបណ្ដាញសង្គម Instagram រាប់ម៉ឺននាក់។
ពួកវាស្ថិតក្នុងចំណោមអ្នកមានឥទ្ធិពលលើបណ្ដាញសង្គមកាន់តែមានចំនួនច្រើននៅប្រទេសសិង្ហបុរី ជាទំនោរកើតឡើងដោយសារកំណើនលក់អនឡាញ និងការចិញ្ចឹមសត្វអំឡុងពេលវិបត្ដិកូវីដ។
ភ្ជាប់ជាមួយអ្នកមានឥទ្ធិពលលើបណ្ដាញសង្គមផ្នែកសត្វចិញ្ចឹម ក្រុមហ៊ុនបានធ្វើការជាមួយសត្វនានាចាប់ពីឆ្មាឈ្មោះ Brossy Meowington ដែលមានអ្នកគាំទ្រជាង ៥ម៉ឺននាក់ រហូតដល់ឆ្កែរោមសជប៉ុនឈ្មោះ Luna ជាដើម។
រីឯតារាជើងបួន សាសា និង ពីពើរ តែងតែបង្ហាញវត្ដមានលើគណនី Instagram ឈ្មោះ «Lomodoggies» រមែងលេងឈុតតុបតែងខ្លួនស៊ីចង្វាក់គ្នា និងថតរូបបង្ហោះជាមួយការលាតអណ្ដាតចេញដ៏គួរឱ្យស្រឡាញ់។
សុខនស្រមូវទាំងពីរទទួលបាននូវផលិតផលប្រើប្រាស់នានាតម្លៃរាប់ពាន់ដុល្លារ ចាប់ពីម៉ាស៊ីនសម្អាតរោមរហូតដល់ស្បែកជើង និងថែមទាំងបានធ្វើជាតំណាងទីភ្នាក់ងារទៀត។
ម្ចាស់របស់ឆ្កែស្រមូវទាំងពីរ អ្នកនាង Carrie Er បាននិយាយពេលថតរូបជាមួយតារាឆ្កែរបស់ខ្លួនថា៖ «វាជាការសប្បាយ សប្បាយទាំងខ្ញុំ និងឆ្កែ»។
ឆ្កែទាំងពីរក្បាលពេលនេះមានអ្នកគាំទ្រលើ Instagram ជិត ២៤០០នាក់ និងរកចំណូលបានប្រមាណ ៥០០ដុល្លារសិង្ហបុរី (១,៥លានរៀល) សម្រាប់ចំណូលផ្នែកទីផ្សារ។
មានការពេញនិយមខ្លាំងចំពោះសកម្មភាពបង្ហាញក្ដីស្រឡាញ់សត្វរបស់អ្នកមានឥទ្ធិពលបណ្ដាញសង្គម ខណៈក្រុមហ៊ុននានាផ្សព្វផ្សាយផលិតផលលើអនឡាញអំឡុងពេលវិបត្ដិកូវីដ។ នេះបើយោងតាម Jane Pehសហស្ថាបនិកទីភ្នាក់ងារ The Woof Agenceyដែលតំណាងដោយសុខនរបស់ Er ទាំងពីរ។
Peh ដែលជាក្រុមហ៊ុនមានគណនីបណ្ដាញសង្គមស្ដីពីសត្វចំនួន ៦០០០ ជាបណ្ដាញ បាននិយាយថា៖ «ខ្ញុំគិតថា អ្នកឥទ្ធិពលបណ្ដាញសង្គមដោយប្រើសត្វចិញ្ចឹមតែងតែទទួលបានអត្ថប្រយោជណ៍ដោយសារយើងស្រឡាញ់សត្វ។ ពួកវាពិតជាស្រស់ស្អាត ហើយយើងមិនអាចស្អប់ពួកវាឡើយ»៕ AFP/HR