ក្រុងវេនិក៖ យានផ្លូវទឹក Noah''s Violin ដែលជាឈ្មោះវីយូឡុងយក្សបង្កើតឡើងដោយសិល្បករក្រុងវេនិក អ៊ីតាលី លីវីយូ ដឺម៉ារឈី បានសម្ពោធវត្តមានរបស់ខ្លួនលើដដងព្រែកហ្គ្រេនខាណល ឯក្រុងវេនិក កាលពីថ្ងៃទី ១៨ ខែកញ្ញា។
វីយូឡុងយក្សប្រវែង ១២ ម៉ែត្រកន្លះ ជានិមិត្តរូបនៃការកកើតនៃទីក្រុងវេនិក តាមរយៈសិល្បៈ វប្បធម៌ និងតន្ត្រី។
យានជំនិះរាងរៅជាឧបករណ៍តន្ត្រីមួយនេះ បាននាំយកសិល្បករសិល្បការិនី ពីក្រុមតន្ត្រីបុរាណ Benedetto Marcello Conservatory មកប្រគំបទភ្លេងបុរាណ Vivaldi។
ស្ថិតក្នុងចំណោមទូកបុរាណអត្តសញ្ញាណក្រុងវេនិក វីយូឡុងយក្សធ្វើដំណើរលើផ្ទៃទឹក ទាក់ទាញក្រសែភ្នែកមនុស្សម្នា កាណុកាមេរ៉ា និងទូរស័ព្ទឱ្យផ្ដិតយករូបភាព។
វីយូឡុងយក្សនេះផលិតដោយប្រើប្រាស់ឈើប្រភេទខុសៗគ្នាទៅតាមមុខងារ នឹងបំពាក់ដោយមូទ័រខាងក្នុង។ នាវារាងរៅដូចឧបករណ៍តន្ត្រីនេះ ទាមទារបទពិសោធខ្ពស់ក្នុងការបញ្ជាលើផ្ទៃទឹក។
សមាជិកក្រុមសម្ព័ន្ធ Consorzio Venezia Sviluppo លោក មីឆែល ភីទែរី ដែលផ្ដល់ហិរញ្ញវត្ថុក្នុងការសាងសង់ទូកវីយូឡុងនេះ បាននិយាយថា៖ «វត្តមានវីយូឡុងយក្ស គឺជាសញ្ញានៃការរស់រានមានជីវិតឡើងវិញនៃក្រុងវេនិកយើង បន្ទាប់ពីភាពស្ងាត់ជ្រងំនៃការបិទខ្ទប់ទីក្រុងដោយសារវីរុសកូរ៉ូណាកន្លងមក»។
អ្នកសាងសង់វីយូឡុងយក្ខ លោក ដឺម៉ារឈី បានឱ្យឈ្មោះវាថា Noah''s Violin ដោយរំពឹងថា វានឹងផ្សព្វផ្សាយសារនៃក្ដីសង្ឃឹម សិល្បៈ វប្បធម៌ និងតន្ត្រី បន្ទាប់ពីព្យុះភ្លៀងរសាយផុតទៅ។
លោក លីអន ហ្សានណូវែឡូ ប្រធានសម្ព័ន្ធនេះ បាននិយាយថា គម្រោងនេះហាក់បីដូចជាផ្ដល់ពន្លឺដល់ថ្ងៃដែលអាប់រស្មីបំផុតនៃក្រុងវេនិក ដោយសារតែវិបត្តិកូវីដសកល។
លោកបានលើកឡើងថា៖ «ទាំងបណ្ដាក្រុមហ៊ុន និងបុគ្គល ដែលនៅក្រៅសម្ព័ន្ធ បានចូលរួមជួយយើង ប្រកបដោយសាមគ្គីភាព។ យើងធ្វើកិច្ចការនេះអស់ពីចិត្ត ធ្វើដោយចេញបេះដូងតែម្ដង»។
កាលពីថ្ងៃសៅរ៍ លោក ហ្សានណូវែឡូ បានធ្វើដំណើរដោយទូក ប្រដេញតាមវីយូឡុងយក្សនៅលើដងព្រែកហ្គ្រេនខាណល ដោយក្ដីមោទន និងរំភើប។
រីឯអ្នកសាងសង់ទូកវីយូឡុងលោក ដឺម៉ាឈី បានស្រែកបន្លឺឡើងថា៖ «អស្ចារ្យណាស់ អ្នកទាំងអស់គ្នាធ្វើបានល្អណាស់!»៕ AFP/HR