ក្រុងប៉ារីស៖ ជើងខ្លាំងដើរលើខ្សែពួរ ជនជាតិបារាំងម្នាក់បានដើរឆ្លងទន្លេ Seine កម្ពស់ ៧០ ម៉ែត្រ និងចម្ងាយ ៦៧០ ម៉ែត្រ ក្នុងការផ្សងព្រេងដ៏គួរឱ្យស្រៀវឆ្អឹងខ្នង ដោយមានការទស្សនាផ្ដល់កម្លាំងចិត្ដពីមហាជនពីលើប៉មខ្ពស់ Eiffel Tower និងអ្នកនៅតាមដងទន្លេ។
ភ្ជាប់ជាមួយខ្សែសុវត្ថិភាព យុវជនវ័យ ២៧ ឆ្នាំ ណាថាន់ ផូលីន បានបោះជំហានទៅមុខសន្សឹមៗនៅលើខ្សែពួរចងកាត់ទទឹងទន្លេចន្លោះប៉ម Eiffel Tower និងមហោស្រព Chaillot Theatre។
លោកបានឈប់សម្រាកប៉ុន្មានដង ដោយអង្គុយ និងទម្រេតខ្លួននៅលើខ្សែផងដែរ។
លោក ផូលីន បាននិយាយក្រោយការបង្ហាញសមត្ថភាពនៅថ្ងៃសៅរ៍៖ «វាមិនងាយស្រួលនោះទេ ក្នុងការដើរចម្ងាយ ៦០០ ម៉ែត្រ ដោយត្រូវចេះផ្ចង់អារម្មណ៍ មិនគិតពីអ្វីៗគ្រប់យ៉ាងនៅជុំវិញខ្លួន តែនៅតែមើលឃើញភាពស្រស់ស្អាត»។
លោកបានឱ្យដឹងថា ការសុំច្បាប់ពីអាជ្ញាធរគឺជាកិច្ចការលំបាកមួយសម្រាប់លោក ហើយស្ដ្រេសទាក់ទងនឹងមហាជន ដែលមានមនុស្សមើលយ៉ាងច្រើនកុះកុញ ក៏ជាសម្ពាធមួយទៀត។
លោក ផូលីន ដែលបានគ្រងកំណត់ត្រាពិភពលោកជាច្រើន បានបង្ហាញសមត្ថភាពពិសេសដើម្បីអបអរទិវាបេតិកភណ្ឌប្រចាំឆ្នាំរបស់បារាំង ពេលមនុស្សម្នាត្រូវបានអញ្ជើញមកទស្សនាសំណង់បេតិកភណ្ឌប្រវត្ដិសាស្ដ្រ ដែលតែងតែបិទទ្វារមិនទទួលភ្ញៀវ។
លោកបាននិយាយថា៖ «លោកតែងតែមានបំណងធ្វើកិច្ចការល្អៗ និងចែករំលែក ក៏ដូចជានាំពាំអ្វីថ្មីៗ ដែលធ្វើឱ្យបេតិកភណ្ឌនៅមានរស់រវើក»។
លោកបានដើរលើខ្សែពួរឆ្លងទន្លេ Seine នៅទិវាបេតិកភណ្ឌក្នុឆ្នាំ ២០១៧៕ AFP/HR