ក្រុងហែលស៊ីនគី៖ បុរសហ្វាំងឡង់ម្នាក់ ដែលចំណាយពេល ២ទសវត្សរ៍ក្នុងពន្ធនាគារពីបទមនុស្សឃាត កំពុងព្យាយាមសងបំណុលដល់សង្គមជាតិវិញតាមរយៈការបង្កើត «បន្ទប់បញ្ចេញកំហឹង» ដោយអនុញ្ញាតឱ្យអតិថិជនបញ្ចេញកំហឹងរបស់ខ្លួនទៅលើវត្ថុផ្សេងៗនៅក្នុងផ្ទះសម្បែងជាមួយព្រនុងលេងបេសបល។
លោក ចេន រ៉ានីនេន អាយុ ៤៤ ឆ្នាំ រងបទចោទមនុស្សឃាតពីរករណី បានបើកមជ្ឈមណ្ឌល «Raivoomo» ក្រុងហែលស៊ីនគី កាលពី ២ខែមុនដោយប្រើប្រាស់ប្រាក់កម្ចីពីមិត្ដភក្ដិ និងបាននិយាយថា លោកកំពុងទទួលការកក់ពេញតាំងពីបើកសម្ពោធមក។
លោកបាននិយាយថា៖ «ខ្ញុំជាប់គុករហូតដល់ ៦ ខែមុន ហើយខ្ញុំគិតថា ពេលខ្ញុំចេញមកវិញ ខ្ញុំនឹងចាប់ផ្ដើមកសាងបន្ទប់នេះ និងអនុញ្ញាតឱ្យមនុស្សបញ្ចេញកំហឹងនៅទីនេះជាជាងការប្រព្រឹត្ដិទង្វើឆ្កួតៗ ដែលខ្ញុំធ្លាប់ឆ្លងកាត់កាលពីយុវវ័យ»។
លោក រ៉ានីនេន ដែលក្លាយជាក្រុមឥន្ធពាលខណៈរស់នៅជាយក្រុងដ៏ខ្វះខាតនៃប្រទេសស៊ុយអែត ក៏បានការប្រឹក្សាដល់យុវជន ដោយព្យាយាមតម្រែតម្រង់ផ្លូវឱ្យពួកគេចាកឆ្ងាយពីក្រុមបាតសង្គម។
បន្ទប់បញ្ចេញកំហឹងជាទីកន្លែងធម្មតានៅតាមប្រទេសមួយចំនួន ដូចជាសហរដ្ឋអាមេរិក ហើយបន្ទប់ថ្មីរបស់លោកនេះរមែងទទួលបានអតិថិជនជាស្ដ្រីដែលអារម្មណ៍ក្រេវក្រោតរបស់ពួកគេកើតឡើងពីភាពស្មុគស្មាញដោយសារតែកូវីដ។
អ្នកស្រី សានន់ណា ស៊ូលីន ដែលមកប្រារឰខួបកំណើត ៥០ឆ្នាំ ជាមួយការវាយបំផ្លាញម៉ាស៊ីនព្រីនចាស់ៗ ម៉ាស៊ីនបូមធូលី និងគ្រឿងចានឆ្នាំង ក៏ដូចជាថាសចម្រៀងដែលខ្លួនចូលចិត្ដ បាននិយាយថា៖ «ខ្ញុំមានអារម្មណ៍ល្អខ្លាំងណាស់ ហើយថែមទាំងអាចបញ្ចេញលើសបានទៀត»។
អ្នកស្រីបានបន្ដថា៖ «យើងជាស្ដ្រីធ្លាប់តែធ្វើចរឹកត្រឹមត្រូវ និងចេះគ្រប់គ្រងខ្លួនបានល្អ»។
លោក រ៉ានីនេន បានកត់សម្គាល់ថា អតិថិជន ៨០ភាគរយជាស្ដ្រីអាយុចន្លោះពី ២៥ ទៅដល់ ៤៥ ឆ្នាំ។
លោកបន្ថែមថា៖ «នៅរយៈពេលយូរអង្វែង វាគួរតែទៅជួបអ្នកជំនាញផ្លូវចិត្ដដើម្បីទទួលការប្រឹក្សាយោបល់ចំពោះបញ្ហារបស់លោកអ្នក»។
ប៉ុន្ដែចំពោះអារម្មណ៍ឆេវមួយគ្រា នេះជាកន្លែងដ៏ល្អបំផុតសម្រាប់ការបញ្ចេញកំហឹង និងអារម្មណ៍មួលហ្មងផ្សេងៗ៕ AFP/HR