ភ្នំពេញៈ កាលពី ៣ ឆ្នាំ មុន លេចដំណឹងដ៏កម្សត់របស់តារាចម្រៀងជើងចាស់លោក ចាន់ សម័យ ម្ចាស់បទ «សុំមេមាន់មួយ» ដែលសំងំរស់នៅជាមួយប្រពន្ធ និងកូនៗ បាត់មុខលើវិថីសិល្បៈជាង ១០ ឆ្នាំ ព្រោះមានជីវភាពលំបាក តែពេលនេះ ជីវភាពប្រែប្រួលខ្លាំងលើវិស័យអចលនទ្រព្យ។
គេនៅចាំថា កាលពីចុងឆ្នាំ ២០១៨ លោក ចាន់ សម័យ ត្រូវបានមហាជនដឹងពីដំណឹងមានជីវភាពលំបាក ដោយសារឃើញវត្តមានលោកទៅស្ទូចត្រីនៅមាត់ទន្លេមេគង្គ ក្នុងតំបន់សង្កាត់ព្រែកលៀប និងរស់នៅក្នុងបន្ទប់ជួលជាមួយប្រពន្ធ និងកូន ៥ នាក់។ លុះដើមឆ្នាំ ២០១៩ លោក និងក្រុមគ្រួសារ ត្រូវបានលោកនាយករដ្ឋមន្ត្រី ហ៊ុន សែន បានផ្តល់អំណោយផ្ទះ ១ ខ្នង ក្នុងបុរី ឡេង ណាវ៉ាត្រា នៅម្តុំទួលពង្រ និងត្រូវមិត្តអ្នកសិល្បៈ ជួយជ្រោមជ្រែង ឱ្យវិលមកកាន់ក្បាលមេក្រូច្រៀងវិញ និងក្លាយជាតារាចម្រៀងប្រចាំផលិតកម្មហ្គាឡាក់ស៊ី។
តែយ៉ាងណា ការវិលមកប្រឡូកសិល្បៈវិញនេះ ម្ចាស់បទ «សុំមេមាន់មួយ» បទ «បំភ្លេចអូនមិនបាន» ចម្រៀងក្នុងកុនចិនតៃវ៉ាន់រឿង «ស្នេហា F4» លោក ចាន់ សម័យ ហាក់មិនមានសម្ទុះ និងអាចរកកម្រៃចិញ្ចឹមគ្រួសារឱ្យមានជីវភាពល្អឡើយ។ តែថ្មីៗនេះ ស្រាប់តែលេចដំណឹងប្រែប្រួលជីវភាពរបស់លោក ចាន់ សម័យ លើវិស័យអចលនទ្រព្យទៅវិញ។ នេះបើយោងទៅតាមប្រភពអ្នកស្គាល់លោក បានទម្លាយឱ្យដឹងតាមសង្គមហ្វេសប៊ុកថា លោក ចាន់ សម័យ កំពុងតែមានជីវភាពខុសឆ្ងាយពី ៣ ឆ្នាំមុន ដោយបច្ចុប្បន្នលោកបានក្លាយជានាយកប្រតិបត្តិនៃក្រុមហ៊ុនអចលនទ្រព្យមួយឈ្មោះ Cambo Dimon Land Property Development-Real Estate Company ឬ CDL and Property-ស៊ីឌីលែន អចលនទ្រព្យ។
យ៉ាងណា ភ្នំពេញ ប៉ុស្តិ៍ មិនអាចសុំការបកស្រាយការពិតបន្ថែមពីលោកបាននោះឡើយដោយសារប្រព័ន្ធទូរស័ព្ទលោកតេចូល តែបែរជាគ្មានអ្នកលើកទទួល។
គួររំឭកដែរថា អតីតជាតារាចម្រៀងល្បីប្រចាំផលិតកម្មព្រះវិហារ នាអំឡុងឆ្នាំ ២០០០-២០០១ លោក ចាន់ សម័យ បានធ្វើឱ្យភ្ញាក់ផ្អើលខ្លាំងទាំងមហាជន និងសង្គមអ្នកសិល្បៈ ក្រោយបានឃើញជីវភាពយ៉ាប់យ៉ឺនខ្លាំងមិនគួរឱ្យជឿរបស់លោកដែលដើរស្ទូចត្រីតាមមាត់ទន្លេម្តុំព្រែកលៀប ដើម្បីយកត្រីធ្វើម្ហូបចិញ្ចឹមជីវិតកូនៗ និងគ្រួសារ សំងំរស់នៅផ្ទះជួលជាង ១០ ឆ្នាំ៕